ໃນຕອນບ່າຍວັນທີ 20 ກຸມພາ 2017, ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີ ກະຊວງການຕ່າງປະເທດ ​ໄດ້​ຕ້ອນຮັບ​ການ​ເຂົ້າ​ພົບ​ປະຂອງ ພະລາຊິນີ ມາທິນເດີ ແຫ່ງ ປະເທດແບນຊິກ, ປະທານກິດຕິມະສັກ ຄະນະກຳມະການແຫ່ງຊາດ ສຳລັບອົງການອຸຍນີເຊບຂອງປະເທດແບນຊິກ ພ້ອມດ້ວຍຄະນະ ​ໃນ​ໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 20-23 ກຸມພາ 2017 ໃນຂອບການຮ່ວມມືຂອງອົງການອຸຍນີເຊບ. ໃນການພົບປະຄັ້ງນີ້ ທັງສອງຝ່າຍແມ່ນໄດ້ປຶກສາຫາລືກັນ ກ່ຽວກັບ ແຜນການຮ່ວມມື ລະຫວ່າງ ສປປ ລາວ ແລະ ອົງການອຸຍນີເຊບ ໂດຍສະເພາະ ການສະໜັບສະໜູນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ຂອງລັດຖະບານ ໂດຍສະເພາະ ການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ເພື່ອກ້າວໄປສູ່ການຫຼຸດພົ້ນອອກຈາກ ສະຖານະພາບ ປະເທດດ້ອຍພັດທະນາ.

       ການຢ້ຽມຢາມຂອງພະລາຊິນີ ມາທິນເດີ ໃນຄັ້ງນີ້ ແມ່ນເປັນຄັ້ງທຳອິດຂອງລາຊະວົງແບນຊິກ, ເຊິ່ງສົມເດັດພະລາຊິນີ ກໍສະແດງຄວາມຂອບອົກຂອບໃຈ ຕໍ່ການຕ້ອນຮັບຢ່າງອົບອຸ່ນຂອງ ສປປ ລາວ ແລະ ຕີລາຄາສູງຕໍ່ກັບການຮ່ວມມື ລະຫວ່າງ ອົງການອຸຍນີເຊບ ແລະ ສປປ ລາວ ຕະຫຼອດໄລຍະທີ່ຜ່ານມາ. ອົງການອຸຍນີເຊບ ໄດ້ຈັດຕັ້ງປະຕິບັດແຜນງານສົກປີ 2012-2016 ເປັນມູນຄ່າລວມເຖິງ 49 ລ້ານກວ່າໂດລາສະຫະລັດ ແລະ ສຳລັບສົກປີ 2017-2021 ລວມເປັນມູນຄ່າ 70,5 ລ້ານໂດລາສະຫະລັດ, ໂດຍຈະສຸມໃສ່ 7 ແຜນງານໃຫຍ່ຄື: ການປົກປ້ອງທາງດ້ານສັງຄົມ, ການປ່ຽນແປງດິນຟ້າອາກາດ ແລະ ໄພພິບັດ, ດ້ານການສຶກສາ, ດ້ານສາທາລະນະສຸກ ແລະ ດ້ານນຳ້ສະອາດ, ດ້ານໂພສະນາການ, ສະຖາບັນການສຶກສາ ແລະ ນະໂຍບາຍ, ແລະ ຄວາມຍຸຕິທຳ.

            ໃນການມາຢ້ຽມຢາມ ສປປ ລາວ ຄັ້ງນີ້, ພະລາຊິນີ ມາທິນເດີ ຈະໄດ້ເດີນທາງໄປຢ້ຽມຢາມ ແລະ ຕິດຕາມໂຄງການ ທີ່ໄດ້ຈັດຕັ້ງປະຕິບັດ ລະຫວ່າງ ສປປ ລາວ ແລະ ອົງການອຸຍນີເຊບ ທີ່ແຂວງ ສາລະວັນ ແລະ ຈຳປາສັກ ໂດຍການນຳພາຂອງ ທ່ານ ນາງ ປອ. ອິນລາວັນ ແກ້ວບຸນພັນ, ປະທານສູນກາງສະຫະພັນແມ່ຍິງ.