ໃນວັນທີ 12 ສິງຫາ 2016, ທີ່ ສູນການຮ່ວມມືສາກົນ ແລະ ຝຶກອົບຮົມ (ICTC) ໄດ້ມີພິທີປິດ ແລະ ມອບໃບຢັ້ງຢຶນ ໃຫ້ແກ່ບັນດາພັນລະຍາການນຳ ທີ່ສຳເລັດການຝຶກອົບຮົມ ດ້ານຄວາມຮູ້ພື້ນຖານ ກ່ຽວກັບ ຄວາມສຳຄັນ ແລະ ສິ່ງທ້າທາຍ ຂອງການເປັນເຈົ້າພາບຈັດກອງປະຊຸມສຸດຍອດ ASEAN ແລະ ກອງປະຊຸມປິ່ນອ້ອມ, ການເຂົ້າເປັນປະຊາຄົມເສດຖະກິດອາຊຽນ ແລະ ນະໂຍບາຍການຕ່າງປະເທດຂອງ ສປປ ລາວ ຈຳນວນ 80 ທ່ານ. ຊຸດຝຶກອົບຮົມຄັ້ງນີ້ ໄດ້ດຳເນີນມາແຕ່ວັນທີ 10-12 ສິງຫາ 2016 ໂດຍການໃຫ້ກຽດເຂົ້າຮ່ວມເປັນປະທານພິທີປິດໃນຄັ້ງນີ້ໂດຍ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ, ມີບັນດາຄູອາຈານ, ຜູ້ເຂົ້າຮ່ວມຝຶກອົບຮົມ, ບັນດາທ່ານຫົວໜ້າຫ້ອງການ, ຄະນະກົມພາຍໃນກະຊວງການຕ່າງປະເທດ, ຄະນະຮັບຜິດຊອບຊຸດຮຽນ ພ້ອມດ້ວຍພະນັກງານສະຖາບັນການຕ່າງປະເທດ ຈຳນວນ 105 ທ່ານ.
ທ່ານ ລັດຕະນະ ຖາວອນສຸກ, ຮອງຫົວໜ້າສະຖາບັນການຕ່າງປະເທດ ໄດ້ສະຫຼຸບລາຍງານຜົນສຳເລັດຂອງຊຸດຮຽນ ເຊິ່ງສະແດງໃຫ້ເຫັນໄດ້ວ່າ: ຜົນການຝຶກອົບຮົມຄັ້ງນີ້ ຜູ້ເຂົ້າຮ່ວມສາມາດຍົກລະດັບຄວາມຮັບຮູ້ທາງດ້ານການເມືອງ ແລະ ຄວາມຮູ້ພື້ນຖານຂອງວຽກງານການຕ່າງປະເທດ; ການກະກຽມຈັດກອງປະຊຸມສຸດຍອດ ASEAN ແລະ ກອງປະຊຸມປິ່ນອ້ອມ ທີ່ ສປປ ລາວ ເຮົາເປັນເຈົ້າພາບ ໃນເດືອນກັນຍາ 2016 ນີ້; ການຈັດຕັ້ງປະຕິບັດແນວທາງນະໂຍບາຍການຕ່າງປະເທດ ແລະ ສະພາບການຂອງໂລກ; ການຈັດຕັ້ງປະຕິບັດແນວທາງຂອງພັກ; ການສ້າງຄຸນສົມບັດສິນທຳປະຕິວັດໃນເງື່ອນໄຂໃໝ່; ສິ່ງທີ່ຄວນເອົາໃຈໃສ່ໃນມາລະຍາດສາກົນ; ມາລະຍາດ-ຄຸນສົມບັດ ແລະ ການນຸ່ງຖືຂອງແມ່ຍິງລາວ; ຫຼັກການລວມວຽກງານພິທີການທູດ ລວມທັງສາທິດ ວິທີຈັດໂຕະອາຫານ;
ໃນພິທີອັນມີຄວາມໝາຍຄວາມສຳຄັນດັ່ງກ່າວ, ທ່ານປະທານພິທີ ໄດ້ໃຫ້ກຽດໂອ້ລົມຕໍ່ບັນດາພັນລະຍາການນຳ ທີ່ສຳເລັດການຝຶກອົບຮົມໃນຄັ້ງນີ້ ໂດຍໄດ້ເນັ້ນເຖິງຄວາມຈຳເປັນ ແລະ ຄວາມສຳຄັນຕໍ່ການຍົກລະດັບດ້ານຄວາມຮູ້ທົ່ວໄປ ກ່ຽວກັບ ສະພາບການໃນເງື່ອນໄຂໃໝ່ຂອງພາກພື້ນ ແລະ ສາກົນ ແລະ ດ້ານພິທີການ ເພື່ອເປັນເຄື່ອງມືສຳຄັນໃນການເຄື່ອນໄຫວວຽກງານກັບສາກົນ ໃນໄລຍະໃໝ່, ໂດຍສະເພາະແມ່ນການເປັນເຈົ້າພາບກອງປະຊຸມສຸດຍອດອາຊຽນ ຄັ້ງທີ 28 ແລະ 29 ຂອງ ສປປ ລາວ ໃນລະຫວ່າງວັນທີ 3-8 ກັນຍາ 2016 ທີ່ຈະມາເຖິງນີ້.