ໃນວັນທີ 25ເມສາ 2017, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ອູ ອີ້ ປ້ຽວ, ຮອງຫົວໜ້າຫ້ອງການພົວພັນຕ່າງປະເທດ ແຂວງ ຫູນານ ແຫ່ງ ສປ ຈີນ, ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 24- 28 ເມສາ 2017.

ໃນໂອກາດດັ່ງກ່າວ, ທ່ານ ແສງເພັດ ຮຸ່ງບຸນຍວງ ໄດ້ສະແດງຄວາມຍິນດີຕ້ອນຮັບ ທ່ານ ອູ ອີ້ ປ້ຽວ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ, ພ້ອມທັງຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນຮ່ວມມືແບບຄູ່ຮ່ວມຍຸດທະສາດຮອບດ້ານ ຕາມທິດ 4 ດີ ຂອງສອງປະເທດ ( ເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ ) ທີ່ນັບມື້ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ແລະ ລົງເລິກໃນວຽກງານຕົວຈິງຫຼາຍດ້ານ, ຊຶ່ງເຫັນໄດ້ຈາກການແລກປ່ຽນການຢ້ຽມຢາມຊຶ່ງກັນ ແລະ ກັນຂອງຄະນະຜູ້ແທນຂັ້ນສູງຂອງສອງປະເທດ ຢ່າງເປັນປົກກະຕິ, ພິເສດ ຄະນະຜູ້ແທນຂັ້ນສູງຂອງ ສປປ ລາວ ກໍຈະເດີນທາງໄປຮ່ວມກອງປະຊຸມເວທີປຶກສາຫາລືລະດັບສູງຂອງການກໍ່ສ້າງ ໜຶ່ງແລວທາງ ໜຶ່ງເສັ້ນທາງ ທີ່ ນະຄອນຫຼວງປັກກິ່ງ ໃນກາງເດືອນພຶດສະພາ ທີ່ຈະມາເຖິງນີ້. ພ້ອມດຽວກັນນີ້, ທັງສອງຝ່າຍ ກໍ່ໄດ້ຕີລາຄາສູງຕໍ່ຜົນສໍາເລັດຂອງການພົວພັນຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ການສຶກສາ, ສາທາລະນະສຸກ ແລະ ອື່ນໆ. ຮອດປະຈຸບັນນີ້, ການລົງທຶນຂອງບັນດາບໍລິສັດວິສາຫະກິດ ແລະ ຫົວໜ່ວຍທຸລະກິດຂອງ ສປ ຈີນ ຢູ່ລາວ ຈັດຢູ່ໃນອັນດັບ 1 ລວມມີ 765 ໂຄງການ, ລວມມູນຄ່າ 7 ຕື້ກວ່າໂດລາ ສະຫະລັດ, ໃນນັ້ນ ມີບັນດານັກທຸລະກິດ-ນັກລົງທຶນ ຈາກແຂວງຫູນານ ຈັດຢູ່ໃນອັນດັບແຖວໜ້າຂອງການລົງທຶນໃນລາວ ລວມມີ 136 ບໍລິສັດ, ລວມມູນຄ່າການລົງທຶນ 547 ລ້ານໂດລາສະຫະລັດ ແລະ ມູນຄ່າການຄ້າລະຫວ່າງ ສປປ ລາວ ກັບ ແຂວງຫູນານ ບັນລຸໄດ້ 322 ລ້ານໂດລາ ສະຫະລັດ ແລະໂຄງການຮ່ວມມືທີ່ພົ້ນເດັ່ນ ແມ່ນຜົນສຳເລັດຂອງການສົ່ງດາວທຽມລາວດວງທຳອິດ ຂຶ້ນສູ່ວົງໂຄຈອນ ແລະ ໂຄງການກໍ່ສ້າງທາງລົດໄຟຄວາມໄວສູງ.

ນອກຈາກນີ້, ສປປ ລາວ ແລະ ແຂວງຫູນານ ຍັງໄດ້ມີການລົງນາມບົດບັນທຶກຄວາມເຂົ້າໃຈ ວ່າດ້ວຍ ການສ້າງເມືອງມິດຕະພາບ ລະຫວ່າງ ນະຄອນຫຼວງວຽງຈັນ ແລະ ນະຄອນຊາງຊາ ແລະ ສຳຄັນແມ່ນການຕົກລົງເຫັນດີຂອງທັງສອງຝ່າຍຕໍ່ການສະເໜີເປີດສະຖານກົງສຸນໃຫຍ່ ແຫ່ງ ສປປ ລາວ ທີ່ ນະຄອນຊາງຊາ, ແຂວງຫູນານ ຊຶ່ງພວມຢູ່ໃນຂັ້ນຕອນຂອງການກະກຽມວຽກງານທີ່ກ່ຽວຂ້ອງ ໂດຍສະເພາະແມ່ນຈະມີພິທີລົງນາມສານແລກປ່ຽນ ລະຫວ່າງ ສອງກະຊວງການຕ່າງປະເທດ ເພື່ອກະກຽມໃຫ້ສາມາດໄດ້ເປີດສະຖານກົງສຸນດັ່ງກ່າວ ພາຍໃນ 6 ເດືອນຕົ້ນປີ 2017 ນີ້.

ໃນໂອກາດດັ່ງກ່າວ, ທ່ານ ແສງເພັດ ຮຸ່ງບຸນຍວງ ໄດ້ຕາງໜ້າພັກ-ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ການສະໜັບສະໜູນຊ່ວຍເຫຼືອຂອງ ສປ ຈີນ ກໍຄືແຂວງຫູນານ ແກ່ ສປປ ລາວ ໃນໄລຍະຜ່ານມາ ແລະ ຫວັງຢ່າງຍິ່ງວ່າ ສປ ຈີນ ກໍຄືແຂວງຫູນານ ຈະສືບຕໍ່ໃຫ້ການສະໜັບສະໜູນຊ່ວຍເຫຼືອແກ່ ສປປ ລາວ ໃນຕໍ່ໜ້າອີກ. ໃນການຢ້ຽມຢາມລາວຄັ້ງນີ້, ທ່ານ ອູ ອີ້ ປ້ຽວ ພ້ອມດ້ວຍຄະນະ ຍັງໄດ້ຮ່ວມພົບປະເຮັດວຽກສອງຝ່າຍກັບ ທ່ານ ບຸນເຫຼືອ ພັນດານຸວົງ, ຫົວໜ້າຫ້ອງການກະຊວງການຕ່າງປະເທດ ພ້ອມດ້ວຍຄະນະ ຕື່ມອີກດ້ວຍ.