ເພື່ອເປັນການສົ່ງເສີມສາຍພົວພັນຮ່ວມມືອັນດີງາມ ລະຫວ່າງ ສປປ ລາວ ແລະ ຍີ່ປຸ່ນ, ທ່ານ ຟູມິໂອະ ກິຊິດະ, ລັດຖະມົນຕີ​ກະຊວງ​ການ​ຕ່າງປະ​ເທດຍີ່ປຸ່ນ, ພ້ອມດ້ວຍຄະນະ ​ໄດ້​​ເດີນທາງ​ມາຢ້ຽມຢາມ ສປປ ລາວ ຢ່າງເປັນທາງການ ​ໃນ​ລະຫວ່າງວັນທີ 4-5 ພຶດສະພາ 2016.

ໃນ​​ວັນ​ທີ 4 ​ພຶດສະພາ 2016, ທີ່ ກະຊວງ​ການ​ຕ່າງປະ​ເທດ, ​ໄດ້​ມີ​ການ​ພົບ​ປະ​ສອງ​ຝ່າຍຢ່າງ​ເປັນ​ທາງ​ການ ລະຫວ່າງ ທ່ານ ສະ​ເຫຼີມ​ໄຊ ກົມມະ​ສິດ, ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ສປປ ລາວ ​ແລະ ທ່ານ ຟູມິໂອະ ກິຊິດະ, ລັດຖະມົນຕີ​​ກະຊວງ​ການ​ຕ່າງປະ​ເທດຍີ່ປຸ່ນ. ໃນການພົບປະຄັ້ງນີ້, ທັງສອງຝ່າຍ ໄດ້ສະແດງຄວາມຍິນດີ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ-ຢີ່ປຸ່ນ ທີ່ນັບມື້ນັບຂະຫຍາຍຕົວຢ່າງບໍ່ຢຸດຢັ້ງ ເຊິ່ງໃນນັ້ນໄດ້ຕີລາຄາສູງຕໍ່ຜົນສຳເລັດອັນຈົບງາມ ໃນການສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 60 ປີ ໃນປີ 2015 ທີ່ຜ່ານມາ, ການຍົກລະດັບສາຍພົວພັນເປັນຄູ່ຮ່ວມມືຍຸດທະສາດ, ພ້ອມທັງຈະສືບຕໍ່ປຶກສາຫາລື ແລະ ຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ ແລະ ວັດທະນະທຳ ລະຫວ່າງ ສອງຝ່າຍ. ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມເສຍໃຈ ໄປຍັງ ລັດຖະບານ ແລະ ປະຊາຊົນ ຍີ່ປຸ່ນ ຕໍ່ເຫດການແຜ່ນດິນໄຫວ ຢູ່ທາງພາກຕາເວັນຕົກສ່ຽງໄຕ້ ຂອງຍີ່ປຸ່ນ, ເຊິ່ງໄດ້ສ້າງຄວາມເສຍຫາຍອັນໜັກໜ່ວງໃຫ້ແກ່ຊີວິດ, ຊັບສິນ ແລະ ພື້ນຖານໂຄງລ່າງໃນບໍລິເວນດັ່ງກ່າວ. ໃນການພົບປະ, ຝ່າຍຍີ່ປຸ່ນ ໄດ້ຢືນຢັນຈະສືບຕໍ່ການຊ່ວຍເຫຼືອທາງການເພື່ອການພັດທະນາ ແລະ ຍິນດີໃຫ້ການຊ່ວຍເຫຼືອແກ່ ສປປ ລາວ ໃນການເປັນປະທານອາຊຽນ ໃນປີ 2016. ພ້ອມດຽວກັນ, ສອງຝ່າຍຍິນດີໃຫ້ການສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ. ການພົບປະສອງຝ່າຍໄດ້ດຳເນີນໄປດ້ວຍໄມຕີຈິດມິດຕະພາບ ແລະ ໄດ້ປຶກສາຫາລືບັນຫາຕ່າງໆ ທີ່ສອງຝ່າຍມີຄວາມສົນໃຈຮ່ວມກັນ ແນໃສ່ເພື່ອຮັດແໜ້ນການພົວພັນ ແລະ ການຮ່ວມມືສອງຝ່າຍໃຫ້ແໜ້ນແຟ້ນຍິ່ງຂຶ້ນ, ໄດ້ສະຫລຸບຕີລາຄາຄືນ ກ່ຽວກັບ ການຮ່ວມມືໃນໄລຍະຜ່ານມາ ພ້ອມທັງກຳນົດທິດທາງ ແລະ ແຜນການຮ່ວມມືໃນຕໍ່ໜ້າ. ຫລັງຈາກນັ້ນ, ສອງຝ່າຍ ໄດ້ຮ່ວມກັນລົງນາມເອກະສານແລກປ່ຽນ ຈຳນວນ 2 ໂຄງການຄື: ໂຄງການພັດທະນາປັບປຸງຂົວຢູ່ເສັ້ນທາງຫຼວງແຫ່ງຊາດ ເລກທີ 9 ແລະ ໂຄງການພັດທະນາຊັບພະຍາກອນມະນຸດ, ເຊິ່ງໂຄງການດັ່ງກ່າວ ຈະປະກອບສ່ວນສຳຄັນໃນການພັດທະນາເສດຖະກິດ-ສັງຄົມ ຂອງ ສປປ ລາວ.