ໃນວັນທີ 23 ກັນຍາ 2022 ທີ່ ນະຄອນນິວຢອກ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ສືບຕໍ່ນຳພາຄະນະຜູ້ແທນແຫ່ງ ສປປ ລາວ ເຂົ້າຮ່ວມກອງປະຊຸມສະມັດຊາໃຫຍ່ ອົງການສະຫະປະຊາຊາດ ສະໄໝທີ 77 ແລະ ກອງປະຊຸມຂອງກຸ່ມປະເທດ 77 ແລະ ສປ. ຈີນ (G77 and China Ministerial Meeting) ເພື່ອປຶກສາຫາລືກ່ຽວກັບການກຳນົດແນວທາງ ແລະ ຍຸດທະສາດ ໃນການຍາດແຍ່ງການຊ່ວຍເຫຼືອ ແລະ ປົກປ້ອງຜົນປະໂຫຍດລວມຂອງກຸ່ມປະເທດກຳລັງພັດທະນາ ໃນຂອບອົງການສະຫະປະຊາຊາດ ກໍຄືການແກ້ໄຂວິກິດການດ້ານສະບຽງອາຫານ, ພະລັງງານ, ການເງິນ ແລະ ການບັນລຸເປົ້າໝາຍານພັດທະນາແບບຍືນຍົງ (ປພຍ), ເຊິ່ງໃນໂອກາດນີ້, ສປປ ລາວ ແມ່ນໄດ້ຮຽກຮ້ອງໃຫ້ບັນດາປະເທດສະມາຊິກເພີ່ມທະວີຄວາມພະຍາຍາມໃນການແກ້ໄຂຄວາມທຸກຍາກ ແລະ ການສົ່ງເສີມການຮ່ວມມືເພື່ອບັນລຸວາລະ 2030 ເພື່ອການພັດທະນາແບບຍືນຍົງ.
ພ້ອມກັນນັ້ນ, ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຍັງໄດ້ພົບປະສອງຝ່າຍກັບຫົວຫນ້າຄະນະຜູ້ແທນຂອງບາງປະເທດ ຄື: ທ່ານ ຟາມ ບິ່ງ ມິງ (Pham Binh Minh), ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ ແລະ ຮ່ວມພິທີສະເຫຼີມສະຫຼອງວັນຊາດ ແຫ່ງ ສສ.ຫວຽດນາມ ແລະ ວັນຄົບຮອບ 45 ປີ ແຫ່ງການເຂົ້າເປັນສະມາຊິກ ອົງການສະຫະປະຊາຊາດ ຂອງ ສສ.ຫວຽດນາມ ທີ່ ສຳນັກງານຜູ້ຕາງໜ້າຖາວອນແຫ່ງ ສສ. ຫວຽດນາມ ທີ່ ນິວຢອກ; ທ່ານ ອັບດຸນລາ ຊາຮິດ (Abdulla Shahid), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ມານດິບ (Maldives), ປະທານກອງປະຊຸມສະມັດຊາໃຫ່ຍອົງການ ສປຊ ສະໄໝທີ 76 ແລະ ໄດ້ຮ່ວມເຊັນບົດບັນທຶກຄວາມເຂົ້າໃຈ ລະຫວ່າງສອງກະຊວງການຕ່າງປະເທດຂອງ ສປປ ລາວ ແລະ ມານດິບ; ທ່ານ ບລູໂນ ໂຣດຼິເກສ ພາລິວລາ (Bruno Rodrigues Parrila), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ກູບາ (Cuba); ທ່ານ ຈາວ ໂກເມສ ຄຣາວິນໂຮ (João Gomes Cravinho), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປອກຕຸຍການ (Portuguese); ທ່ານ ເດນນີສ ໂຣນາວໂດ ມົນຄາດາ ໂຄລິນເດຼສ (Denis Ronaldo Moncada Colindres), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ນີກາລາກົວ (Nicaragua) ແລະ ທ່ານ ຄາລໂລສ ຣາເຟລ ຟາເຮຍ ໂທກໂທຊາ (Carlos Rafel Faria Tortosa), ລັດຖະມົນຕີກະຊວງການຕ່າງປະເທດແຫ່ງ ສາທາລະນະລັດ ເວເນຊູເອລາ.
ນອກຈາກນັ້ນ, ທ່ານ ສະເຫຼີມໄຊ ກົມມະສິດ ຍັງໄດ້ພົບປະກັບ ທ່ານ ນາງ ຣີບາບ ຟາຕິມາ (Rebab Fatima), ຮອງເລຂາທິການໃຫ່ຍ ສປຊ, ຜູ້ຕາງໜ້າຂັ້ນສູງຮັບຜິດຊອບວຽກງານຂອງກຸ່ມປະເທດດ້ອຍພັດທະນາ, ກຸ່ມປະເທດກໍາລັງພັດທະນາທີ່ບໍ່ມີຊາຍແດນຕິດກັບທະເລ ແລະ ກຸ່ມປະເທດເກາະດອນນ້ອຍກໍາລັງພັດທະນາ, ເຊິ່ງທັງສອງຝ່າຍໄດ້ແລກປ່ຽນກ່ຽວກັບວຽກງານທີ່ສໍາຄັນທາງດ້ານການພັດທະນາ ໂດຍສະເພາະການຈັດຕັ້ງປະຕິບັດແຜນດຳເນີນງານວຽນນາ ສຳລັບປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ (Vienna Programme of Action) ໃນໄລຍະທີ່ຜ່ານມາ ແລະ ສະເໜີໃຫ້ການສ້າງແຜນປະຕິບັດງານສະບັບໃໝ່ໃຫ້ມີຈຸດສຸມ, ຕອບສະໜອງຄວາມຕ້ອງການດ້ານການພັດທະນາຕົວຈິງຂອງບັນດາປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ ກໍຄືການເພີ່ມທະວີການສະໜັບສະໜູນ ແລະ ຊ່ວຍເຫຼືອໃນການຈັດຕັ້ງປະຕິບັດແຜນປະຕິບັດງານໂດຮາ ສຳລັບປະເທດດ້ອຍພັດທະນາ (DoHA Programm of Action), ລວມທັງການສະໜັບສະໜູນຄວາມພະຍາຍາມໃນການພັດທະນາໃນໄລຍະຂ້າມຜ່ານອອກຈາກສະຖານະພາບປະເທດດ້ອຍພັດທະນາ ຂອງ ສປປ ລາວ ອີກດ້ວຍ