ໃນວັນ​ທີ 31 ຕຸລາ 2016, ທີ່ ກະຊວງການຕ່າງປະເທດ, ທ່ານ ນ. ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນ. ໂດນິກາ ປ໋ອດເຕີ (Ms. Donica Pottie) ເອກອັກຄະລັດຖະທູດແຕ່ງຕັ້ງ ແຫ່ງ ການາດາ ຄົນໃໝ່ ປະຈຳ ສປປ ລາວ, ກ່ອນຈະຢື່ນສານຕາຕັ້ງຕໍ່ປະທານປະເທດ ແຫ່ງ ສປປ ລາວ.

ທ່ານ ຮອງ​ລັດຖະມົນຕີ​ກະຊວງ​ການ​ຕ່າ​ງປ​ະເທດ ​ໄດ້​ສະ​​ແດງ​ຄວາມ​ຍິນ​ດີ​ຕ້ອນຮັບ ​ແລະຊົມ​ເຊີຍ​ຕໍ່​ເອກ​ອັກຄະ​ລັດຖະທູດແຕ່ງຕັ້ງ ແຫ່ງ ການາດາ ພ້ອມ​ທັງ​ສະ​ແດງ​ຄວາມ​ເຊື່ອ​ໝັ້ນ​ວ່າ ​ໃນ​ໄລຍະ​ການ​ປະຕິບັດ​ໜ້າທີ່ການ​ທູດ​ຢູ່ ສປປ ລາວ ຂອງ​ທ່ານທູດ​ປະກອບສ່ວນເຂົ້າໃນການ​ເສີມ​ສ້າງ ​ແລະ ​ເພີ່ມ​ທະວີ​ການ​ພົວພັນ​ຮ່ວມ​ມືລະຫວ່າງ​ສອງ​ປະ​ເທດ ​ໃຫ້​ນັບ​ມື້​ນັບ​ຂະຫຍາຍຕົວ​ດີ​ຂຶ້ນ ແລະ ທັງສອງຝ່າຍຍັງໄດ້ກ່າວເຖິງຜົນສຳເລັດ ຂອງ ທ່ານ ສະເຕຟານ ດີອອນ, ລັດຖະມົນຕີຕ່າງ ປະເທດການາດາທີ່ໄດ້ເດີນທາງມາເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນທີ່ ສປປ ລາວ ແລະ ເຂົ້າຮ່ວມພິທີເປີດຫ້ອງການຕາງໜ້າການທູດການາດາ ປະຈຳ ນະຄອນຫຼວງວຽງຈັນ ຢ່າງເປັນທາງການອີກດ້ວຍ.

ທ່ານ ນ. ໂດນິກາ ປ໋ອດເຕີ (Ms. Donica Pottie) ຍັງໄດ້ກ່າວວ່າ ໃນໄລຍະການປະຕິບັດໜ້າທີ່ການທູດຢູ່ລາວທ່ານຈະຕັ້ງໜ້າປະຕິບັດປະກອບສ່ວນເຂົ້າໃນການເພີ່ມທະວີສາຍພົວພັນ ແລະ ການຮ່ວມມືລະຫວ່າງສອງປະເທດ ໃຫ້ມີຄວາມເຂັ້ມແຂງ ແລະ ມີບາດກ້າວຂະຫຍາຍຕົວຍິ່ງຂຶ້ນ.

ທ້າຍ​ສຸດ, ທ່ານຮອງ​ລັດຖະມົນຕີ​ກະຊວງ​ການ​ຕ່າ​ງປ​ະເທດ, ​ໄດ້​ອວຍ​ໄຊ​ໃຫ້​ພອນ​ແກ່​ທ່ານ​ເອກ​ອັກຄະ​ລັດຖະທູດທັງສອງຈົ່ງ​ປະສົບ​ຜົນສຳ​ເລັດ​ໃນ​ການ​ປະຕິບັດ​ໜ້າ​ທີ່​ການ​ທູດ​ຂອງ​ຕົນຢູ່ສປປລາວ.