ໃນວັນທີ 29 ເມສາ 2017, ທີ່ ກະຊວງການຕ່າງປະເທດ, ທ່ານ ຢູກິໂນຣິ ເນໂມໂຕະ (Yukinori Nemoto), ຮອງລັດຖະມົນຕີກະຊວງທີ່ດິນ, ພື້ນຖານໂຄງລ່າງ, ຄົມມະນາຄົມ ແລະ ການທ່ອງທ່ຽວ ( ສະມາຊິກສະພາ ) ແຫ່ງ ປະເທດຍີ່ປຸ່ນ ພ້ອມດ້ວຍຄະນະ ໄດ້ເຂົ້າພົບປະກັບ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ເພື່ອປຶກສາຫາລື ກ່ຽວກັບ ແຜນການຈັດງານວາງສະແດງໂລກປີ 2025, ທີ່ເມືອງ ໂອສະກາ, ປະເທດຍີ່ປຸ່ນ.

ໃນໂອກາດດັ່ງກ່າວ, ທ່ານ ນາງ ຄຳເພົາ ເອີນທະວັນ ໄດ້ສະແດງຄວາມຕ້ອນຮັບຢ່າງອົບອຸ່ນຕໍ່ ຄະນະຜູ້ແທນຂອງຍີ່ປຸ່ນ, ຊຶ່ງເປັນຄູ່ຮ່ວມມືຍຸດທະສາດ ແລະ ສະແດງຄວາມຂອບໃຈຕໍ່ການຊ່ວຍເຫຼືອຂອງລັດຖະບານຍີ່ປຸ່ນ ໃນໄລຍະຜ່ານມາ ອັນໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ ໃນຫຼາຍດ້ານ ເປັນຕົ້ນ: ດ້ານການສຶກສາ, ສາທາ, ຄົມມະນາຄົມ ແລະ ອື່ນໆ.

ທ່ານ ຢູກິໂນຣິ ເນໂມໂຕະ ໄດ້ສະແດງຄວາມດີໃຈທີ່ໄດ້ມາຢ້ຽມຢາມ ສປປ ລາວ ແລະ ໄດ້ເວົ້າເຖິງຄວາມສຳຄັນຂອງການຈັດງານວາງສະແດງໂລກໃນປີ 2025, ຊຶ່ງ ຍີ່ປຸ່ນ ໄດ້ລົງສະໝັກເປັນປະເທດເຈົ້າພາບຢ່າງເປັນທາງການໃນວັນທີ 24 ເມສາ 2017 ທີ່ຜ່ານມາ ແລະ ໄດ້ສະເໜີຮູບແບບຂອງງານວາງສະແດງໂລກ ທີ່ມີຊື່ວ່າ “ Designing Future Society for Our Lives ” ຊຶ່ງງານດັ່ງກ່າວ ມີແຜນຈະຈັດຂຶ້ນທີ່ເມືອງ ໂອສະກາ ໃນລະຫວ່າງວັນທີ 3 ພຶດສະພາ ຫາ 3 ພະຈິກ ປີ 2025.

ການພົບປະດັ່ງກ່າວ ເປັນໂອກາດທີ່ສຳຄັນ ເພື່ອສົ່ງເສີມ ແລະ ຮັດແໜ້ນການພົວພັນ ລະຫວ່າງ ສປປ ລາວ ແລະ ຍີ່ປຸ່ນ ເພື່ອເພີ່ມທະວີການຮ່ວມມືຊ່ວຍເຫຼືອເຊິ່ງກັນ ແລະ ກັນ ເພື່ອການພັດທະນາຂອງສອງປະເທດ.