ໂດຍຕອບສະໜອງຕາມຄຳເຊີນຂອງ ສະຫາຍ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ, ສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໄດ້ເດີນທາງຢ້ຽມຢາມ ສສ.ຫວຽດນາມ ຢ່າງເປັນທາງການ ໃນລະຫວ່າງວັນທີ 15-17 ພຶດສະພາ 2016 ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ລາວ ແລະ ຫວຽດນາມ.
ໃນວັນທີ 15 ພຶດສະພາ 2016, ທີ່ ສໍານັກງານນາຍົກລັດຖະມົນຕີ ແຫ່ງ ສສ. ຫວຽດນາມ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບການຕ້ອນຮັບຈາກ ທ່ານ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສສ. ຫວຽດນາມ ຢ່າງອົບອຸ່ນ, ສະໜິດສະໜົມ ແລະ ສົມກຽດ. ຈາກນັ້ນໄດ້ຈັດການພົບປະສອງຝ່າຍຂຶ້ນ ລະຫວ່າງ ສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສສ. ຫວຽດນາມ. ໃນການພົບປະສອງຝ່າຍ ສະຫາຍ ຫງວຽນ ຊວັນ ຟຸກ ຕີລາຄາສູງຕໍ່ສະຫາຍ ທອງລຸນ ສີສຸລິດ ທີ່ໄດ້ຮັບການເລືອກຕັ້ງ ໃຫ້ເປັນນາຍົກລັດຖະມົນຕີ ແຫ່ງ ສປປ ລາວ, ເຊິ່ງສະແດງໃຫ້ເຫັນເຖິງຄວາມເຊື່ອໝັ້ນ ຂອງການນໍາ ພັກ-ລັດ ກໍຄື ປະຊາຊົນລາວ. ສະຫາຍ ທອງລຸນ ສີສຸລິດ ກໍໄດ້ສະແດງຄວາມປິຕິຊົມຊື່ນເປັນຢ່າງຍິ່ງ ແລະ ຮູ້ສຶກເປັນກຽດທີ່ໄດ້ນຳພາຄະນະຜູ້ແທນຂັ້ນສູງຂອງລັດຖະບານ ແຫ່ງ ສປປ ລາວ ເດີນທາງຢ້ຽມຢາມ ສສ ຫວຽດນາມ ຢ່າງເປັນທາງການ, ເຊິ່ງເປັນການເຄື່ອນໄຫວວຽກງານການຕ່າງປະເທດຄັ້ງທຳອິດ ພາຍຫຼັງໄດ້ຮັບແຕ່ງຕັ້ງເປັນນາຍົກລັດຖະມົນຕີ ແຫ່ງ ສປປ ລາວ ເພື່ອເປັນການປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ມີມູນເຊື້ອອັນດີງາມນັ້ນ ໃຫ້ນັບມື້ມີຄວາມແໜ້ນແຟ້ນ, ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.
ທັງສອງຝ່າຍ ໄດ້ຕົກລົງເຫັນດີສືບຕໍ່ປະຕິບັດ ບັນດາຂໍ້ຕົກລົງ 2 ກົມການເມືອງ ແລະ ບົດບັນທຶກ ຄັ້ງທີ 38 ຂອງຄະນະກຳມາທິການຮ່ວມມື ລະຫວ່າງ ສອງລັດຖະບານ; ສືບຕໍ່ເພີ່ມທະວີການຮ່ວມມືຢ່າງແໜ້ນແຟ້ນ ລະຫວ່າງບັນດາແຂວງຊາຍແດນ ເພື່ອພ້ອມກັນສະກັດກັ້ນປະກົດການຫຍໍ້ທໍ້ທີ່ເກີດຂຶ້ນ; ຍົກສູງຄຸນນະພາບການຮ່ວມມືທາງດ້ານການສຶກສາ, ວັດທະນະທຳ-ສັງຄົມ, ດ້ານວຽກງານການຕ່າງປະເທດ; ແລະ ພິເສດປີ 2017 ສອງປະເທດຈະໄດ້ຮ່ວມກັນສະເຫຼີມສະຫຼອງ 2 ວັນປະຫວັດສາດ ຄື: ຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດ ລາວ-ຫວຽດນາມ ແລະ ວັນຄົບຮອບ 40 ປີ ແຫ່ງສົນທິສັນຍາມິດຕະພາບ ແລະ ການຮ່ວມມື ລະຫວ່າງ ລາວ-ຫວຽດນາມ; ການຮ່ວມມືໃນຂອບແມ່ນ້ຳຂອງ; ການຮ່ວມມືໃນພາກພື້ນ ແລະ ສາກົນ. ນອກນັ້ນ, ສອງຝ່າຍຍັງໄດ້ປຶກສາຫາລືບັນຫາສາກົນທີ່ພົ້ນເດັ່ນ ທີ່ສອງຝ່າຍສົນໃຈຮ່ວມກັນ.
ໂອກາດຢ້ຽມຢາມ ສສ. ຫວຽດນາມ ຄັ້ງນີ້ ສະຫາຍ ທອງລຸນ ສີສຸລິດ ຍັງຈະໄດ້ເຂົ້າຢ້ຽມຂໍ່ານັບ ສະຫາຍ ຫງວຽນ ຟູ້ ຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ; ເຂົ້າຢ້ຽມຂໍ່ານັບ ສະຫາຍ ເຈິນ ດາຍ ກວາງ, ປະທານປະເທດ ແຫ່ງ ສສ. ຫວຽດນາມ; ພົບປະກັບ ສະຫາຍ ນາງ ຫງວຽນ ທິ ກີມ ເງິນ, ປະທານສະພາແຫ່ງຊາດ ສສ. ຫວຽດນາມ; ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ປະທານສະມາຄົມມິດຕະພາບ ຫວຽດນາມ-ລາວ ແລະ ໄດ້ພົບປະກັບບັນດາສະຫາຍ ອະດີດການນຳ ສສ. ຫວຽດນາມ ເຊັ່ນ: ສະຫາຍ ເຈືອງ ເຕິນ ຊາງ, ອະດີດປະທານປະເທດ; ສະຫາຍ ຫງວຽນ ເຕິນ ຢຸ້ງ, ອະດີດນາຍົກລັດຖະມົນຕີ ແລະ ສະຫາຍ ເລ ແທັງ ຫາຍ, ອະດີດເລຂາພັກນະຄອນໂຮ່ຈິມິນ.