ໃນຕອນບ່າຍ ຂອງວັນທີ 14 ກໍລະກົດ 2016 ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Hu Zhengyue, ຮອງປະທານສາມະຄົມການທູດປະຊາຊົນ ຂອງ ສປ ຈີນ ພ້ອມດ້ວຍຄະນະ, ເນື່ອງໃນໂອກາດ ຄະນະດັ່ງກ່າວມາຢ້ຽມຢາມ ແລະ ເຮັດວຽກຢູ່ ສປປ ລາວ ເພື່ອຈັດຕັ້ງປະຕິບັດ ໂຄງການປິ່ນປົວພະຍາດແກ່ນຕາຂຸ້ນ ຫລື (ໂຄງການເຄື່ອນໄຫວນໍາແສງສະຫວ່າງມາສູ່ປະເທດແມ່ນໍ້າຂອງ)ພາຍໃຕ້ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ.
ຄະນະຜູ້ແທນດັ່ງກ່າວ ຈະຮ່ວມກັບກະຊວງສາທາລະນະສຸກ ເພື່ອປຶກສາຫາລື ແລະ ແລກປ່ຽນບົດຮຽນ ໃນການຄັດເລືອກຄົນເຈັບ ທີ່ເປັນພະຍາດແກ່ນຕາຂຸ້ນ ແລະ ຢ້ຽມຢາມສະຖານທີ່ຕົວຈິງ ເພື່ອດໍາເນີນການຜ່າຕັດ ແລະ ປິ່ນປົວ.
ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ການມາເຮັດວຽກ ຂອງສະມາຄົມການທູດປະຊາຊົນຂອງຈີນ ໃນຄັ້ງນີ້, ໂດຍສະເພາະການຈັດຕັ້ງປະຕິບັດ ໂຄງການປິ່ນປົວພະຍາດແກ່ນຕາຂຸ້ນນີ້ ຈະເປັນປະໂຫຍດຫລາຍ ໃນການຍົກລະດັບດ້ານສຸຂະພາບ ຂອງປະຊາຊົນລາວໃຫ້ດີຂຶ້ນ ແລະ ປະກອບສ່ວນອັນສໍາຄັນ ເຂົ້າໃນການພັດທະນາເສດຖະກິດ-ສັງຄົມ ກໍຄືການບັນລຸເປົ້າຫມາຍສະຫັດສະວັດແຫ່ງການພັດທະນາ (MDGs) ໃນປີ 2020 ຂອງລັດຖະບານ ສປປ ລາວ, ທັງເປັນການປະກອບສ່ວນເຂົ້າໃນການສົ່ງເສີມການພົວພັນ ລະຫວ່າງ 2 ປະເທດ ໃຫ້ນັບມື້ນັບມີຄວາມແຫນ້ນແຟ້ນຍິ່ງໆຂຶ້ນ.