ກອງປະຊຸມສຸດຍອດອາຊຽນ ຄັ້ງທີ 40 ແລະ 41
ກອງປະຊຸມສຸດຍອດອາຊຽນ-ຈີນ ຄັ້ງທີ 25
ກອງປະຊຸມສຸດຍອດອາຊຽນ-ສ.ເກົາຫຼີ ຄັ້ງທີ 23
ກອງປະຊຸມສຸດຍອດອາຊຽນ-ສປຊ ຄັ້ງທີ 12
ໃນວັນທີ 11 ພະຈິກ 2022 ທີ່ ພະນົມເປັນ, ກໍາປູເຈຍ, ທ່ານ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມພິທີເປີດກອງປະຊຸມສຸດຍອດອາຊຽນ ຄັ້ງທີ 40 ແລະ 41 ແລະ ກອງປະຊຸມສຸດຍອດທີ່່ກ່ຽວຂ້ອງ ຢ່າງເປັນທາງການ ໂດຍການເປັນປະທານອາຊຽນຂອງກໍາປູເຈຍ ພາຍໃຕ້ຄໍາຂວັນ “ອາຊຽນ: ຮ່ວມກັນແກ້ໄຂບັນດາສິ່ງທ້າທາຍ”. ພາຍຫຼັງເຂົ້າຮ່ວມພິທີເປີດຢ່າງເປັນທາງການ, ທ່ານ ນາຍົກລັດຖະມົນຕີ ພັນຄໍາ ວິພາວັນ ໄດ້ສືບຕໍ່ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 40 ແລະ 41, ກອງປະຊຸມສຸດຍອດອາຊຽນ-ຈີນ ຄັ້ງທີ 25, ກອງປະຊຸມສຸດຍອດອາຊຽນ-ສ.ເກົາຫຼີ ຄັ້ງທີ 23 ແລະ ກອງປະຊຸມສຸດຍອດອາຊຽນ-ສປຊ ຄັ້ງທີ 12.
ໃນກອງປະຊຸມສຸດຍອດອາຊຽນ ຄັ້ງທີ 40, ຜູ້ນໍາອາຊຽນ ໄດ້ທົບທວນຄືນ ແລະ ຕີລາຄາສູງຕໍ່ຄວາມຄືບໜ້າໃນການສ້າງປະຊາຄົມອາຊຽນໃນໄລຍະ 1 ປີທີ່ຜ່ານມາ ເຊິ່ງໄດ້ຮັບໝາກຜົນທີ່ສຳຄັນໃນຫຼາຍດ້ານ ເປັນຕົ້ນແມ່ນ ການຈັດຕັ້ງປະຕິບັດບູລິມະສິດຂອງປະທານອາຊຽນ ໃນປີ 2022, ຂໍ້ລິເລີ່ມເພື່ອຮັບມືກັບຜົນກະທົບຂອງພະຍາດໂຄວິດ-19, ການຈັດຕັ້ງປະຕິບັດບັນດາກິດຈະກໍາທີ່ຍັງຄົງຄ້າງພາຍໃຕ້ແຜນແມ່ບົດ 2025 ກໍຄືໃນແຜນປະຕິບັດງານ ວ່າດ້ວຍການເຊື່ອມໂຍງອາຊຽນສະບັບທີ 4 ແລະ ແຜນແມ່ບົດວ່າດ້ວຍການເຊື່ອມຈອດອາຊຽນ 2025, ການສ້າງຕົວເມືອງອັດສະລິຍະ ແລະ ອື່ນໆ. ໃນໂອກາດນີ້, ທ່ານນາຍົກລັດຖະມົນຕີ ພັນຄຳ ວິພາວັນ ໄດ້ສະເຫນີໃຫ້ອາຊຽນສຸມໃສ່ການຈັດຕັ້ງປະຕິບັດບັນດາໂຄງການ ແລະ ຂໍ້ລິເລີ່ມພາຍໃຕ້ແຜນຟື້ນຟູຮອບດ້ານອາຊຽນ ແນໃສ່ຫຼຸດຜ່ອນຜົນກະທົບ ແລະ ແກ້ໄຂຄວາມແຕກໂຕນດ້ານຕ່າງໆ ທີ່ເກີດຂຶ້ນໃໝ່ຈາກຜົນກະທົບຂອງພະຍາດລະບາດ ແລະ ສ້າງຄວາມເຂັ້ມແຂງຂອງພາກພື້ນ ເພື່ອໃຫ້ສາມາດຮັບມືກັບເຫດການສຸກເສີນດ້ານສາທາລະນະສຸກ ທີ່ອາດຈະເກີດຂຶ້ນໃນອະນາຄົດ; ແລະ ສືບຕໍ່ຮັດແໜ້ນການຮ່ວມມືດ້ານເສດຖະກິດດີຈິຕອນ ແລະ ສ້າງຄວາມເຂັ້ມແຂງໃຫ້ແກ່ຫົວຫນ່ວຍທຸລະກິດ ລວມທັງການໝູນໃຊ້ດີຈິຕອນ ເຂົ້າໃນການດໍາເນີນທຸລະກິດ. ໃນຕອນທ້າຍ, ກອງປະຊຸມສຸດຍອດອາຊຽນ ຄັ້ງທີ 40 ໄດ້ຮັບຮອງເອົາເອກະສານທີ່ສຳຄັນຫຼາຍສະບັບ ເປັນຕົ້ນແມ່ນ: ຖະແຫຼງການວິໄສທັດຜູ້ນຳອາຊຽນ ວ່າດ້ວຍອາຊຽນ: ຮ່ວມກັນແກ້ໄຂບັນດາສິ່ງທ້າທາຍ, ຖະແຫຼງການຜູ້ນຳອາຊຽນ ວ່າດ້ວຍການສ້າງຕັ້ງອາຊຽນຄົບຮອບ 55 ປີ, ຖະແຫລງການຜູ້ນໍາອາຊຽນວ່າດ້ວຍການສະຫມັກເຂົ້າເປັນສະມາຊິກອາຊຽນຂອງ ຕີມໍເລສເຕ ແລະ ຮັບຮອງເອົາການສະເໜີແຕ່ງຕັ້ງ ທ່ານ ກາວ ກິມ ຮຸນ ຈາກປະເທດ ກຳປູເຈຍ ເປັນເລຂາທິການໃຫຍ່ອາຊຽນຄົນໃໝ່ ສໍາລັບສົກປີ 2023-2027.
ກອງປະຊຸມສຸດຍອດອາຊຽນ ຄັ້ງທີ 41 ໄດ້ທົບທວນຄືນການຮ່ວມມືລະຫວ່າງອາຊຽນ ກັບ ຄູ່ເຈລະຈາ, ໃນນັ້ນຜູ້ນໍາອາຊຽນໄດ້ຕີລາສູງຕໍ່ບົດບາດສໍາຄັນຂອງອາຊຽນໃນເວທີພາກພື້ນ ແລະ ສາກົນ ຊຶ່ງເຫັນວ່າໄດ້ຮັບຄວາມສົນໃຈຈາກຄູ່ຮ່ວມມືພາຍນອກຫລາຍຂື້ນ. ນອກນັ້ນ, ຜູ້ນໍາອາຊຽນ ຍັງໄດ້ມີການແລກປ່ຽນຄໍາຄິດຄໍາເຫັນກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ. ໃນໂອກາດນີ້, ທ່ານນາຍົກລັດຖະມົນຕີີ ໄດ້ເນັ້ນໜັກໃຫ້ອາຊຽນ ສືບຕໍ່ຍຶດໝັ້ນຄວາມເປັນແກນກາງ ແລະ ຫຼັກການໃນການພົວພັນຮ່ວມມືກັບພາຍນອກ ທີ່ກໍານົດໄວ້ໃນກົດບັດອາຊຽນ ໂດຍສະເພາະຫຼັກການເປີດກວ້າງ, ກວມລວມ ແລະ ບໍ່ຈຳແນກ ໃນການພົວພັນຮ່ວມມືກັບພາຍນອກ; ແລະ ສືບຕໍ່ບົດບາດສໍາຄັນ ໂດຍການນໍາໃຊ້ກົນໄກຂອງອາຊຽນ ໃນການສົ່ງເສີມຄວາມໄວ້ເນື້ອເຊື່ອໃຈ, ຄວາມເຊື່ອໝັ້ນ ແລະ ຄວາມເຂົ້າໃຈ ຊຶ່ງກັນ ແລະ ກັນ ເພື່ອພາລະກິດສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ.
ກອງປະຊຸມສຸດຍອດອາຊຽນ-ສປ ຈີນ ຄັ້ງທີ 25 ໄດ້ສະແດງຄວາມຍິນດີຕໍ່ຄວາມຄືບໜ້າຂອງການຈັດຕັ້ງປະຕິບັດການເປັນຄູ່ຮ່ວມຍຸດທະສາດຮອບດ້ານ ແລະ ການຈັດຕັ້ງປະຕິບັດແຜນປະຕິບັດງານອາຊຽນ-ສປ ຈີນ (2021-2025). ພ້ອມນີ້, ກອງປະຊຸມ ໄດ້ຮັບຮອງເອົາເອກະສານຜົນຂອງກອງປະຊຸມເຊັ່ນ: ຖະແຫຼງການຮ່ວມອາຊຽນ-ຈີນ ວ່າດ້ວຍ ການພັດທະນາຮ່ວມກັນ, ຖະແຫຼງການຮ່ວມຜູ້ນໍາອາຊຽນ-ຈີນ ເພື່ອສະເຫຼີມສະຫຼອງ ຄົບຮອບ 20 ປີ ຂອງຖະແຫຼງການ ວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້ ແລະ ຖະແຫຼງການຮ່ວມອາຊຽນ-ຈີນ ວ່າດ້ວຍການຮ່ວມມືດ້ານຄວາມໝັ້ນຄົງດ້ານສະບຽງອາຫານ.
ກອງປະຊຸມສຸດຍອດອາຊຽນ-ສ.ເກົາຫຼີ ຄັ້ງທີ 23 ໄດ້ສະແດງຄວາມຊົມເຊີຍຕໍ່ຄວາມຄືບໜ້າ ໃນການຈັດຕັ້ງປະ ຕິບັດແຜນປະຕິບັດງານການຮ່ວມມືອາຊຽນ-ສ.ເກົາຫຼີ (2021-2025) ແລະ ການພົວພັນຮ່ວມມືອາຊຽນ-ສ.ເກົາຫຼີ ຕະ ຫຼອດໄລຍະ 1 ປີທີ່ຜ່ານມາ. ໃນນີ້, ອາຊຽນ ແລະ ສ.ເກົາຫຼີ ຈະສືບຕໍ່ຮ່ວມມືກັນໃນຂະແໜງການທີ່ສອງຝ່າຍມີຄວາມສົນໃນຮ່ວມກັນເປັນຕົ້ນແມ່ນ: ການຄ້າ ແລະ ການລົງທຶນ, ການສຶກສາ, ການໄປມາຫາສູ່ລະຫວ່າງປະຊາຊົນກັບປະຊາຊົນ, ການປ່ຽນແປງຂອງດິນຟ້າອາກາດ, ການຄຸ້ມຄອງໄພພິບັດທາງທໍາມະຊາດ ແລະ ອື່ນໆ.
ກອງປະຊຸມສຸດຍອດອາຊຽນ-ສະຫະປະຊາຊາດ (ສປຊ) ຄັ້ງທີ 12 ໄດ້ຕີລາຄາສູງຕໍ່ຜົນການຈັດຕັ້ງປະຕິບັດການຮ່ວມມືອາຊຽນ-ສປຊ ໃນໄລຍະ 1 ປີ ຜ່ານມາ ໂດຍສະເພາະຄວາມຄືບໜ້າຂອງການຈັດຕັ້ງປະຕິບັດບັນດາແຜນງານ/ໂຄງການພາຍໃຕ້ຂອບການຮ່ວມມືວ່າດ້ວຍການເສີມສ້າງເຊິ່ງກັນ ແລະ ກັນ ລະຫວ່າງ ວິໄສທັດປະຊາຄົມອາຊຽນ 2025 ແລະ ບັນດາເປົ້າໝາຍເພື່ອການພັດທະນາແບບຍືນຍົງ ສປຊ 2030, ທັງໝົດນີ້ ໄດ້ປະກອບສ່ວນອັນສໍາຄັນເຂົ້າໃນການສ້າງສັນຕິພາບ, ຄວາມໝັ້ນຄົງ ແລະ ການຊ່ວຍເຫຼືອເພື່ອການພັດທະນາຢູ່ພາກພື້ນ ກໍຄືໃນໂລກ. ກອງປະຊຸມຍັງໄດ້ຢໍ້າຄືນເຖິງບົດບາດອັນສໍາຄັນຂອງ ສປຊ ໃນຖານະເປັນອົງການຈັດຕັ້ງຫຼາຍຝ່າຍ ເພື່ອສືບຕໍ່ປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງຢູ່ພາກພື້ນ ແລະ ສາກົນ.