ກອງປະຊຸມປຶກສາຫາລືດ້ານການເມືອງ ຂັ້ນລັດຖະມົນຕີ ລະຫວ່າງ ສອງກະຊວງການຕ່າງປະເທດ ລາວ ແລະ ຫວຽດນາມ ຄັ້ງທີ 8

 ກອງປະຊຸມສາມັນປະຈຳປີ ຄັ້ງທີ XXXI ລະຫວ່າງ ຄະນະຜູ້ແທນຊາຍແດນ ລາວ-ຫວຽດນາມ

 ກອງປະຊຸມສະຫຼຸບການຈັດຕັ້ງ​ປະຕິບັດການເຮັດທົດລອງຮູບແບບກວດກາ “ປະຕູດຽວ, ຄັ້ງດຽວ” ຢູ່ຄູ່ດ່ານສາກົນແດນສະຫວັນ (ສະຫວັນນະເຂດ) - ລາວບາວ (ກວາງຈິ)

ໂດຍຕອບ​ສະ​ໜອງ​ຕາມ​ຄຳ​ເຊີນ​ຂອງ ສະ​ຫາຍ ບຸ່ຍ ແທັງ ເຊີນ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແຫ່ງ ສາ​ທາ​ລະ​ນະ​ລັດ ສັງ​ຄົມ​ນິ​ຍົມ ຫວຽດ​ນາມ, ສະ​ຫາຍ ສະເຫຼີມໄຊ ກົມມະສິດ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແຫ່ງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ໄດ້ນໍາພາ​ຄະ​ນະຜູ້​ແທນ ​​ກະ​ຊວງ​ການ​ຕ່າງ​ປະ​ເທດ ເດີນ​ທາງ​ຢ້ຽມ​ຢາມ​ ສສ ຫວຽດນາມ ຢ່າງ​ເປັນທາງ​ການ ໃນລະຫວ່າງວັນ​ທີ 27-29 ທັນ​ວາ 2021. ຈຸດປະສົງຂອງການຢ້ຽມຢາມ ສສ ຫວຽດນາມ ໃນຄັ້ງນີ້ ແມ່ນເພື່ອ​ເສີມ​ຂະ​ຫຍາຍ ແລະ ຮັດ​ແໜ້ນການພົວພັນຮ່ວມມື ລະຫວ່າງສອງກະຊວງການຕ່າງປະເທດ ລາວ ແລະ ຫວຽດນາມ ກໍ່ຄື ສາຍ​ພົວ​ພັນ​ມິດ​ຕະ​ພາບ​ອັນຍິ່ງໃຫຍ່, ຄວາມ​ສາ​ມັກ​ຄີ​ພິ​ເສດ ແລະ ການ​ຮ່ວມ​ມືຮອບ​ດ້ານ ລະ​ຫວ່າງ ລາວ ແລະ ຫວຽດນາມ ໃຫ້​ແໜ້ນ​ແຟ້ນ​ຍິ່ງໆ​ຂຶ້ນ.

ໃນວັນທີ 28 ທັນວາ 2021, ທີ່ ນະຄອນຫຼວງຮ່າໂນ້ຍ ໄດ້ມີກອງປະຊຸມປຶກສາຫາລືດ້ານການເມືອງ ຂັ້ນລັດຖະມົນຕີ ລະຫວ່າງ ສອງກະຊວງການຕ່າງປະເທດ ລາວ ແລະ ຫວຽດນາມ ຄັ້ງທີ 8 ໂດຍການເປັນປະທານຮ່ວມຂອງ ສະຫາຍ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ສະຫາຍ ບຸ່ຍ ແທັງ ເຊີນ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແຫ່ງ ສສ ຫວຽດນາມ ແລະ ມີຄະນະຜູ້ແທນຈາກ​ບັນດາ​ກົມ​ກ່ຽວຂ້ອງຂອງ​ສອງ​ກະຊວງ​ການ​ຕ່າງປະ​ເທດ​ເຂົ້າຮ່ວມ. ໃນໂອກາດນີ້, ສະຫາຍ ສະເຫຼີມໄຊ ກົມມະສິດ ໄດ້ຕາງໜ້າໃຫ້ຄະນະຜູ້ແທນລາວ ສະແດງຄວາມຂອບໃຈ ຕໍ່ສະຫາຍ ບຸ່ຍ ແທັງ ເຊີນ ກໍ່ຄືການນໍາ ແລະ ພະນັກງານກະຊວງການຕ່າງປະເທດ ຫວຽດນາມ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້. ສອງຝ່າຍ ໄດ້ທົບທວນຄືນການພົວພັນຮ່ວມມືຂອງສອງປະເທດ ລາວ-ຫວຽດນາມ ເວົ້າລວມກໍ່ຄື ການຮ່ວມມື ລະຫວ່າງ ສອງກະຊວງການຕ່າງປະເທດ ລາວ-ຫວຽດນາມ ໃນໄລຍະ 1 ປີຜ່ານມາ, ຊຶ່ງສອງຝ່າຍໄດ້ຕີ​ລາ​ຄາ​ສູງ​ ຕໍ່​ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງ​ປະ​ເທດລາວ-ຫວຽດ​ນາມທີ່ໄດ້​ຮັບ​ການເສີມ​ຂະ​ຫຍາຍຢ່າງ​ບໍ່​ຢຸດ​ຢັ້ງ ໄປ​ສູ່​ລວງ​ເລິກ ແລະ ລວງກວ້າງ ໃນ​ທຸກ​ຂົງ​ເຂດວຽກງານ ບໍ່ວ່າຈະເປັນທາງດ້ານການເມືອງ, ການຕ່າງປະເທດ, ການປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ, ການຄ້າ, ການລົງທຶນ, ການສຶກສາ, ສາທາລະນະສຸກ, ວັດທະນະທໍາ-ສັງຄົມ ແລະ ດ້ານອື່ນໆ. ພ້ອມນີ້, ສອງຝ່າຍຍັງໄດ້ປຶກສາຫາລືກ່ຽວກັບການພົວພັນຮ່ວມມືໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໂດຍການສືບຕໍ່ຊຸກຍູ້ການຈັດຕັ້ງຜັນຂະຫຍາຍບັນດາຂໍ້ລິເລີ່ມຂອງອາຊຽນ ເພື່ອຮັບມືກັບພະຍາດໂຄວິດ-19, ລວມເຖິງການພື້ນຟູເສດຖະກິດພາຍຫຼັງການເປີດປະເທດ, ຊຶ່ງ ສະຫາຍ ສະເຫຼີມໄຊ ກົມມະສິດ ໄດ້ຖືໂອກາດນີ້ ຕາງໜ້າໃຫ້ ພັກ-ລັດ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ມາຍັງພັກ-ລັດ ແລະ ປະຊາຊົນຫວຽດນາມອ້າຍນ້ອງ ເຖິງແມ່ນວ່າຈະພົບຄວາມຫຍຸ້ງຍາກຈາກການແຜ່ລະບາດຂອງພະຍາດໂຄວິດ-19 ເຊັ່ນດຽວກັນ ແຕ່ກໍໄດ້ບິແບ່ງການຊ່ວຍເຫຼືອອັນລໍ້າຄ່າ ດ້ວຍການສົ່ງທີມແພດໝໍ ແລະ ອຸປະກອນການແພດ ມາຊ່ວຍ ສປປ ລາວ, ພ້ອມທັງໄດ້ແຈ້ງໃຫ້ຝ່າຍຫວຽດນາມຊາບ ກ່ຽວກັບ ແຜນການເປີດປະເທດຂອງ ສປປ ລາວ ໂດຍສະເພາະການເປີດຮັບນັກທ່ອງທ່ຽວ ພາຍໃຕ້ການທ່ອງທ່ຽວສີຂຽວ ໃນຕົ້ນປີ 2022 ນີ້. ນອກນີ້, ສອງຝ່າຍຍັງໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນ ກ່ຽວກັບ ສະພາບການພົ້ນເດັ່ນໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ, ພ້ອມທັງໄດ້ປຶກສາຫາລືເພື່ອສືບຕໍ່ເພີ່ມທະວີການພົວພັນຮ່ວມມື ແລະ ສະໜັບສະໜູນຊຶ່ງກັນ ແລະ ກັນ ໃນຂອບສອງຝ່າຍ ແລະ ຫຼາຍຝ່າຍ ເປັນຕົ້ນແມ່ນໃນຂອບການຮ່ວມມືຂອງ ສປຊ, ອາຊຽນ, CLV, CLMV, ACMECS, ອາເຊັມ, ໜຶ່ງແລວ ໜຶ່ງເສັ້ນທາງ ແລະ ການຮ່ວມມືໃນຂອບອື່ນໆ.

ສອງຝ່າຍ ຍັງຢືນຢັນຈະສືບຕໍ່ຮ່ວມມືກັນຢ່າງໃກ້ຊິດ ແນໃສ່ຍົກສູງກົນໄກການຮ່ວມມື ລະຫວ່າງສອງກະຊວງການຕ່າງປະເທດ ລາວ ແລະ ຫວຽດນາມ ໃຫ້ນັບມື້ນັບມີປະສິດທິຜົນ ໃນຖານະທີ່ເປັນເສນາທິການໃຫ້ການນໍາຂັ້ນສູງຂອງສອງປະເທດ ແລະ ທັງເປັນຫົວຈັກຫຼັກແຫຼ່ງໃນການຊຸກຍູ້ສົ່ງເສີມ ການພົວພັນຮ່ວມມືລະຫວ່າງສອງປະທດ. ໃນ ປີ 2022 ນີ້ ສອງຝ່າຍເຫັນດີເພີ່ມທະວີໃນການພົວພັນຮ່ວມມືເພື່ອຮ່ວມກັນຈັດບັນດາກິດຈະກໍາສະເຫຼີມສະຫຼອງຕ່າງໆ ເນື່ອງໃນໂອກາດປີແຫ່ງການສະເຫຼີມສະຫຼອງສອງວັນປະຫວັດສາດ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ (18/7/1977-18/7/2022), ວັນສ້າງຕັ້ງສາຍພົວພັນການທູດ ລະຫວ່າງ ລາວ ແລະ ຫວຽດນາມ ຄົບຮອບ 60 ປີ (5/9/1962-5/9/2022), ພ້ອມນີ້ກໍ່ຍັງຈະເປັນປີສາມັກຄີມິດຕະພາບ ລາວ-ຫວຽດນາມ ຕື່ມອີກ. ນອກນີ້, ກອງປະຊຸມຍັງໄດ້ປຶກສາຫາລືກັນ ກ່ຽວກັບ ບັນດາທິດທາງແຜນການຮ່ວມມືໃນຕໍ່ໜ້າຂອງສອງກະຊວງການຕ່າງປະເທດ ເປັນຕົ້ນ ການສືບຕໍ່ຈັດຕັ້ງປະຕິບັດຂໍ້ຕົກລົງຮ່ວມມືທີ່ມີຮ່ວມກັນ ລະຫວ່າງ ສອງກະຊວງການຕ່າງປະເທດ ໃຫ້ປະກົດຜົນເປັນຮູບປະທໍາ ທັງການຄົ້ນຄວ້າເອກະສານຕ່າງໆ, ການສ້າງນາຍແປພາສາ, ການຝຶກອົບຮົມນັກການທູດ ແລະ ອື່ນໆ; ສືບຕໍ່ຈັດຕັ້ງປະຕິບັດ ແຜນປະຕິບັດງານ ວ່າດ້ວຍ ການສົ່ງເສີມການທູດເສດຖະກິດ ລະຫວ່າງ ລາວ ແລະ ຫວຽດນາມ ໃຫ້ປະກົດຜົນເປັນຈິງ ແລະ ສາມາດສືບຕໍ່ຈັດຕັ້ງປະຕິບັດໄດ້ຢ່າງເປັນປົກກະຕິ; ຊຸກຍູ້ໃຫ້ມີການປັບປຸງບາງນິຕິກໍາທາງດ້ານວຽກງານກົງສຸນສອງຝ່າຍ ເພື່ອກະກຽມໃຫ້ແກ່ການເປີດປະເທດໃນອະນາຄົດ ໃນສະພາບການແຜ່ລະບາດຂອງພະຍາດໂຄວິດ-19; ຊຸກຍູ້ເພີ່ມທະວີການເຮັດວຽກເສນາທິການໃຫ້ດີຂຶ້ນ ໃນການຕິດຕາມຊຸກຍູ້ ແກ້ໄຂຂໍ້ຫຍຸ້ງຍາກຂອງການພົວພັນຮ່ວມມືສອງຝ່າຍຂອງສອງປະເທດ ໃຫ້ໄດ້ຮັບຜົນສໍາເລັດຢ່າງເປັນຮູບປະທໍາຍິ່ງໆຂຶ້ນ. ພ້ອມດຽວກັນນີ້, ສອງຝ່າຍຍັງປຶກສາຫາລື ເພື່ອກະກຽມໃຫ້ແກ່ ກອງປະຊຸມປຶກສາຫາລືດ້ານການເມືອງ ຂັ້ນລັດຖະມົນຕີ ລະຫວ່າງ ສອງກະຊວງການຕ່າງປະເທດ ລາວ ແລະ ຫວຽດນາມ ຄັ້ງຕໍ່ໄປ ທີ່ຈະຈັດຂຶ້ນຢູ່ທີ່ ສປປ ລາວ, ໃນປີ 2022.

ໃນຕອນເຊົ້າຂອງວັນທີ 29 ທັນວາ 2021, ໄດ້ມີກອງປະຊຸມສາມັນປະຈຳປີ ຄັ້ງທີ XXXI ລະຫວ່າງ ຄະນະຜູ້ແທນຊາຍແດນ ລາວ-ຫວຽດນາມ, ຊຶ່ງຄະນະຜູ້ແທນຊາຍແດນຝ່າຍລາວ ນຳໂດຍ ສະຫາຍ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນ ລາວ-ຫວຽດນາມ ແລະ ຝ່າຍຫວຽດນາມ   ນຳໂດຍ ສະຫາຍ ຫງວຽນ ມິງ ຫວູ, ຮອງລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນ ຫວຽດນາມ-ລາວ. ເຂົ້າຮ່ວມກອງປະຊຸມຄັ້ງນີ້ ຍັງມີທ່ານຜູ້ຕາງໜ້າ ຈາກຂະແໜງການທີ່ກ່ຽວຂ້ອງຂອງສູນກາງ ແລະ ທ້ອງຖິ່ນຂອງສອງປະເທດເຂົ້າຮ່ວມ. ກອງປະຊຸມ ໄດ້ສະຫຼຸບຕີລາຄາການຈັດຕັ້ງປະຕິບັດບົດບັນທຶກກອງປະຊຸມຄະນະຜູ້ແທນຊາຍແດນ ລາວ-ຫວຽດນາມ ຄັ້ງທີ XXX ໃນໜຶ່ງປີຜ່ານມາ, ຊຶ່ງສອງຝ່າຍໄດ້ສັງເກດຕີລາຄາຄືນດ້ານຕັ້ງໜ້າ ແລະ ດ້ານຫຍໍ້ທໍ້ຕ່າງໆ ກ່ຽວກັບ ວຽກງານການຄຸ້ມຄອງຊາຍແດນ, ການພັດທະນາເສດຖະກິດ, ການຄ້າ, ການທ່ອງທ່ຽວຊາຍແດນ ແລະ ການເຊື່ອມຕໍ່ເສັ້ນທາງຄົມມະນາຄົມ. ກອງປະຊຸມຄັ້ງນີ້ສອງຝ່າຍໄດ້ຕີລາຄາສູງ ຕໍ່ການປະຕິບັດໜ້າທີ່ຂອງອົງການຊາຍແດນ ແລະ ເຈົ້າໜ້າທີ່ຊາຍແດນນັບແຕ່ຂັ້ນສູນກາງລົງຮອດທ້ອງຖິ່ນ ທີ່ໄດ້ເປັນເຈົ້າການປະກອບສ່ວນຢ່າງຕັ້ງໜ້າເຂົ້າໃນວຽກງານຄຸ້ມຄອງຄວາມເປັນລະບຽບຮຽບຮ້ອຍຢູ່ຕາມບໍລິເວນຊາຍແດນຂອງສອງປະເທດ ເຮັດໃຫ້ເສັ້ນຊາຍແດນກາຍເປັນຊາຍແດນ ແຫ່ງສັນຕິພາບ, ມິດຕະພາບ ແລະ ການຮ່ວມມືພັດທະນາແບບຍືນຍົງຕະຫລອດການ. ພ້ອມກັນນີ້, ສອງຝ່າຍຍັງໄດ້ເປັນເອກະພາບກັນວາງທິດທາງແຜນການໃນການຈັດຕັ້ງປະຕິບັດວຽກງານຊາຍແດນໃນຕໍ່ໜ້າ, ບົນພື້ນຖານການປະຕິບັດບັນດາມາດຕະການປ້ອງກັນການລະບາດຂອງພະຍາດໂຄວິດ-19, ໂດຍຈະສຸມໃສ່ວຽກງານໂຄສະນາເຜີຍແຜ່ລະບຽບກົດໝາຍກ່ຽວກັບການຄຸ້ມຄອງຊາຍແດນ; ການປົກປັກຮັກສາບຸລະນະຫຼັກໝາຍຊາຍແດນປະເທດ; ການຄຸ້ມຄອງການເຂົ້າ-ອອກຂ້າມຊາຍແດນ; ການປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມຢູ່ເຂດຊາຍແດນ; ການລົງທຶນ ແລະ ການຄ້າຜ່ານດ່ານຊາຍແດນ; ການຄຸ້ມຄອງດ່ານຊາຍແດນ ແລະ ເຊື່ອມຕໍ່ເສັ້ນທາງຄົມມະນາຄົມຜ່ານດ່ານຊາຍແດນ.

ໃນຕອນບ່າຍຂອງວັນດຽວກັນ, ໄດ້ມີກອງປະຊຸມສະຫຼຸບການຈັດຕັ້ງ​ປະຕິບັດການເຮັດທົດລອງຮູບແບບກວດກາ “ປະຕູດຽວ, ຄັ້ງດຽວ” ຢູ່ຄູ່ດ່ານສາກົນແດນສະຫວັນ (ສະຫວັນນະເຂດ) - ລາວບາວ (ກວາງຈິ), ຊຶ່ງຄະນະ​ຜູ້​ແທນ​​ຝ່າຍ​ລາວນຳ​ໂດຍສະຫາຍ ສະ​ເຫຼີ​ມ​ໄຊ ກົມມະ​ສິດ, ລັດ​ຖະມົນຕີ​ກະຊວງ​ການ​ຕ່າງປະ​ເທດ ແຫ່ງ ສປປ ລາວ​ແລະ ຄະນະຜູ້ແທນຝ່າຍ​ຫວຽດນາມນຳ​ໂດຍສະຫາຍ ບຸ່ຍ ແທງ ເຊິນ,ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ,​ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້ຍັງ​ມີ​​​ທ່ານຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງ​ສູນກາງ ແລະ ທ້ອງຖິ່ນຂອງສອງ​ປະ​ເທດເຂົ້າ​ຮ່ວມ. ໃນກອງປະຊຸມ ສອງຝ່າຍເຫັນດີເປັນເອກະພາບກັນວ່າ ການຈັດຕັ້ງປະຕິບັດ ຮູບແບບກວດກາ “ປະຕູດຽວ, ຄັ້ງດຽວ” ຢູ່ຄູ່ດ່ານສາກົນ ແດນສະຫວັນ (ສະຫວັນນະເຂດ) - ລາວບາວ (ກວາງຈິ) ແມ່ນການຕັດສິນໃຈຂອງສອງລັດຖະບານ ເພື່ອແນ່ໃສ່ສ້າງເງື່ອນໄຂອັນສະດວກໃຫ້ແກ່ການນໍາເຂົ້າ-ສົ່ງອອກສິນຄ້າ, ການຄົມມະນາຄົມໄປມາຫາສູ່ ລະຫວ່າງ ປະຊາຊົນສອງຊາດ ແລະ ພາກສ່ວນທຸລະກິດຂອງສອງປະເທດ ກໍ່ຄື ບັນດາປະເທດອະນຸພາກພື້ນແມ່ນໍ້າຂອງໃຫ້ມີຄວາມສະດວກວ່ອງໄວ ແລະ ທັງ​ເປັນ​ການ​ປະ​ຕິ​ບັດ​ຍຸດ​ທະ​ສາດແລວທາງເສດຖະກິດຕາເວັນອອກ-ຕາເວັນຕົກ, ໝູນໃຊ້ທ່າແຮງທີ່ເປັນຈຸດໃຈກາງຂອງສູນກາງອາຊຽນໃຫ້ກາຍເປັນແລວທາງເສດ​ຖະ​ກິດຂອງພາກພື້ນ. ຄູ່ດ່ານສາກົນ ແດນສະຫວັນ (ສະຫວັນນະເຂດ) - ລາວບາວ (ກວາງຈິ) ແມ່ນຄູ່ດ່ານສາກົນ ແຫ່ງທໍາອິດ ໃນຈໍານວນ 7 ຄູ່ດ່ານທີ່ໄດ້ຍົກຂຶ້ນໃນສົນທິສັນຍາ ກ່ຽວກັບການສ້າງເງື່ອນໄຂສະດວກໃຫ້ແກ່ການຂົນສົ່ງສິນຄ້າ ແລະ ຜູ້ຄົນໃນການໄປມາຂ້າມຜ່ານຊາຍແດນລະຫວ່າງບັນດາປະເທດ ໃນຂົງເຂດອານຸພາກພື້ນລຸ່ມແມ່ນໍ້າຂອງ (ເອີ້ນຫຍໍ້ວ່າສັນຍາ GMS-CBTA) ກໍ່​ຄື ການຈັດຕັ້ງປະຕິບັດຮູບແບບກວດກາ “ປະຕູດຽວ, ຄັ້ງດຽວ”ຢູ່ຄູ່ດ່ານ ສາກົນແດນສະຫວັນ (ສະຫວັນນະເຂດ) - ລາວບາວ (ກວາງຈິ). ວຽກງານດັ່ງກ່າວນີ້ແມ່ນມີຄວາມໝາຍຄວາມສໍາຄັນຢ່າງຍິ່ງ, ທັງເປັນໜ້າທີ່ຄວາມຮັບຜິດຊອບຂອງບັນດາປະເທດທີ່ໄດ້ລົງນາມໃນສັນຍາ GMS-CBTA ຊຶ່ງເປັນການປະຕິຮູບວິທີການດຳເນີນເອກະສານຂົງເຂດພາສີ, ພ້ອມທັງເປັນການ​ຖອດ​ຖອນບົດ​ຮຽນການ​ຈັດ​ຕັ້ງ​ປະ​ຕິ​ບັດຮູບແບບກວດກາ “ປະຕູດຽວ, ຄັ້ງດຽວ” ດັ່ງ​ກ່າວນີ້ ເພື່ອ​ນຳ​ໄປ​ຈັດ​ຕັ້ງ​ປະ​ຕິ​ບັດຢູ່ບັນດາດ່ານຊາຍແດນອື່ນໆ ໃນຂັ້ນຕໍ່ໄປ. ເຖິງ​ແມ່ນ​ວ່າການຈັດຕັ້ງປະຕິບັດ​ຕົວ​ຈິງໃນ​ໄລ​ຍະ​ຜ່ານ​ມາຍັງພົບຄວາມຫຍຸ້ງຍາກ ແລະ ອຸປະສັກ​ບາງ​ປະ​ການ ໂດຍ​ສະ​ເພາະ​ແມ່ນ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19, ແຕ່ສອງຝ່າຍ​ກໍໄດ້ເອ​ກະ​ພາບ​ກັນ ຈະ​ສືບ​ຕໍ່ເອົາໃຈໃສ່ຮ່ວມມືກັນຢ່າງ     ສະໜິດແໜ້ນ ນັບແຕ່ລະດັບສູນກາງລົງຮອດຂັ້ນທ້ອງຖິ່ນ ເພື່ອແນ່ໃສ່ປັບ​ປຸງ​ຮູບ​ແບບ​ການກວດ​ກາ​ດັ່ງ​ກ່າວ​ໃຫ້​ແທດ     ​ເໝາະ​ກັບ​ສະ​ພາບ​ຕົວ​ຈິງໃນອະນາຄົດ ໂດຍ​ສະ​ເພາະການຊອກຫາວິທີທາງໃນການແກ້ໄຂຂໍ້ຄົງຄ້າງທີ່ມີໃນປັດຈຸບັນ, ປັບປຸງຮູບແບບທີ່ເໝາະສົມທີ່ສຸດໃຫ້ແກ່ຈຸດພິເສດ ແລະ ສະພາບຂອງຄູ່ດ່ານສາກົນ ແດນສະຫວັນ (ສະຫວັນນະເຂດ) - ລາວບາວ (ກວາງຈິ), ລົງນາມສົນທິສັນຍາລະດັບລັດຖະບານ ກ່ຽວກັບ ການຈັດຕັ້ງປະຕິບັດຮູບແບບກວດກາ “ປະຕູດຽວ, ຄັ້ງດຽວ” ຢູ່ຄູ່ດ່ານສາກົນ ແດນສະຫວັນ (ສະຫວັນນະເຂດ) - ລາວບາວ (ກວາງຈິ), ພ້ອມທັງເພີ່ມການລົງທຶນດ້ານພື້ນຖານໂຄງລ່າງ, ປະກອບເຄື່ອງມືອຸປະກອນຮັບໃຊ້ທີ່ທັນສະໄໝ ເພື່ອຍົກລະດັບການຈັດຕັ້ງປະຕິບັດໂຄງການດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນ.

ທັງ 3 ກອງປະຊຸມດັ່ງກ່າວ ໄດ້ຈັດຂຶ້ນໃນທ່າມກາງບັນຍາກາດ ແຫ່ງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຊຶ່ງໄດ້ຮັບການເພີ່ມພູນຄູນສ້າງ ແລະ ຂະຫຍາຍຕົວເຂົ້າສູ່ລວງເລິກ ແລະ ລວງກວ້າງຢ່າງບໍ່ຢຸດຢັ້ງ.