ໂດຍຕອບສະໜອງຕາມການເຊື້ອເຊີນຂອງ ພະນະທ່ານ Abdullah bin Zayed Al Nahyan, ລັດຖະມົນຕີກະຊວງການຕ່າງປະເທດ ແລະ ການຮ່ວມມືສາກົນ ຂອງ ສະຫະລັດ ອາຣັບ ເອມີເລດ, ຄະນະຜູ້ແທນ ແຫ່ງ ສປປ ລາວ ນໍາໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ຈະໄດ້ເດີນທາງເຂົ້າຮ່ວມກອງປະຊຸມລັດຖະມົນຕີຕ່າງປະເທດ ເວທີປຶກສາຫາລືຂອບການຮ່ວມມືອາຊີ ຫຼື ເອຊີດີ ຄັ້ງທີ 15 (15th Asia Cooperation Dialogue (ACD) Ministerial Meeting), ໃນລະຫວ່າງວັນທີ 14-17 ມັງກອນ 2017, ທີ່ ອາບູດາບີ, ປະເທດ ສະຫະລັດ ອາຣັບ ເອມີເລດ.
ທີ່ກອງປະຊຸມລັດຖະມົນຕີຕ່າງປະເທດ ເອຊີດີ ນີ້, ບັນດາຜູ້ນໍາສະມາຊິກເອຊີດີຈະໄດ້ຮ່ວມກັນປຶກສາຫາລື ບັນຫາດ້ານການຄ້ຳປະກັນພະລັງງານ ແລະ ນ້ຳ, ການນຳໃຊ້ພະລັງງານໃນການພັດທະນາແບບຍືນຍົງ, ການຄົ້ນຄ້ວາ ແລະ ການພັດທະນາ ແລະ ຍັງຈະຮັບຮອງເອົາບັນດາຖະແຫຼງການທີ່ສໍາຄັນຈໍານວນໜື່ງ ເພື່ອເປັນການກໍານົດອານາຄົດຮ່ວມກັນຂອງອາຊີ.
ເວທີປຶກສາຫາລືຂອບການຮ່ວມມື ເອຊີດີ ໄດ້ຮັບການສ້າງຕັ້ງຂື້ນໃນປີ 2002. ຊຶ່ງປະຈຸບັນມີສະມາຊິກທັງໜົດ 34 ປະເທດ ແລະ 12 ຂະແໜງການຮ່ວມມື ທີ່ໄດ້ມີການເຄື່ອນໄຫວປົກກະຕິ ເຊັ່ນ: ກະສິກໍາ,ສຶກສາ, ພະລັງງານ, ສິ່ງແວດລ້ອມ, ການເງິນ, ພັດທະນາຊັບພະຍາກອນມະນຸດ, ຂໍ້ມູນຂ່າວສານ, ໄພພິບັດ, ການຫຼຸດຜ່ອນຄວາມທຸກຍາກ, ຄວາມປອດໄພໃນການຂັບຂີ່, ທ່ອງທ່ຽວ ແລະ ການຮ່ວມມືດ້ານເຊື່ອມຈອດ.