ໃນວັນທີ 26 ກໍລະກົດ 2017, ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ແອລເຣັນ ໂກນສ໌ແຕັງ (Ellen Goldstein), ຜູ້ອໍານວຍການທະນາຄານໂລກ ທີ່ຮັບຜິດຊອບ ປະເທດກໍາປູເຈຍ, ສປປ ລາວ ແລະ ມຽນມາ ຄົນໃໝ່ ແລະ ທ່ານ ຊ໋ອງ ຄຣິສສະຕ໋ອບ ແຄຣເຣ (Jean-Christophe Carret), ຜູ້ຕາງໜ້າຫ້ອງການທະນາຄານໂລກ ຄົນໃໝ່ ປະຈຳ ສປປ ລາວ, ເນື່ອງໃນໂອກາດທີ່ໄດ້ຮັບໜ້າທີ່ຕໍາແໜ່ງໃໝ່.

ໃນໂອກາດດັ່ງກ່າວ, ທ່ານ ແສງເພັດ ຮຸ່ງບຸນຍວງ ໄດ້ສະແດງຄວາມຍິນດີຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ແອລເຣັນ ໂກນສ໌ແຕັງ ແລະ ທ່ານ ຊ໋ອງ ຄຣິສສະຕ໋ອບ ແຄຣເຣ ພ້ອມດ້ວຍຄະນະຂອງທະນາຄານໂລກ ໃນຄັ້ງນີ້ ແລະ ສະແດງຄວາມຊົມເຊີຍຕໍ່ການມາຮັບໜ້າທີ່ຕຳແໜ່ງໃໝ່ຂອງທັງສອງທ່ານ. ພ້ອມດຽວກັນນັ້ນ, ທ່ານຮອງລັດຖະມົນຕີ ຍັງໄດ້ຕີລາຄາສູງ ຕໍ່ບົດບາດຂອງທະນາຄານໂລກ ທີ່ໄດ້ໃຫ້ການຊ່ວຍເຫຼືອຢ່າງ​ຫຼວງຫຼາຍ​ແກ່ ສ​ປ​ປ ລາວ ໃນ​ 5 ທົດສະຫວັດ ຜ່ານ​ມາ ໃນຮູບແບບຕ່າງໆເຊັ່ນ: ເງິນກູ້ອັດຕາຜ່ອນຜັນ, ເງິນຊ່ວຍເຫຼືອລ້າ, ການຊ່ວຍເຫຼືອທາງດ້ານເຕັກນິກ-ວິຊາການ ແລະ ອື່ນໆ. ການສະໜັບສະໜຸນດັ່ງກ່າວ ໄດ້​ປະ​ກອບ​ສ່ວນ​ສຳ​ຄັນເຂົ້າ​ໃນ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມຂອງ ສ​ປ​ປ ລາວໃນຫຼາຍຂະແໜງການ, ໂດຍສະເພາະ ການພັດທະນາ ແລະ ການປັບປຸງດ້ານກະສິກຳ-ປ່າໄມ້, ສາທາລະນະສຸກ, ການສຶກສາ ລວມໄປເຖິງ ການພັດ​ທະ​ນາ​ພື້ນ​ຖານ​ໂຄງ​ລ່າງ ແລະ ຍົກ​ສູງລະ​ດັບ​​ຊີ​ວິດ​ການ​ເປັນ​ຢູ່​ຂອງປະ​ຊາ​ຊົນ​ລາວ ໃຫ້​ໄດ້​ຮັບ​ການ​ປັບ​ປຸງ​ດີ​ຂຶ້ນ ແລະ ໄດ້​ຊ່ວຍ​ເຮັດ​ໃຫ້​ອັດ​ຕາ​ຄວາມ​ທຸກ​ຍາກໃນສ​ປ​ປລາວຫຼຸດ​ລົງ​ເປັນ​ກ້າວໆ​ມາ.

ນັບຕັ້ງແຕ່ ທະນາຄານໂລກ ໄດ້ມາຕັ້ງຫ້ອງການທະນາຄານໂລກຢ່າງເປັນທາງການ ຢູ່ ສປປ ລາວ ໃນປີ 2000 ເປັນຕົ້ນມາ, ການພົວພັນຮ່ວມມື ລະຫວ່າງ ລັດຖະບານ ສປປ ລາວ ແລະ ທະນາຄານໂລກ ກໍໄດ້ຮັບການເສີມຂະຫຍາຍເປັນກ້າວໆມາ ແລະ ໄດ້ກາຍເປັນອົງການການເງິນສາກົນໜຶ່ງ ທີ່ມີບົດບາດສຳຄັນໃນການເປັນຄູ່ຮ່ວມພັດທະນາ ຂອງ ສປປ ລາວ.

ໃນໂອກາດນີ້, ທ່ານຮອງລັດຖະມົນຕີ ແສງເພັດ ຮຸ່ງບຸນຍວງ ກໍໄດ້ສະແດງຄວາມເຊື່ອໝັ້ນວ່າ ພາຍໃຕ້ການນຳພາຂອງ ທ່ານ ນາງ ແອລເຣັນ ໂກນສ໌ແຕັງ ແລະ ການລົງເລິກຕົວຈິງຂອງ ທ່ານ ຊ໋ອງ ຄຣິສສະຕ໋ອບ ແຄຣເຣ,  ຜູ້ຕາງໜ້າຫ້ອງການທະນາຄານໂລກ ຄົນໃໝ່ ປະຈຳ ສປປ ລາວ, ການພົວພັນ ລະຫວ່າງ ທະນາຄານໂລກ ແລະ ສປປ ລາວ ຈະໄດ້ຮັບການຊຸກຍູ້ໃຫ້ຂະຫຍາຍຕົວຍິ່ງໆຂຶ້ນ ແລະ ຫວັງຢ່າງຍິ່ງວ່າ ທະນາຄານໂລກ ຈະສືບຕໍ່ໃຫ້ການຮ່ວມມື ແລະ ເພີ່ມທະວີປະກອບສ່ວນຊ່ວຍເຫຼືອ ສປປ ລາວ ໃນຫຼາຍໆດ້ານຕື່ມອີກ ເພື່ອຊ່ວຍຊຸກຍູ້ໃຫ້ ສປປ ລາວ ສາມາດບັນລຸເປົ້າໝາຍທີ່ວາງໄວ້ ໃນແຜນການພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 (2016-2020), ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ (SDGs) ແລະ ເພື່ອນໍາພາປະເທດຊາດໃຫ້ຫຼຸດ​ພົ້ນ​ອອກ​ຈາກສະ​ພາວະ​ຄວາມດ້ອຍ​ພັດ​ທະ​ນາໃນ​ປີ 2020.

ໃນໂອກາດດຽວກັນ, ທ່ານ ນາງ ແອລເຣັນ ໂກນສ໌ແຕັງ ກໍໄດ້ສະແດງຄວາມຂອບໃຈຕໍ່ ທ່ານ ແສງເພັດ ຮຸ່ງບຸນຍວງ ທີ່ໄດ້ໃຫ້ການຕ້ອນຮັບອັນອົບອຸ່ນໃນການເຂົ້າຢ້ຽມຂໍ່ານັບຄັ້ງນີ້ ແລະ ຊົມເຊີຍ ສປປ ລາວ ທີ່ໄດ້ຕັ້ງໜ້າເອົາໃຈໃສ່ສ້າງສາພັດທະນາປະເທດຊາດ, ພ້ອມທັງຢືນຢັນວ່າ ທະນາຄານໂລກ ຈະສືບຕໍ່ເພີ່ມທະວີການຮ່ວມມື ແລະ ຈະໃຫ້ການສະໜັບສະໜູນຊ່ວຍເຫລືອ ສປປ ລາວ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ແລະ ບັນດາຍຸດທະສາດຕ່າງໆ ເພື່ອໃຫ້ບັນລຸບັນດາເປົ້າໝາຍຕ່າງໆໃນການພັດທະນາແບບຍືນຍົງ.

ໃນຕອນທ້າຍ, ທ່ານ ແສງເພັດ ຮຸ່ງບຸນຍວງ ໄດ້ກ່າວອວຍພອນໃຫ້ ທ່ານ ນາງ ແອລເຣັນ ໂກນສ໌ແຕັງ ແລະ ທ່ານ ຊ໋ອງ ຄຣິສສະຕ໋ອບ ແຄຣເຣ ພ້ອມດ້ວຍຄະນະຂອງທະນາຄານໂລກ ຈົ່ງປະສົບຜົນສຳເລັດໃນການປະຕິບັດໜ້າທີ່ວຽກງານທີ່ທັງສອງທ່ານຮັບຜິດຊອບ ໃນຕໍ່ໜ້າ.