ໃນວັນ​ທີ 31 ຕຸລາ 2016, ທີ່ ກະຊວງການຕ່າງປະເທດ, ທ່ານ ນ. ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນ. ຣີນາ ບິດເຕີ (Ms. Rina Bitter) ເອກອັກຄະລັດຖະທູດແຕ່ງຕັ້ງ ແຫ່ງ ສະຫະລັດ ອາເມລິກາ ຄົນໃໝ່ ປະຈຳ ສປປ ລາວ, ກ່ອນຈະຢືນສານຕາຕັ້ງຕໍ່ປະທານປະເທດ ແຫ່ງ ສປປ ລາວ.

ທ່ານຮອງ​ລັດຖະມົນຕີ​ກະຊວງ​ການ​ຕ່າ​ງປ​ະເທດ ​ໄດ້​ສະ​​ແດງ​ຄວາມ​ຍິນ​ດີ​ຕ້ອນຮັບ ​ແລະຊົມ​ເຊີຍ​ຕໍ່​ທ່ານ ນາງ ຣີນາ ບິດເຕີ (Ms. Rina Bitter) ທີ່ໄດ້ຮັບການແຕ່ງຕັ້ງເປັນເອກ​ອັກຄະ​ລັດຖະທູດ ແຫ່ງ ສະຫະລັດອາເມລິກາ ປະຈຳ ສປປ ລາວ ພ້ອມ​ທັງ​ສະ​ແດງ​ຄວາມ​ເຊື່ອ​ໝັ້ນ​ວ່າ ​ໃນ​ໄລຍະ​ການ​ປະຕິບັດ​ວຽກ​ງານ​ການ​ທູດ​ຂອງ​ທ່ານ​ຈະ​ປະກອບສ່ວນ​ເສີມ​ສ້າງ ​ແລະ ​ເພີ່ມ​ທະວີ​ການ​ພົວພັນ​ຮ່ວມ​ມືລະຫວ່າງ​ສອງ​ປະ​ເທດ ​ໃຫ້​ນັບ​ມື້​ນັບ​ຂະ ຫຍາຍຕົວ​ດີ​ຂຶ້ນ ແລະ ທັງສອງຝ່າຍຍັງໄດ້ຕີລາຄາສູງຕໍ່ການດຳເນີນການຢ້ຽມຢາມຄັ້ງປະຫວັດສາດ ຂອງປະທານາທິບໍດີ ບາຣັກ ໂອບາມາ ແຫ່ງ ສະຫະລັດ ອາເມລິກາ ຢູ່ ສປປ ລາວ ທີ່ໄດ້ເປັນການເປີດສັງກາດໃໝ່ ທັງເປັນນິມິດໝາຍອັນດີ ໃຫ້ແກ່ການເພີ້ມທະວີ ການພົວພັນຮ່ວມມືລະຫວ່າງ ສອງປະເທດ ແລະ ປະຊາຊົນສອງຊາດ ລາວ-ອາເມລິກາ ໃນອະນາຄົດ.

ທ່ານ ນາງ ຣີນາ ບິດເຕີ ຍັງໄດ້ກ່າວວ່າ ໃນໄລຍະການປະຕິບັດໜ້າທີ່ການທູດຢູ່ລາວ, ທ່ານຈະຕັ້ງໜ້າປະຕິບັດປະກອບສ່ວນເຂົ້າໃນການເພີ່ມທະວີສາຍພົວພັນ ແລະ ການຮ່ວມມືລະຫວ່າງສອງປະເທດ ໃຫ້ມີບາດກ້າວຂະຫຍາຍຕົວຍິ່ງຂຶ້ນ.

ທ້າຍ​ສຸດ, ທ່ານຮອງ​ລັດຖະມົນຕີ​ກະຊວງ​ການ​ຕ່າ​ງປ​ະເທດ, ​ໄດ້​ອວຍ​ພອນໄຊ​ໃຫ້​ແກ່​ທ່ານ​ເອກ​ອັກຄະ​ລັດຖະທູດທັງສອງຈົ່ງ​ປະສົບ​ຜົນສຳ​ເລັດ​ໃນ​ການ​ປະຕິບັດ​ໜ້າ​ທີ່​ການ​ທູດ​ຂອງ​ຕົນຢູ່ສປປລາວ.