ໃນວັນທີ 6 ພຶດສະພາ 2016, ທີ່ ສໍານັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຕ້ອນຮັບການເຂົ້າຢ້ຽມຢາມ ພົບປະຂອງ ທ່ານ ອູ ຕິນ ຈໍ, ປະທານາທິບໍດີ ແຫ່ງ ສສ ມຽນມາ ແລະ ຄະນະ ພາຍຫລັງ ທີ່ໄດ້ດໍາລົງຕໍາແໜ່ງໃໝ່ ໃນໂອກາດທີ່ ທ່ານໄດ້ເດີນທາງມາຢ້ຽມຢາມທາງລັດຖະກິດສາທາລະນະລັດ ປະຊາທິປະໄຕ ປະຊາຊົນລາວ.
ໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີ, ຕ້ອນຮັບຊົມເຊີຍ ແລະ ຕີລາຄາສູງຕໍ່ການຢ້ຽມຢາມທາງລັດຖະກິດ ຢູ່ ສປປ ລາວ ຂອງທ່ານປະທານາທິບໍດີແຫ່ງ ສສ ມຽນມາ ແລະ ຄະນະ ເຊິ່ງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອທີ່ຍາວນານ ແລະ ການຮ່ວມມືລະຫວ່າງ ລາວ-ມຽນມາ ໃຫ້ນັບມື້ແຕກດອກອອກຜົນ ແລະ ຈະເລີນງອກງາມຍິ່ງໆຂຶ້ນ. ການພົບປະຄັ້ງນີ້ ໄດ້ດຳເນີນດ້ວຍໄມຕີຈິດ ມິດຕະພາບ ແລະ ຄວາມເຂົ້າອົກເຂົ້າໃຈ ເຊິ່ງກັນ ແລະ ກັນ ຢ່າງເລິກເຊິ່ງ. ພ້ອມນີ້, ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍຕໍ່ ທ່ານ ອູ ຕິນ ຈໍ ທີ່ໄດ້ຮັບການເລືອກຕັ້ງ ໃຫ້ດໍາລົງຕໍາແໜ່ງເປັນປະທານາທິບໍດີ ຄົນໃໝ່ ຂອງ ສສ ມຽນມາ.
ທ່ານປະທານາທິບໍດີແຫ່ງ ສສ ມຽນມາ ໄດ້ສະແດງຄວາມຂອບໃຈຕໍ່ທ່ານນາຍົກລັດຖະມົນຕີ ທີ່ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ໄດ້ສະແດງຄວາມຊົມເຊີຍຕໍ່ ທ່ານ ທອງລຸນ ສີສຸລິດ ທີ່ໄດ້ຮັບການຄັດເລືອກ ໃຫ້ເປັນນາຍົກລັດຖະມົນຕີຄົນໃໝ່ແຫ່ງ ສປປ ລາວ ພ້ອມທັງເຊື່ອໝັ້ນວ່າ ສາຍພົວພັນມິດຕະພາບອັນເປັນມູນເຊື້ອຍາວນານ ແລະ ການຮ່ວມມື ລະຫວ່າງ ສອງປະເທດລາວ ແລະ ມຽນມາ ຈະນັບມື້ຂະຫຍາຍຕົວຢ່າງບໍ່ຢຸດຢັ້ງ.