ໃນວັນທີ 07 ເມສາ 2021, ທີ່ ຫ້ອງວ່າການສຳນັກງານນາຍົກລັດຖະມົນຕີ, ພະນະທ່ານ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ, ໄດ້ສົນທະນາໂທລະສັບທາງໄກກັບ ພະນະທ່ານ ຊູງະ ໂຢຊິຮິເດະ (H.E. Mr. SUGA Yoshihide), ນາຍົກລັດຖະມົນຕີຍີ່ປຸ່ນ, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ລາວ-ຍີ່ປຸ່ນ.
ໃນການສົນທະນາຄັ້ງນີ້, ພະນະທ່ານ ພັນຄຳ ວິພາວັນ ໄດ້ສະແດງຄວາມຍິນດີ ທີ່ໄດ້ໂອ້ລົມກັບ ພະນະທ່ານ ຊູງະ ໂຢຊິຮິເດະ ອີກຄັ້ງ ພາຍຫຼັງທີ່ໄດ້ມີໂອກາດພົບປະກັນໃນການຢ້ຽມຢາມຍີ່ປຸ່ນ ເພື່ອຮັບຫຼຽນກຽດຕິຄຸນອາທິດອຸໄທ ໃນເດືອນພະຈິກ 2019 ທີ່ຜ່ານມາ ແລະ ຂໍຖືໂອກາດນີ້ ສະແດງຄວາມຂອບໃຈ ຕໍ່ຄໍາຊົມເຊີຍອັນອົບອຸ່ນ ໃນໂອກາດທີ່ໄດ້ຮັບຕໍາແໜ່ງໃໝ່. ພ້ອມກັນນີ້, ພະນະທ່ານ ພັນຄໍາ ວິພາວັນ ກໍໄດ້ສະແດງຄວາມພ້ອມທີ່ຈະສືບຕໍ່ເຮັດວຽກຮ່ວມກັບ ພະນະທ່ານ ຊູງະ ໂຢຊິຮິເດະ ຢ່າງໃກ້ຊິດ ເພື່ອສືບຕໍ່ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ບົນພື້ນຖານການເປັນຄູ່ຮ່ວມຍຸດທະສາດຂອງສອງປະເທດ ແລະ ປະກາດຮັບຮອງແຜນປະຕິບັດງານ ເພື່ອຄວາມກ້າວໜ້າຂອງການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ.
ໃນໂອກາດດຽວກັນ, ສອງຝ່າຍ ໄດ້ສະແດງຄວາມຊົມເຊີຍ ແລະ ຍິນດີຕໍ່ການສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 65 ປີ (05 ມີນາ 1955-05 ມີນາ 2020) ແລະ ການເປັນຄູ່ຮ່ວມຍຸດທະສາດ ຄົບຮອບ 05 ປີ ລະຫວ່າງ ສປປ ລາວ ແລະ ຍີ່ປຸ່ນ ໃນປີ 2020 ຜ່ານມາ, ເຖິງແມ່ນວ່າຈະມີສະພາບການແຜ່ລະບາດຂອງພະຍາດ ໂຄວິດ-19, ແຕ່ສອງປະເທດ ກໍພ້ອມພາກັນສະເຫຼີມສະຫຼອງສອງວັນປະຫວັດສາດດັ່ງກ່າວ ດ້ວຍຜົນສໍາເລັດຢ່າງຈົບງາມ. ພ້ອມກັນນີ້, ສອງຝ່າຍ ຍັງຕີລາຄາສູງທີ່ເຫັນວ່າ ຕະຫຼອດໄລຍະເວລາ 65 ປີ ແຫ່ງການສ້າງຕັ້ງສາຍພົວພັນການທູດຮ່ວມກັນ, ສອງປະເທດ ໄດ້ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ໃນດ້ານຕ່າງໆໃນຫຼາຍຂົງເຂດ ໃຫ້ນັບມື້ນັບຂະຫຍາຍຕົວຂຶ້ນຢ່າງບໍ່ຢຸດຢັ້ງ. ນອກຈາກນີ້, ສອງຝ່າຍ ຍັງໄດ້ປຶກສາຫາລືກັນ ກ່ຽວກັບ ທິດທາງການຮ່ວມມືໃນຕໍ່ໜ້າ ໂດຍສະເພາະແມ່ນ ການຮ່ວມມືທາງດ້ານວຽກງານປ້ອງກັນປະເທດ, ການລົງທຶນ ຢູ່ ສປປ ລາວ ແລະ ໂຄງການຊ່ວຍເຫຼືອຕ່າງໆຈາກຍີ່ປຸ່ນ ແລະ ສອງຝ່າຍ ຍັງໄດ້ປຶກສາຫາລືບັນຫາພາກພື້ນ ແລະ ສາກົນ ທີ່ຕ່າງຝ່າຍຕ່າງມີຄວາມສົນໃຈ.
ໃນຕອນທ້າຍ, ພະນະທ່ານ ພັນຄຳ ວິພາວັນ ຍັງໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ການຊ່ວຍເຫຼືອຂອງລັດຖະບານ ແລະ ປະຊາຊົນຍີ່ປຸ່ນ ໃຫ້ແກ່ ສປປ ລາວ ໃນໄລຍະຜ່ານມາ, ຊຶ່ງເປັນການປະກອບສ່ວນສໍາຄັນ ໃຫ້ແກ່ການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະການສະກັດກັ້ນການແຜ່ລະບາດຂອງພະຍາດ ໂຄວິດ-19 ທີ່ຍັງສືບຕໍ່ເປັນອຸປະສັກຕໍ່ການພັດທະນາເສດຖະກິດ ກໍຄືການດໍາລົງຊີວິດຂອງປະຊາຊົນໃນທົ່ວໂລກ ແລະ ອວຍພອນໃຫ້ ພະນະທ່ານ ຊູງະ ໂຢຊິຮິເດະ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ອັນມີກຽດຂອງພະນະທ່ານ.