ໃນວັນທີ 4 ຕຸລາ 2016, ທີ່ ກະຊວງການຕ່າງປະເທດ, ໄດ້ມີພິທີມອບ-ຮັບ ໂຄງການຊ່ວຍເຫຼືອລ້ານອກໂຄງການ ຈາກລັດຖະບານຍີ່ປຸ່ນ ມູນຄ່າ 500 ລ້ານເຢັນ, ຊຶ່ງຕາງໜ້າລັດຖະບານລາວຮ່ວມລົງນາມໂດຍ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແລະ ຕ່າງໜ້າລັດຖະບານຍີ່ປຸ່ນໂດຍ ທ່ານ ຕາເກຊິ ຮິກິຮາຣະ, ເອກອັກຄະລັດຖະທູດຍີ່ປຸ່ນ ປະຈຳລາວ, ໂດຍການເຂົ້າຮ່ວມເປັນສັກຂີພິຍານຂອງບັນດາພະນັກງານຈາກຂະແໜງການທີ່ກ່ຽວຂ້ອງຂອງທັງສອງຝ່າຍ.

          ໃນໂອກາດດັ່ງກ່າວ, ທ່ານ ນາງ ຄຳເພົາ ເອີນທະວັນ ໄດ້ກ່າວຄວາມຂອບໃຈຕໍ່ລັດຖະບານຍີ່ປຸ່ນ ທີ່ໄດ້ສືບຕໍ່ໃຫ້ການຊ່ວຍເຫຼືອໂຄງການຊ່ວຍເຫຼືອລ້ານອກໂຄງການແກ່ ສປປ ລາວ, ເຊິ່ງໃນປີ 2015 ຜ່ານມານີ້ ລັດຖະບານຍີ່ປຸ່ນກໍ່ໄດ້ໃຫ້ການຊ່ວຍເຫຼືອໂຄງການດັ່ງກ່າວ ມູນຄ່າ 500 ລ້ານເຢັນ ຫຼື ປະມານ 40 ຕື້ກວ່າກີບ, ເພື່ອນໍາໃຊ້ເຂົ້າໃນການດູ່ນດ່ຽງຫງົບປະມານແຫ່ງຊາດ ສຳລັບປີ 2016. ສຳລັບໂຄງການຊ່ວຍເຫຼືອຂອງລັດຖະບານຍີ່ປຸ່ນໃນປີນີ້, ກໍ່ຈະນຳໃຊ້ເພື່ອການດູ່ນດ່ຽງຫງົບປະມານສຳລັບ ປີ 2017 ເຊັນດຽວກັນ, ການຊ່ວຍເຫຼືອດັ່ງກ່າວ ແມ່ນເປັນການປະກອບສ່ວນເຂົ້າໃນການພັດຖະນາເສດຖະກິດ-ສັງຄົມ ຂອງ ສປປ ລາວ, ໂດຍສະເພາະ ປະກອບສ່ວນເຂົ້າໃນການລົບລ້າງຄວາມທຸກຍາກຂອງປະຊາຊົນລາວບັນດາເຜົ່າເທື່ອລະກ້າວ ເພື່ອເຮັດໃຫ້ ສປປ ລາວ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2020. ນອກນີ້, ທ່ານຮອງລັດຖະມົນຕີກະຊວງການຕ່າງປະເທດ ໄດ້ຢືນຢັນວ່າ ລັດຖະບານລາວ ຈະໄດ້ນຳໃຊ້ການຊ່ວຍເຫຼືອດັ່ງກ່າວ ຕາມຈຸດປະສົງ ແລະ ເປົ້າໝາຍຂອງຝ່າຍຍີ່ປຸ່ນ ເພື່ອໃຫ້ເກີດຜົນປະໂຫຍດສູງສຸດ ມາໃຫ້ແກ່ປະຊາຊົນລາວ.