ໃນວັນທີ 29-30 ມັງກອນ 2018, ທີ່ ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ, ກະຊວງການຕ່າງປະເທດ ໄດ້ຈັດຕັ້ງກອງປະຊຸມເຜີຍແຜ່ກົດໝາຍ ວ່າດ້ວຍ ສົນທິສັນຍາ ແລະ ສັນຍາສາກົນ ແລະ ທາບທາມຮ່າງປັບປຸງຂໍ້ຕົກລົງ ວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງພະແນກການຕ່າງປະເທດແຂວງ, ນະຄອນຫຼວງ ແລະ ຮ່າງຂໍ້ຕົກລົງວ່າດ້ວຍມາດຕະຖານຕຳ ແໜ່ງຫົວໜ້າພະແນກການຕ່າງປະເທດແຂວງ, ນະຄອນຫຼວງ ພາຍໃຕ້ການເປັນປະທານຂອງ ທ່ານ ນ. ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ, ໂດຍມີບັນດາ ທ່ານຮອງເຈົ້າແຂວງ, ຮອງປະທານສະພາປະຊາຊົນແຂວງ, ຫົວໜ້າ ແລະ ຮອງຫົວໜ້າຫ້ອງວ່າການແຂວງ, ຫົວໜ້າ ແລະ ຮອງຫົວໜ້າພະແນກຂັ້ນແຂວງ, ຜູ້ຕາງໜ້າຈາກຂະແໜງການຕ່າງໆທີ່ກ່ຽວຂ້ອງຂອງ ແຂວງ ວຽງຈັນ, ຄຳມ່ວນ, ສະຫວັນນະເຂດ, ໄຊສົມບູນ, ຊຽງຂວາງ, ບໍລິຄຳໄຊ, ນະຄອນຫຼວງວຽງຈັນ ແລະ ພະນັກງານກະຊວງການຕ່າງປະເທດ ເຂົ້າຮ່ວມຈໍານວນ 150 ກ່ວາທ່ານ.

ໃນໂອກາດນີ້, ຜູ້ເຂົ້າຮ່ວມກອງປະຊຸມໄດ້ຮັບຟັງການເຜີຍແຜ່ກົດໝາຍ ວ່າດ້ວຍສົນທິສັນຍາ ແລະ ສັນຍາສາກົນ ໂດຍແມ່ນ ທ່ານ ສົມຄິດ ວັນຄໍາ, ຮອງຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ເປັນຜູ້ບັນຍາຍ. ຈຸດປະສົງຕົ້ນຕໍໃນການເຜີຍແຜ່ກົດໝາຍໃນຄັ້ງນີ້ ກໍເພື່ອສ້າງຄວາມຮັບຮູ້ ແລະ ຄວາມເຂົ້າໃຈໃຫ້ຜູ້ເຂົ້າເຂົ້າຮ່ວມກອງປະຊຸມ ແນໃສ່ຮັບປະກັນໃຫ້ມີຄວາມເປັນເອກະພາບໃນການຈັດຕັ້ງປະຕິບັດກົດໝາຍດັ່ງກ່າວ ລະຫວ່າງສູນກາງ ແລະ ທ້ອງຖິ່ນ. ກອງປະຊຸມໄດ້ແລກປ່ຽນຄວາມຄິດເຫັນ ກ່ຽວກັບ ຫຼັກການ ແລະ ລະບຽບການ ໃນການສ້າງ ແລະ ຈັດຕັ້ງປະຕິບັດສົນທິສັນຍາ ແລະ ສັນຍາສາກົນ ຕາມທີ່ໄດ້ກຳນົດໄວ້ໃນກົດໝາຍ ໂດຍການສົມທຽບໃສ່ການປະຕິບັດວຽກງານດັ່ງກ່າວ ໃນໄລຍະຜ່ານມາ. ກົດໝາຍສະບັບນີ້ ເປັນບ່ອນອີງທີ່ສໍາຄັນໃຫ້ແກ່ບັນດາອົງການຂັ້ນທ້ອງຖິ່ນໃນການຮ່ວມມືກັບຕ່າງປະເທດ ແລະ ເຊື່ອມໂຍງທາງດ້ານເສດຖະກິດກັບພາກພື້ນ. ການສ້າງກົດໝາຍສະບັບນີ້ເປັນບາດກ້າວອັນສຳຄັນໃນການພັດທະນາຂະແໜງການຕ່າງປະເທດ ໄປສູ່ການຄຸ້ມຄອງດ້ວຍກົດໝາຍ ແລະ ລະບຽບການ ໂດຍສະເພາະແມ່ນການຄຸ້ມຄອງວຽກງານສົນທິສັນຍາ ແລະ ສັນຍາສາກົນ ໃຫ້ເປັນເອກະພາບໃນຂອບເຂດທົ່ວປະເທດ, ປະກອບສ່ວນເຂົ້າໃນການຈັດຕັ້ງປະຕິບັດນະໂຍບາຍການຕ່າງປະເທດຂອງ ພັກ-ລັດ ໃຫ້ໄດ້ຮັບຜົນດີຍິ່ງໆຂຶ້ນ. ກົດໝາຍດັ່ງກ່າວ ໄດ້ເລີ່ມມີຜົນສັກສິດນັບແຕ່ວັນທີ 18 ພະຈິກ 2017 ເປັນຕົ້ນມາ. ພ້ອມດຽວກັນນີ້, ກອງປະຊຸມ ໄດ້ພ້ອມກັນຄົ້ນຄ້ວາ, ປຶກສາຫາລື ແລະ ແລກປ່ຽນຄວາມຄິດເຫັນໃສ່ຮ່າງປັບປຸງຂໍ້ຕົກລົງ ວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງພະແນກການຕ່າງປະເທດແຂວງ, ນະຄອນຫຼວງ ແລະ ຮ່າງຂໍ້ຕົກລົງ ວ່າດ້ວຍ ມາດຕະຖານຫົວໜ້າພະແນກການຕ່າງປະເທດແຂວງ, ນະຄອນຫຼວງ. ສອງຮ່າງນິຕິກຳດັ່ງກ່າວແມ່ນມີຄວາມສຳຄັນ ຊຶ່ງຈະກຳນົດທີ່ຕັ້ງ, ພາລະບົດບາດ, ໂຄງປະກອບການຈັດຕັ້ງ, ຂອບເຂດສິດ, ໜ້າທີ່ ແລະ ແບບແຜນວິທີການເຮັດວຽກຂອງພະແນກການຕ່າງປະເທດແຂວງ, ນະຄອນຫຼວງ ລວມທັງການແບ່ງຂັ້ນຄຸ້ມຄອງວຽກງານການຕ່າງປະເທດ ລະຫວ່າງ ສູນກາງ ແລະ ທ້ອງຖິ່ນ ໃຫ້ຈະແຈ້ງຂຶ້ນຕື່ມ ແລະ ກຳນົດມາດຕະຖານ, ເງື່ອນໄຂ, ສິດ ແລະ ໜ້າທີ່ຂອງຫົວໜ້າພະແນກ ການຕ່າງປະເທດແຂວງ, ນະຄອນຫຼວງ ໂດຍສອດຄ່ອງກັບກົດໝາຍວ່າດ້ວຍລັດຖະບານ ປີ 2016, ກົດໝາຍ ວ່າດ້ວຍ ການປົກຄອງທ້ອງຖິ່ນ ປີ 2015, ກົດໝາຍ ວ່າດ້ວຍ ພະນັກງານ-ລັດຖະກອນ ປີ 2015, ກົດໝາຍວ່າດ້ວຍສົນທິສັນຍາ ແລະ ສັນຍາສາກົນ ປີ 2017, ດຳລັດ ວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງກະຊວງການຕ່າງປະເທດ ປີ 2017 ແລະ ນິຕິກຳທີ່ກ່ຽວຂ້ອງອື່ນ.

ກະຊວງການຕ່າງປະເທດ ຈະສືບຕໍ່ຈັດຕັ້ງກອງປະຊຸມເຜີຍແຜ່ກົດໝາຍ ວ່າດ້ວຍ ສົນທິສັນຍາ ແລະ ສັນຍາສາກົນ ແລະ ທາບທາມ 02 ຮ່າງນິຕິກຳຂະແໜງການຕ່າງປະເທດດັ່ງກ່າວ ສຳລັບບັນດາແຂວງພາກໃຕ້ໃນກາງເດືອນ ກຸມພາ 2018.