ໃນຕອນເຊົ້າຂອງວັນທີ 13 ມັງກອນ 2017, ທີ່ ສະຖານທູດເຢຍລະມັນ ປະຈຳ ລາວ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ນຳພາຄະນະເຂົ້າຮ່ວມເຊັນປື້ມໄຫວ້ອາໄລ ແດ່ດວງວິນຍານຂອງ ທ່ານ Roman Herzog, ອະດີດປະທານາທິບໍດີ ແຫ່ງ ສາທາລະນະລັດ ສະຫະພັນ ເຢຍລະມັນ (1994-1999) ທີ່ໄດ້ເຖິງແກ່ມໍລະນະກຳ ໃນວັນທີ 10 ມັງກອນ 2017.
ເນື້ອໃນຂອງສານໄຫວ້ອາໄລມີດັ່ງນີ້:
ພວກຂ້າພະເຈົ້າ ຂໍສະແດງຄວາມເສົ້າໂສກເປັນຢ່າງຍິ່ງ ທີ່ໄດ້ຮັບຊາບຂ່າວເຖິງການມໍລະນະກຳຂອງ ທ່ານ Roman Herzog, ອະດີດປະທານາທິບໍດີ ແຫ່ງ ສາທາລະນະລັດ ສະຫະພັນ ເຢຍລະມັນ, ໃນວັນອັງຄານ ທີ 10 ມັງກອນ2017.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພວກຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງ ມາຍັງລັດຖະບານ ແລະ ປະຊາຊົນ ແຫ່ງ ສາທາລະນະລັດ ສະຫະພັນ ເຢຍລະມັນ ກໍຄືຄອບຄົວຂອງ ທ່ານອະດີດປະທານາທິບໍດີ Roman Herzog ຊຶ່ງເປັນຜູ້ທີ່ໄດ້ປະກອບສ່ວນອັນສຳຄັນ ເຂົ້າໃນການພັດທະນາປະເທດເຢຍລະມັນ.