ໃນ​ວັນ​ທີ 24 ​ເມສາ​ນີ້ ຢູ່ ນະຄອນຫລວງ​ວຽງ​ຈັນ, ບັນດາ​ສະມາຊິກ​ພັກ,​ ພະນັກງານ​ຫລັກ​ແຫ​ລ່ງ ພາຍ​ໃນ​ກະຊວງ ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ ​ສູນ​ກາງ​ພັກ ຈຳນວນ 50 ຄົນ ​ໄດ້​​ເຂົ້າຮ່ວມ​ການ​ຝຶກ​ອົບຮົມ​ ທິດ​ສະ​ດີກາ​ນ​ເມືອງ-ການ​ປົກຄອງ ​ໄລຍະ​ສັ້ນ 45 ວັນຊຸດ​ທີ I (24/4/2017-28/6/2017) ​ເພື່ອ​ຍົກ​ລະດັບ ​ຄວາມ​ຮູ້​ພື້ນຖານ ​ທາງ​ດ້ານ​ທິດ​ສະ​ດີ ກາ​ນ​ເມື​ອງ-ການ​ປົກຄອງ, ຄົ້ນຄວ້າຮ່ຳຮຽນທິດ​ສະ​ດີ​ ມາກ-​ເລ​ນິນ, ​ແນວທາງ​ການ​ປ່ຽນ​ແປງ​ໃໝ່ຂອງ​ພັກ​ ໃນ​ແຕ່ລະ​ໄລຍະ ​ແນ່​ໃສ່​ເຮັດ​ໃຫ້​ ພະນັກງານ​ນຳພາ-ຄຸ້ມ​ຄອງ, ພະນັກງານ​ສືບ​ທອດ ກໍ​ຄື ສະມາຊິກ​ພັກ,​ ພະນັກງານ​ຫລັກ​ແຫ​ລ່ງ ​ມີ​ວິທີ​ການ​ເຮັດ​ວຽກ​ທີ່​ຖືກ​ຕ້ອງ ​ແລະ ຮູ້​ໝູນ​ໃຊ້ບັນດາ​ບົດຮຽນ​ດັ່ງກ່າວ​ ເຂົ້າ​ໃນ​ໜ້າ​ທີ່​ວຽກ​ງານ ​ຂອງ​ຕົນ​ຢ່າງ​ມີ​ປະສິດທິ​ຜົນ.

ທ່ານ ​ແສງ​ເພັດ ຮຸ່ງບຸນ​ຍວງ ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ ​ກ່າວ​ວ່າ: ການ​ຝຶກ​ອົບ ຮົມ​ນີ້ ​ແມ່ນ​ການ​ຜັນ​ຂະຫຍາຍ​ມະຕິ ຂອງ​ກອງ​ປະຊຸມ​ວຽກ​ງານ​ ການ​ຕ່າງປະ​ເທດ ຄັ້ງທີ 13, ​ແຜນ​ບຳລຸງ-ກໍ່ສ້າງ​ພະນັກງານ​ ຂອງ​ກະຊວງ​ການ​ຕ່າງປະ​ເທດ ​ເພື່ອ​​ເຮັດ​ໃຫ້ການ​ ປະຕິບັດ​ໜ້າ​ທີ່​ວຽກ​ງານ ພາຍ​ໃນ​ກະຊວງ ​ໃຫ້​ມີ​ປະສິດທິ​ພາບ ສູງ​ຂຶ້ນ​ກວ່າ​ເກົ່າ ຕາມ​ຄຳ​ຂວັນ ​ຂອງກອງ​ປະຊຸມ​ວຽກ​ງານ ​ການ​ຕ່າງປະ​ເທດ ດັ່ງກ່າວວາງ​ອອກ ຄື : “ຍົກ​ສູງ​ຄວາມ​ສາມາດ,ລັກສະນະ​ນຳ​ໜ້າ ​ແລະ ຄວາມ​ເປັນ​ເຈົ້າການ​ ຂອງ​ພະນັກງານ ​ໃນ​ຂະ​ແໜງ​ການ​ຕ່າງປະ​ເທດ ຕໍ່​ການ​ປະຕິບັດ​ແນວ​ທາງ​ ການ​ຕ່າງປະ​ເທດ” ກໍ​ຄື ສ້າງ​ໃຫ້​ບັນດາ ​ສະມາຊິກ​ພັກ, ພະນັກງານ​ນຳພາ-ຄຸ້ມ​ຄອງ ມີ​ທັດສະນະ​ຫລັກໝັ້ນ ຊົນ​ຊັ້ນໜັກ​ແໝ້ນ,​ ມີ​ຄຸນສົມບັດ ສິນ​ທຳ​ປະຕິວັດ ​ແລະ ມີ​ແນວ​ຄິດ​ອຸ່ນ​ອ່ຽງທຸ່ນ​ທຽງ, ​ເຊື່ອໝັ້ນຕໍ່​ການ​ນຳພາ​ຂອງ​ພັກ, ມີ​ແບບ​​ແຜນ​ດຳລົງ​ຊີວິດ​ປອດ​ໃສ​, ມີ​ວິ​ທີ​ການ​ເຮັດ​ວຽກ​ທີ່​ຖືກຕ້ອງ ​ແລະ ​ເພື່ອ​ປະຕິບັດ​ ແຜນ​ພັດທະນາ​ຊັບພະຍາກອນ​ມະນຸດ ຂອງ​ກະຊວງ​ການ​ຕ່າງປະ​ເທດ ​ໃຫ້​ບັນລຸ​ຕາມ​ຄາດໝາຍ​ ທີ່​ວາງ​ໄວ້.