ໃນຕອນເຊົ້າຂອງວັນທີ 01 ທັນວາ 2021, ສະຖາບັັນການຕ່າງປະເທດ, ກະຊວງການຕ່າງປະເທດ ໄດ້ຈັັດ ພິທີເປີດຕົວປື້ມ “60 ປີ ການພົວພັນການທູດ ລາວ-ຈີນ” ຢ່າງເປັນທາງການ ພາຍໃຕ້ການເປັນປະທານຂອງ ທ່ານ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ລັດຖະມົນຕີກະຊວງການຕ່າງປະເທດ, ໃຫ້ກຽດເຂົ້າຮ່ວມພິທີດັ່ງກ່າວໂດຍຄະນະນຳກະຊວງການຕ່າງປະເທດ, ຄະນະບັນນາທິການກິດຕິມະສັກທີ່ປະກອບດ້ວຍທ່ານ ສົມສະຫວາດ ເລັ່ງສະຫວັດ, ທີ່ປຶກສາຄະນະບໍລິຫານງານສູນກາງພັກ, ອະດີດກໍາມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, , ທ່ານ ວິຈິດ ຊິນດາວົງ, ອະດີດຮອງປະທານຄະນະກໍາມະການຮ່ວມມືລາວ-ຈີນ, ອະດີດເອກອັກຄະລັດຖະທູດ ແຫ່ງ ສປປ ລາວ ປະຈໍາ ສປ ຈີນ, ຜູ້ຕ່າງໜ້າຈາກຄະນະພົວພັນຕ່າງປະ ເທດສູນກາງພັກ, ຄະນະກໍາມະການຮ່ວມມື ລາວ-ຈີນ, ສະມາຄົມມິດຕະພາບລາວ-ຈີນ, ຫົວໜ້າກົມ, ຮອງກົມພາຍໃນກະຊວງການຕ່າງປະເທດ, ຄະນະສະຖາບັນການຕ່າງປະເທດ ເຂົ້າຮ່ວມລວມທັງໝົດ 40 ທ່ານ.

ພິທີເປີດຕົວປຶ້ມ “60 ປີ ການພົວພັນການທູດ ລາວ-ຈີນ” ແມ່ນໜຶ່ງໃນກິດຈະກໍາເພື່ອປະກອບສ່ວນເຂົ້າໃນການສ້າງຂະບວນການສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ລາວ- ຈີນ ຄົບຮອບ 60 ປີ (25 ເມສາ 1961-25 ເມສາ 2021), ປີມິິດຕະພາບ ລາວ-ຈີນ ພ້ອມທັງເປັນການສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 46 ປີ ແລະ ການເປີດນໍາໃຊ້ເສັ້ນທາງລົດໄຟທີ່ທັນສະໄໝຂອງ ລາວ-ຈີນ ທີ່ີມີຄວາມໝາຍທາງດ້ານປະຫວັດສາດ. ປຶ້ມດັ່ງກ່າວ ແມ່ນຜົນງານການຮຽບຮຽງຂອງສະຖາບັນການຕ່າງປະເທດ ທີ່ໄດ້ສັງລວມເອົາບັນດາໝາກຜົນ ແລະ ຜົນງານອັນໂດດເດັ່ນຂອງການພົວພັນ ແລະ ຮ່ວມມື ລາວ-ຈີນ ໃນຂະແໜງການຕ່າງໆຂອງທັງສອງພັກ-ສອງລັດ, ສະພາແຫ່ງຊາດ ແລະ ສາມອົງການຈັດຕັ້ງມະຫາຊົນໃນໄລຍະກ່ອນ ແລະ ຫຼັງສະຖາປະນາ ສປປ ລາວ, ເຊິ່ງໄດ້ຮັບການຊຸກຍູ້ສົ່ງເສີມໃຫ້ກ້າວເຂົ້າສູ່ລວງເລິກ ແລະ ລວງກວ້າງຢ່າງບໍ່ຢຸດຢັ້ງ ທັງໃນຂອບສອງຝ່າຍ ແລະ ຫຼາຍຝ່າຍ ບົນພື້ນຖານມູນເຊື້ອການພົວພັນຮ່ວມມືອັນດີລະຫວ່າງ ລາວ-ຈີນ, ການເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ ແລະ ການສ້າງຄູ່ຮ່ວມຊະຕາກໍາລາວ-ຈີນ, ຈີນ-ລາວ.

ປຶ້ມ “60 ປີ ການພົວພັນການທູດ ລາວ-ຈີນ” ໄດ້ເລີ່ມລົງມືຄົ້ນຄວ້າຮຽບຮຽງມາແຕ່ທ້າຍປີ 2020, ພາຍໃຕ້ຄວາມເອົາໃຈໃສ່ຊີ້ນໍາຢ່າງໃກ້ຊິດຈາກຄະນະນໍາກະຊວງການຕ່າງປະເທດ ກໍຄື ຄະນະບັນນາທິການກິດຕິມະສັກ, ນັກການທູດອາວຸໂສ ແລະ ຄະນະບັນນາທິການຂອງສະຖາບັນການຕ່າງປະເທດທີ່ມີປະສົບການ ແລະ ເຄີຍເຮັດວຽກຕົວຈິງໃນການສົ່ງເສີມການພົວພັນຮ່ວມມື ລາວ-ຈີນ ໃນໄລຍະຜ່ານມາ, ໂດຍໄດ້ຮັບການຮ່ວມມືຈາກບັນດາກະຊວງ, ອົງການຈັດຕັ້ງທີ່ກ່ຽວຂ້ອງໃນການສະໜອງຂໍ້ມູນຕ່າງໆ. ການຈັດພິມປື້ມ “60 ປີ ການພົວພັນການທູດ ລາວ-ຈີນ” ໃນຄັ້ງນີ້ ແມ່ນໄດ້ຮັບການສະໜັບສະໜູນທາງດ້ານງົບປະມານຈາກສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ໃນຂອບຂອງໂຄງການຄົ້ນຄວ້າຮ່ວມ ລາວ-ຈີນ ທີ່ມີໜ່ວຍງານຕັ້ງຢູ່ສະຖາບັນການຕ່າງ ປະເທດ ສົມທົບກັບງົບປະມານຂອງກະຊວງການຕ່າງປະເທດ ເຊິ່ງເຮັດໃຫ້ການຮຽບຮຽງເນື້ອໃນຂອງປຶ້ມດັ່ງກ່າວ ມີຜົນສຳເລັດຢ່າງຈົບງາມ ແລະ ສາມາດຈັດພິມຄັ້ງທໍາອິດ ຈໍານວນ 1.000 ຫົວ ອອກສູ່ສາຍຕາຜູ້ອ່ານ. ປຶ້ມຫົວດັ່ງ ກ່າວ ຈະເປັນແຫຼ່ງຂໍ້ມູນທີ່ເປັນປະໂຫຍດສໍາລັບນັກການທູດ, ນັກຄົ້ນຄວ້າ, ນັກຮຽນຮູ້ປັນຍາຊົນ ກໍຄື ຜູ້ອ່ານທົ່ວໄປທີ່ມີຄວາມສົນໃຈ ກ່ຽວກັບປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງການພົວພັນ ລາວ-ຈີນ ແນໃສ່ເປັນບ່ອນອີງທີ່ສໍາຄັນໃນການສຶກສາ ແລະ ຄົ້ນຄວ້າວິໃຈ ເພື່ອສົ່ງເສີມການພົວພັນຮ່ວມມືລາວ-ຈີນ ໃນຕໍ່ໜ້າ.

ໃນໂອກາດທີ່ມີຄວາມໝາຍສຳຄັນນີ້, ຍັງໄດ້ມີການເປີດຕົວປຶ້ມ “ການເຊື່ອມໂຍງຂອງສອງຊາດ ໂດຍຜ່ານເສັ້ນທາງລົດໄຟລາວ-ຈີນ” ຢ່າງເປັນທາງການ, ເຊິ່ງແມ່ນຜົນງານການຄົ້ນຄວ້າຮຽບຮຽງ ຂອງໜ່ວຍງານຄົ້ນຄວ້າ, ໂຄງການຄົ້ນຄວ້າຮ່ວມລາວ-ຈີນ ທີ່ໄດ້ຄົ້ນຄວ້າ-ວິໄຈ ຜົນປະໂຫຍດດ້ານຕ່າງໆທີ່ຈະໄດ້ຮັບຈາກການນຳໃຊ້ເສັ້ນທາງລົດໄຟ, ພ້ອມດຽວກັນນັ້ນ ຍັງໄດ້ສຶກສາກ່ຽວກັບການກະກຽມຄວາມພ້ອມດ້ານຕ່າງໆຂອງ ສປປ ລາວ ໂດຍສະເພາະແມ່ນບາງແຂວງທີ່ມີເສັ້ນທາງລົດໄຟແລ່ນຜ່ານທັງໃນໄລຍະກ່ອນ ແລະ ຫລັງເປີດນຳໃຊ້ເສັ້ນທາງລົດໄຟ ເພື່ອນຳເອົາຜົນປະໂຫຍດອັນສູງສຸດມາສູ່ ສປປ ລາວໃນການເຊື່ອມໂຍງ-ເຊື່ອມຈອດກັບພາກພື້ນ ແລະ ສາກົນ.