ໃນຕອນບ່າຍ, ຂອງວັນທີ 21 ຕຸລາ 2016, ສະຖາບັນການຕ່າງປະເທດ ກະຊວງການຕ່າງປະເທດ ໂດຍສົມທົບກັບ ກົມຈັດຕັ້ງ ແລະ ພະນັກງານ ໄດ້ຈັດພິທີປິດຊຸດຝຶກອົບຮົມພະນັກງານການທູດກ່ອນໄປປະຈຳການ ໃຫ້ແກ່ພະນັກງານ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ຜູ້ທີ່ຈະອອກໄປປະຈຳການ ຢູ່ຕ່າງປະເທດ ເພື່ອປະຕິບັດໜ້າທີ່ການເມືອງ ທີ່ ພັກ - ລັດ ມອບໝາຍໃຫ້ຢູ່ຕ່າງປະເທດ. ການຝຶກອົບຮົມດັ່ງກ່າວ ໄດ້ ດຳເນີນເປັນເວລາ 10 ວັນ, ນັບແຕ່ວັນທີ 10 ຕຸລາ 2016 ເປັນຕົ້ນມາ, ໂດຍມີຜູ້ເຂົ້າຮ່ວມຈໍານວນ 37 ທ່ານ, ຍິງ 09 ທ່ານ ເຊິ່ງຈັດຂຶ້ນທີ່ສະຖາບັນການຕ່າງປະເທດ ( ສູນຮ່ວມມືສາກົນ ແລະ ຝຶກອົບຮົມ ICTC).
ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ ໄດ້ໃຫ້ກຽດເຂົ້າຮ່ວມ ເປັນປະທານພິທີປິດ ແລະ ທັງເປັນກຽດມອບໃບຢັ້ງຢືນ ໃຫ້ແກ່ນັກສຳມະນາກອນ ທີ່ ສຳເລັດການຝຶກອົບຮົມໃນຄັ້ງນີ້.
ຕາມການສະຫຼຸບຕີລາຄາຂອງຊຸດຝຶກອົບຮົມ ທ່ານ ຢົງ ຈັນທະລັງສີ, ຫົວໜ້າສະຖາບັນການຕ່າງປະເທດ, ທັງເປັນຫົວໜ້າຄະນະຮັບຜິດຊອບຊຸດຝຶກອົບຮົມ ໄດ້ແຈ້ງໃຫ້ຊາບວ່າ: ການຈັດຊຸດຝຶກອົບຮົມພະນັກງານການທູດ ກ່ອນໄປປະຈຳການຄັ້ງນີ້ ແມ່ນມີຈຸດປະສົງເພື່ອຍົກລະດັບຄວາມຮູ້ຕົວຈິງ ກ່ຽວກັບການເຄື່ອນໄຫວການທູດ ໃນນັ້ນ ໄດ້ເວົ້າເຖິງວຽກງານວິຊາສະເພາະທາງການທູດດ້ານຕ່າງໆ ເປັນຕົ້ນຄຸນສົມບັດສິນທຳປະຕິວັດ ຂອງພະນັກງານການທູດ, ພ້ອມທັງແລກປ່ຽນບົດຮຽນການເຄື່ອນໄຫວວຽກງານການທູດທີ່ຈຳເປັນຕາມ ຄວາມຮຽກຮ້ອງຕ້ອງການຂອງໄລຍະໃໝ່ ຄື: ນະໂຍບາຍການຕ່າງປະເທດຂອງ ສປປ ລາວ ໃນໄລຍະໃໝ່, ຄວາມຮູ້ພື້ນຖານກ່ຽວກັບພິທີການທູດ, ວຽກງານ ກົງສຸນ, ວຽກງານການທູດເສດຖະກິດ, ວຽກງານການເງິນ, ວຽກງານພົວພັນຄົນເຊື້ອຊາດລາວຢູ່ຕ່າງປະເທດ, ວຽກງານ ການຂ່າວ, ວຽກງານການພົວພັນຕ່າງປະເທດ ທັງສອງຝ່າຍ ແລະ ຫຼາຍຝ່າຍ, ວຽກງານແຜນພັດທະນາເສດຖະກິດ-ສັງຄົມ, ວຽກງານອົງການການຄ້າໂລກ, ວຽກງານວັດທະນະທຳ - ສັງຄົມ ແລະ ວຽກງານອື່ນໆ ທີ່ມີຄວາມສໍາຄັນ ແລະ ຈໍາເປັນ ສໍາລັບນັກການທູດ ຜູ້ທີ່ຈະໄປປະຈຳການ ແລະ ສາມາດນຳເອົາບົດຮຽນດັ່ງກ່າວ ໄປຜັນຂະຫຍາຍ ເຂົ້າໃນການເຄື່ອນໄຫວວຽກງານການທູດຢູ່ຕ່າງປະເທດ ໃຫ້ປະສົບຜົນສຳເລັດ ແລະ ສາມາດຍາດໄດ້ຜົນປະໂຫຍດ ສູງສຸດມາໃຫ້ແກ່ປະເທດຊາດ. ຕະຫລອດໄລຍະເວລາການຝຶກອົບດັ່ງກ່າວ ໄດ້ມີອາຈານຮັບເຊີນ ຈາກຫຼາຍພາກສ່ວນ ມາຂຶ້ນຫ້ອງບັນຍາຍ ເປັນຕົ້ນ: ກະຊວງອຸດສາຫະກຳ ແລະ ການນຄ້າ, ກະຊວງແຜນການ ແລະ ການລົງທຶນ, ກະຊວງ ຖະແຫຼງຂ່າວ, ທ່ອງທ່ຽວ ແລະ ວັດທະນະທຳ ແລະ ກົມຕ່າງໆ ພາຍໃນກະຊວງການຕ່າງປະເທດ. ນອກຈາກນັ້ນ, ກໍໄດ້ຮັບຟັງການໂອ້ລົມຈາກ ທ່ານ ສະເຫຼີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ໃນຫົວຂໍ້: “ການເມືອງແນວຄິດ ແລະ ຄວາມສາມັກຄີພາຍໃນ”.
ໃນພິທີດັ່ງກ່າວ, ທ່ານ ທອງຜ່ານ ສະຫວັນເພັດ, ປະທານພິທີ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບຊຸດຮຽນ ກໍຄືຄະນະສະຖາບັນການຕ່າງປະເທດ ພ້ອມດ້ວຍຄູອາຈານ ທີ່ໄດ້ເອົາໃຈໃສ່ສິດສອນ ແລະ ສາມາດຍົກ ລະດັບຄວາມຮູ້ໃຫ້ແກ່ນັກສຳມະນາກອນ, ນອກຈາກນັ້ນ ທ່ານໄດ້ໃຫ້ກຽດໂອ້ລົມຕໍ່ນັກສຳມະນາກອນ ທີ່ສຳເລັດການຝຶກອົບຮົມໃນຄັ້ງນີ້ ໂດຍຍົກໃຫ້ເຫັນເຖິງບົດບາດຄວາມສຳຄັນຂອງນັກການທູດຄື: ຕ້ອງເຊື່ອມຊຶມ ແລະ ຍຶດໝັ້ນ ໃນແນວທາງການຕ່າງປະເທດຂອງລາວ ເພື່ອນຳມາໝູນໃຊ້ເຂົ້າໃນວຽກງານຂອງຕົນ ແນ່ໃສ່ຈັດຕັ້ງປະຕິບັດແນວທາງ ນະໂຍບາຍ ຂອງພັກ - ລັດ ໃຫ້ປະກົດຜົນເປັນຈິງ, ຕ້ອງຕັ້ງໜ້າຈັດຕັ້ງປະຕິບັດໜ້າທີ່ຂອງຕົນ ເພື່ອເຄື່ອນໄຫວເຜີຍແຜ່ ແຜນພັດທະນາເສດຖະກິດ - ສັງຄົມ ຂອງລັດຖະບານ ຕໍ່ສາກົນ ແນ່ໃສ່ຍາດແຍ່ງເອົາການຮ່ວມມື, ການຊ່ວຍເຫຼືອ ຈາກຕ່າງປະເທດ ໃຫ້ໄດ້ຫຼາຍທີ່ສຸດເທົ່າທີ່ຈະຫຼາຍໄດ້. ພ້ອມດຽວກັນນີ້, ທ່ານປະທານພິທີ ຍັງໄດ້ກ່າວຕື່ມວ່າ ຄວາມຮູ້ພື້ນຖານຕ່າງໆ ທີ່ໄດ້ຮັບໃນການຝຶກອົບຮົມເທື່ອນີ້ ຈະຊ່ວຍໃຫ້ຜູ້ເຂົ້າຝຶກອົບຮົມ ສາມາດນຳໃຊ້ເປັນພື້ນຖານ ແລະ ບ່ອນອີງໃນການປະຕິບັດໜ້າທີ່ຂອງຕົນ ໃຫ້ສຳເລັດໄດ້ຕາມການມອບໝາຍຂອງຂັ້ນເທິງ.
ການຝຶກອົບຮົມໃນເທື່ອນີ້ ຖືວ່າໄດ້ຮັບຜົນສຳເລັດເປັນຢ່າງດີ ກໍຍ້ອນມີການຊີ້ນຳຢ່າງໃກ້ຊິດຈາກ ຄະນະພັກ, ຄະນະນຳ ກະຊວງການຕ່າງປະເທດ, ເຊິ່ງສາມາດບັນລຸໄດ້ຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ທັງເປັນການ ຍົກລະດັບຄວາມຮັບຮູ້ໃຫ້ແກ່ພະນັກງານການທູດກ່ອນໄປປະຈຳການ ໄດ້ເປັນຢ່າງດີ.