ໃນວັນທີ 29 ມີນາ 2017, ກະຊວງ​ການ​ຕ່າງປະ​ເທດ ​ແຫ່ງ ສປປ ລາວ ໄດ້ເປັນເຈົ້າພາບຈັດ​ກອງ​ປະຊຸມເຈົ້າໜ້າທີ່ອາວຸໂສ ອາຊຽນ-ລັດເຊຍ ຄັ້ງທີ 14​ ຂຶ້ນ, ​ທີ່​ ໂຮງແຮມລາວພລາຊາ, ນະຄອນຫຼວງ​ວຽງ​ຈັນ, ພາຍ​ໃຕ້​ການ​ເປັນ​ປະທານ​ຮ່ວມ​ຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕິ​ກະຊວງ​ການ​ຕ່າງປະ​ເທດ ທັງ​ເປັນ​ຫົວໜ້າ​ເຈົ້າໜ້າທີ່​ອາວຸ​ໂສ​ອາຊຽນຂອງ ສປປ ລາວ ແລະ ທ່ານ ອີກໍ ມໍກູລອບ (Igor V. Morgulov), ຮອງລັດຖະມົນຕິ​ກະຊວງ​ການ​ຕ່າງປະ​ເທດ ທັງ​ເປັນ​ຫົວໜ້າ​ເຈົ້າໜ້າທີ່​ອາວຸ​ໂສ​ອາຊຽນຂອງ ສະຫະພັນລັດເຊຍ.

ກອງປະຊຸມໄດ້ຕີລາຄາຄືນຄວາມຄືບໜ້າການຮ່ວມມື ລະຫວ່າງ ອາຊຽນ ແລະ ລັດເຊຍ ໃນໄລຍະຜ່ານມາ ໂດຍສະເພາະແມ່ນ ສືບຕໍ່ຕິດຕາມການຈັດຕັ້ງປະຕິບັດຜົນກອງປະຊຸມສຸດຍອດສະເຫຼີມສະຫຼອງການພົວພັນ ອາຊຽນ-ລັດເຊຍ ຄົບຮອບ 20 ປີ ເຊິ່ງໄດ້ຈັດຂຶ້ນໃນວັນທີ 19-20 ພຶດສະພາ 2016 ທີ່ ໂຊຈິ, ລັດເຊຍ. ໃນນັ້ນ, ກອງປະຊຸມໄດ້ປຶກສາຫາລືກ່ຽວກັບຂົງເຂດບູລິມະສິດສໍາລັບການຮ່ວມມື ໂດຍອີງໃສ່ບັນດາຂໍ້ສະເໜີແນະຂອງໜ່ວຍງານຜູ້ຊົງຄຸນວຸດທິ ອາຊຽນ-ລັດເຊຍ ແລະ ວາງທິດທາງສຳລັບການຮ່ວມມືໃນຕໍ່ໜ້າ ທີ່ກວມເອົາຂົງເຂດການເມືອງຄວາມໝັ້ນຄົງ, ເສດຖະກິດ ແລະ ວັດທະນະ ທຳ-ສັງຄົມ. ກອງປະຊຸມໄດ້ຊຸກຍູ້ໃຫ້ບັນດາຂະແໜງການຂອງ ອາຊຽນ ແລະ ລັດເຊຍ ຮ່ວມມື ແລະ ປະສານງານກັນຢ່າງໃກ້ຊິດ ເພື່ອຮັບປະກັນການຈັດຕັ້ງປະຕິບັດແຜນປະຕິບັດງານ ອາຊຽນ-ລັດເຊຍ ສະບັບປີ 2016-2020 ຢ່າງມີປະສິດທິຜົນ ແນໃສ່ປະກອບສ່ວນເຂົ້າໃນການຍົກລະດັບການພົວພັນອາຊຽນ-ລັດເຊຍ ຂຶ້ນສູ່ລະດັບຍຸດທະສາດໃນອະນາຄົດ.

ໃນກອງປະຊຸມ ຄະນະຜູ້ແທນຂອງອາຊຽນ ແລະ ລັດເຊຍ ໄດ້ປຶກສາຫາລື ການກະກຽມສຳລັບກອງປະຊຸມລັດຖະມົນຕີີການຕ່າງປະເທດ ອາຊຽນ-ລັດເຊຍ ທີ່ຈະຈັດຂຶ້ນໃນເດືອນ ສິງຫາ 2017 ທີ່ ຟີລິບປິນ ແລະ ຍັງໄດ້ແລກປ່ຽນທັດສະນະຕໍ່ບັນຫາພາກພື້ນ ແລະ ສາກົນ ທີ່ສອງຝ່າຍມີຜົນປະໂຫຍດ ແລະ ມີຄວາມສົນໃຈຮ່ວມກັນ.

ປັດຈຸບັນ ສປປ ລາວ ເຮັດໜ້າທີ່ເປັນປະເທດປະສານງານ ສຳລັບການພົວພັນ ອາຊຽນ-ລັດເຊຍ ໃນໄລຍະ 3 ປີ ເຊິ່ງຈະສືບຕໍ່ໜ້າທີ່ດັ່ງກ່າວຈົນເຖິງ ເດືອນສິງຫາ 2018.