ໃນຕອນເຊົ້າຂອງວັນທີ 27 ມິຖຸນາ 2022, ທີ່ ກະຊວງການຕ່າງປະເທດ, ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ຮັນ ດົງ ແມນ (Han Dong-man), ທູດພິເສດຂອງລັດຖະມົນຕີຕ່າງປະເທດ ແຫ່ງ ສາທາລະນະລັດ ເກົາຫຼີ, ໃນໂອກາດເດີນທາງມາຢ້ຽມຢາມເຮັດວຽກຢູ່ ສປປ ລາວ ໃນລະຫວ່າງວັນທີ 25-28 ມິຖຸນາ 2022.

ໃນໂອກາດດັ່ງກ່າວ, ພະນະທ່ານຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ທ່ານທູດພິເສດຂອງລັດຖະມົນຕີຕ່າງປະເທດ ແຫ່ງ ສ. ເກົາຫຼີ ແລະ ຄະນະ ທີ່ໄດ້ເດີນທາງມາຢ້ຽມຢາມເຮັດວຽກຢູ່ ສປປ ລາວ ໃນຄັ້ງນີ້, ພ້ອມທັງ ສະແດງຄວາມຊົມເຊີຍໄປຍັງລັດຖະບານ ແຫ່ງ ສ.ເກົາຫຼີ ທີ່ໄດ້ສຳເລັດການແຕ່ງຕັ້ງບັນດາຄະນະລັດຖະມົນຕີ ຊຸດໃຫມ່ ໃນເດືອນຜ່ານມາ ແລະ ຖືໂອກາດນີ້, ສະແດງຄວາມຍິນດີຊົມເຊີຍ ໄປຍັງ ທ່ານ ປາກ ຈິນ (Park Jin), ໃນໂອກາດທີ່ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງເປັນ ລັດຖະມົນຕີຕ່າງປະເທດ ແຫ່ງ ສ.ເກົາຫຼີ ຄົນໃຫມ່. ພ້ອມດຽວກັນນີ້, ສອງຝ່າຍ ກໍ່ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ທີ່ສືບຕໍ່ນັບມື້ໄດ້ຮັບການຂະຫຍາຍຕົວຢ່າງຕໍ່ເນື່ອງ, ພາຍຫຼັງທີ່ສອງປະເທດ ໄດ້ສ້າງຕັ້ງສາຍພົວພັນການຮ່ວມນຳກັນ ແຕ່ວັນທີ 25 ຕຸລາ 1995 ເປັນຕົ້ນມາ, ພິເສດໃນປີ 2020 ຜ່ານມາ ສອງປະເທດ ໄດ້ຮ່ວມກັນຈັດບັນດາກິດຈະກຳເພື່ອສະເຫຼີມສະຫຼອງ ວັນຄົບຮອບ 25 ປີ ແຫ່ງການສ້າງຕັ້ງສາຍພົວພັນການທູດ ລາວ-ສ.ເກົາຫຼີ ຢ່າງມີຜົນສຳເລັດ, ການນຳຂັ້ນສູງຂອງສອງປະເທດ ໄດ້ມີການພົບປະແລກປ່ຽນການຢ້ຽມຢາມເຊິ່ງກັນ ແລະ ກັນ ໃນໄລຍະຜ່ານມາ, ບັນດາຂະແໜງການຮ່ວມມືຕ່າງໆ ສືບຕໍ່ມີບາດກ້າວຂະຫຍາຍຕົວຕໍ່ເນື່ອງ ເປັນຕົ້ນ ການຄ້າ-ການລົງທຶນ, ການທ່ອງທ່ຽວ, ການພັດທະນາຊັບພະຍາກອນມະນຸດ, ສາທາລະນະສຸກ, ການພັດທະນາພື້ນຖານໂຄງລ່າງ ແລະ ອື່ນໆ, ລວມທັງ ການຮ່ວມມືໃນຂອບອາຊຽນ, ຂອບການຮ່ວມມືແມ່ນ້ຳຂອງ-ສ.ເກົາຫຼີ ແລະ ຂອບການຮ່ວມມືຢູ່ ສະຫະປະຊາຊາດ. ເຊິ່ງທັງຫມົດນັ້ນ ໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຢູ່ ສປປ ລາວ ຢ່າງມີຜົນສຳເລັດເປັນແຕ່ລະໄລຍະ. ນອກຈາກນີ້, ສອງຝ່າຍ ຍັງແລກປ່ຽນຄໍາຄິດເຫັນ ກ່ຽວກັບ ສະພາບການພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ໃນຕອນທ້າຍ, ພະນະທ່ານຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ສະເຫຼີມໄຊ ກົມມະສິດ ສະແດງຄວາມຂອບໃຈຕໍ່ ລັດຖະບານ ສ.ເກົາຫຼີ ທີ່ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນໄລຍະຜ່ານມາ, ໂດຍສະເພາະ ການຊ່ວຍເຫຼືອ ສປປ ລາວ ໃນການຮັບມືກັບການແຜ່ລະບາດຂອງພະຍາດໂຄວິດ-19 ໃນໄລຍະຜ່ານມາ ແລະ ຫວັງຢ່າງຍິ່ງວ່າ ສອງຝ່າຍ ຈະສືບຕໍ່ໃຫ້ການສະໜັບສະໜູນຊຶ່ງກັນ ແລະ ກັນ ທັງໃນຂອບສອງຝ່າຍ ແລະ ຫຼາຍຝ່າຍ ໃນເວທີພາກພື້ນ ແລະ ສາກົນ ໃນອະນາຄົດ. ພ້ອມນີ້, ກໍ່ອວຍພອນໃຫ້ຄະນະຜູ້ແທນ ສ.ເກົາຫຼີ ຈົ່ງປະສົບຜົນສຳເລັດໃນການເດີນທາງມາຢ້ຽມຢາມເຮັດວຽກຢູ່ ສປປ ລາວ ໃນຄັ້ງນີ້.