ວັນທີ 01 ພະຈິກ 2016, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ຂອງ ສປປ ລາວ ພ້ອມດ້ວຍບັນດາການ​ນໍາຂັ້ນ​ແຂວ​ງ ​ແລະ ຄະນະຜູ້ແທນຈາກກະຊວງຂະ​ແໜງ​ການ ຂັ້ນ​ສູນ​ກາງ ​ແລະ ຈາກແຂວງຈໍາປາ​ສັກ, ​​ແຂວງ​ສາລະ​ວັນ, ແຂວງ​ເຊ​ກອງ ​ແລະ ​ແຂວງ​ອັດ​ຕະປື​ ໄດ້​ເຂົ້າ​ຮ່ວມກອງ​ປະຊຸມ​ເຈົ້າໜ້າທີ່ອາວຸໂສ ​ເຂດ​ສາມຫລ່ຽມ​ພັດທະນາ ກຳປູ​ເຈຍ-ລາວ​-ຫວຽດນາມ ຄັ້ງທີ 11 ​ທີ່ ​ແຂວງ ດັກນົງ, ສສ ຫວຽດນາມ ໂດຍການເປັນປະທານຂອງ ທ່ານ ຫງຽນ ເທ ເຟື່ອງ, ຮອງລັດຖະມົນຕີກະຊວງແຜນການ ແລະ ການລົງທຶນ ຂອງ ສສ ຫວຽດນາມ. ​

ກອງ​ປະຊຸມ​ໄດ້​ຕີ​ລາຄາ​ສູງຕໍ່​ ຄວາມ​ຄືບ​ໜ້າ​ໃນ​ການຈັດ​ຕັ້ງ​ປະຕິບັດ​ແຜນ​ແມ່​ບົດ ວ່າດ້ວຍ ການ​ພັດທະນາ​ເສດຖະກິດ-ສັງຄົມ ​ໃນ​ເຂດ​ສາ​ມຫລ່ຽມພັດທະນາ ຮອດ​ປີ 2020 ແລະ ບົດ​ບັນທຶກ​ຄວາມ​ເຂົ້າ​ໃຈ ວ່າດ້ວຍ ນະໂຍບານດຶງດູດກ່ວາເກົ່າ ກໍ່ຄື ການຜັນຂະຫຍາຍຂໍ້ຕົກລົງຂອງຜູ້ນໍາສາມປະເທດ ໃນກອງປະຊຸມສຸດຍອດ ກໍາປູ​ເຈຍ-ລາວ-ຫວຽດນາມ ຄັ້ງ​ທີ 8 ໃນປີ 2014 ທີ່ ນະຄອນຫຼວງວຽງຈັນ ແລະ ກອງປະຊຸມລັດຖະມົນຕີ ຄະນະກໍາມະການປະສານງານຮ່ວມ ຂອງຂອບການຮ່ວມມືດັ່ງກ່າວ ຄັ້ງທີ 11 ໃນເດືອນພະຈິກ 2015 ທີ່ແຂວງຈຳປາສັກ ຜ່ານມາ, ເຊິ່ງ​ມີຫລາຍ​ໂຄງການພັດທະນາ​​ໄດ້​ຮັບ​ການຈັດ​ຕັ້ງ​ປະຕິບັດ​ເປັນ​ກ້າວໆ ເປັນຕົ້ນ: ​ໂຄງການ​ປັບປຸງ ​ແລະ ຍົກ​ລະດັບເສັ້ນທາງ​ເຊື່ອມ​ຈອດ ລະຫວ່າງ​ບັນດາ​ບ້ານ, ​ເມືອງ ​ແລະ ​ແຂວງ, ການ​ກໍ່ສ້າງ​ໂຮງຮຽນ, ​ໂຮງໝໍ, ສຸກສາລາ ​ແລະ ສິ່ງ​ອຳນວຍ​ຄວາມ​ສະດວກ​ອື່ນ​ໆ, ອັນໄດ້ປະກອບສ່ວນສຳຄັນເຂົ້າໃນ​ການ​ສົ່ງ​ເສີມ​ການ​ຄ້າ, ການ​ລົງທຶນ, ການທ່ອງທ່ຽວ ​ແລະ ສົ່ງ​ເສີມ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃນ​ຂົງ​ເຂ​ດດັ່ງກ່າວ​ໃຫ້​ດີ​ຂຶ້ນເທື່ອລະກ້າວ. ພ້ອມ​ດຽວ​ກັນ​ນີ້, ກອງ​ປະຊຸມ ​ຍັງ​ໄດ້​ປຶກສາ​ຫາລື ກ່ຽວ​ກັບ ບັນດາ​ເອກະສານ​ຕ່າງໆ​ເພື່ອ​ກະກຽມ​ໃຫ້​ແກ່​ກອງ​ປະຊຸມ​​ສຸດ​ຍອດ ​ກຳປູ​ເຈຍ-ລາວ-ຫວຽດນາມ ຄັ້ງ​ທີ 10 ເຊິ່ງ​ຈະ​ຈັດ​ຂຶ້ນ ​​ໃນວັນ​ທີ 23 ພະຈິກ 2016 ທີ່ ສຽມລຽບ, ກໍາປູເຈຍ. ອັນພົ້ນເດັ່ນ ​​ແມ່ນໄດ້ເປັນເອກະພາບສະເໜີໂຄງການບູລິ​ມະ​ສິດ​ 15 ໂຄງການ (ປະ​ເທດ​ລະ 5 ​ໂຄງການ) ​ເພື່ອ​ສະ​ເໜີຕໍ່​ຜູ້​ນໍາ 3 ປະ​ເທດ ຮັບຮອງ​ເອົາ​ຢູ່​ໃນ​ກອງ​ປະຊຸມ​ສຸດ​ຍອດ​ທີ່​ຈະ​ມາ​ເຖິງ​ນີ້.

​   ​ໂອກາດ​ນີ້, ເພື່ອ​ກະກຽມໃຫ້ແກ່​ກອງ​ປະຊຸມ​​ເຈົ້າໜ້າທີ່ອາວຸໂສຄັ້ງ​ນີ້, ​ໃນ​ວັນ​ທີ 31 ຕຸລາ 2016 ​​​ໄດ້​ມີກອງປະຊຸມ 4 ອະນຸກໍາມະການດ້ານຄວາມໝັ້ນຄົງ ແລະ ວຽກງານການຕ່າງປະເທດ ຄັ້ງທີ 9, ກອງປະຊຸມອະນຸກຳມະການດ້ານເສດຖະກິດ ຄັ້ງທີ 9, ກອງປະຊຸມອະນຸກຳມະການດ້ານສັງຄົມ ແລະ ສິ່ງແວດລ້ອມ ຄັ້ງທີ 7 ແລະ ກອງປະຊຸມອະນຸກຳມະການປະສານງານລະດັບແຂວງ ຄັ້ງທີ 8 ທີ່ ​ແຂວງ ດັກ​ນົງ ​ເຊັ່ນ​ກັນ ເພື່ອທົບທວນຄືນຄວາມຄືບໜ້າ ແລະ ກໍານົດທິດທາງການຮ່ວມມືໃນແຕ່ລະດ້ານ ຂອງຂອບການຮ່ວມມືດັ່ງກ່າວ.

ໃນ​​ໄລຍະ​ເຂົ້າ​ຮ່ວມກອງ​ປະຊຸມ​ດັ່ງກ່າວ, ອໍານາດ​ການ​ປົກຄອງ​ແຂວງ​ດັກ​ນົງ ​ໄດ້​ຈັດ​ຕັ້ງນໍາພາ​ຄະນະ​ຜູ້​ແທນ​ຈາກ 3 ປະ​ເທດ ກໍາປູ​ເຈຍ, ສປປ ລາວ ​ແລະ ສສ ຫວຽດນາມ ​ໄປຢ້ຽມ​ຊົມ ບໍລິສັດ​ຜະລິດ​ອະລູມີ​ນຽມ ທີ່​ໃຫຍ່​ທີ່​ສຸດ ​ໃນ​ແຂວງ​ດັກ​ນົງ.

ກອງ​ປະຊຸມ​​ເຈົ້າ​ໜ້າ​ທີ່​ອາວຸ​ໂສ CLV ໄດ້​ຮັບຮອງ ​​ແລະ ລົງ​ນາມ​ບົດ​ບັນທຶກ​ກອງ​ປະຊຸມ​ເຈົ້່າໜ້າທີ່ອາວຸໂສ​ເຂດ​ສາມຫລ່ຽມ​ພັດທະນາ ກຳ​ປູ​ເຈຍ-ລາວ-ຫວຽດນາມ ຄັ້ງ​ທີ 11​ ເພື່ອ​ລາຍງານຕໍ່ກອງປະຊຸມສຸດຍອດ ກຳປູ​ເຈຍ-ລາວ-ຫວຽດນາມ ຄັ້ງ​ທີ 10 ທີ່ຈະມາເຖິງນີ້.