ໃນ​ວັນ​ທີ 21-22 ກຸມພາ 2018, ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ຜົນການ​ເຄື່ອນ​ໄຫວ​ວຽກງານ​ອາຊຽນ ຂອງ ສປປ ລາວ ໃຫ້​ບັນດາ​ແຂວງພາກ​ກາງ ​ແລະ ພາກ​ໃຕ້, ທີ່ ໂຮງ​ແຮມດາວ​ສະຫວັນ, ແຂວງ​ສະຫວັນ​ນະ​ເຂດ, ໂດຍການໃຫ້ກຽດເປັນປະທານຂອງ ທ່ານ ທອງ​ຜ່ານ ສະຫວັນ​ເພັດ, ຮອງລັດຖະມົນຕີກະຊວງ​ການ​ຕ່າງປະ​ເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ​ແລະ ໃຫ້ກຽດ​ກ່າວ​ເປີດກອງ​ປະຊຸມໂດຍ ທ່ານ ປອ. ​​ໂພ​ໄຊ ​ໄຊ​ຍະ​ສອນ, ຮອງ​ເຈົ້າ​ແຂວງ​ສະຫວັນ​ນະ​ເຂດ ແລະ ມີຜູ້​ຕາງຫນ້າຈາກພະແນກການຕ່າງປະເທດ, ພະແນກອຸດສະຫະກຳ ແລະ ການຄ້າ ແລະ ສະພາການຄ້າ​ຂອງ​ບັນດາ​ແຂວງ​ພາກກາງ ​ແລະ ພາກ​ໃຕ້ ​​ເຂົ້າ​ຮ່ວມ​ຫຼາຍ​ກວ່າ 100 ທ່ານ.

ຈຸດປະສົງຂອງການຈັດກອງປະຊຸມຄັ້ງນີ້ ແມ່ນເພື່ອເຜີຍແຜ່​ກ່ຽວກັບ​ວັນ​ສ້າງ​ຕັ້ງ​ອາຊຽນຄົບຮອບ 50 ປີ ໃນ​ປີ 2017 ທີ່ເປັນຂີດໝາຍອັນສຳຄັນ​ ເພາະອາຊຽນໄດ້ຜ່ານຜ່າສິ່ງທ້າທາຍຫຼາຍ​ຢ່າງ ​ແລະ ສາມາດ​ຍາດໄດ້ຜົນ​ສຳ​ເລັດ​ເທື່ອ​ລະ​ກ້າວ​ຕະຫຼອດ​ໄລຍະ 5 ທົດ​ສະ​ວັດ​ຜ່ານ​ມາ, ອັນ​ພົ້ນ​ເດັ່ນ​ແມ່ນ​ການ​ປົກ​ປັກຮັກສາ​ສັນຕິພາບ ແລະ ສະຖຽນລະ​ພາບ​ຂອງ​ພາກ​ພື້ນ ຊື່ງ​ເປັນ​ພື້ນຖານທີ່ເອື້ອອຳນວຍໃຫ້ແກ່​ການ​ພັດທະນາ​ເສດຖະກິດ-ສັງຄົມ ຂອງ​ປະ​ເທດ​ສະມາຊິກ​ອາຊຽນ ກໍ​ຄື​ການ​ສ້າງ​ປະຊາ​ຄົມ​ອາ​ຊຽນ. ນອກຈາກນັ້ນ, ຜູ້ເຂົ້າຮ່ວມກໍ່ໄດ້ຮັບຟັງຜົນສໍາເລັດຂອງ ສປປ ລາວ ໃນການເຄື່ອນໄຫວວຽກງານອາຊຽນໃນໄລຍະ 2 ທົດສະວັດທີ່ຜ່ານມາ. ໃນກອງປະຊຸມຄັ້ງນີ້, ຜູ້ເຂົ້າຮ່ວມຍັງ​ໄດ້ຮັບຊາບຄວາມ​ຄືບໜ້າ​ໃນ​ການຈັດ​ຕັ້ງ​ປະຕິບັດ​ວິ​ໄສ​ທັດ​ປະຊາ​ຄົມ​ອາຊຽນ 2025 ​ໂດຍ​ສະ​ເພາະ​​ແມ່ນ​ການຈັດ​ຕັ້ງ​ປະ​ຕິ​ບັດ​ແຜນ​ແມ່​ບົດ​ປະຊາ​ຄົມ​ການ​ເມືອງ-ຄວາມໝັ້ນຄົງ​ອາຊຽນ 2025, ແຜນ​ແມ່​ບົດປະຊາ​ຄົມ​ເສດຖະກິດ​ອາຊຽນ 2025 ​ແລະ ​ແຜນ​ແມ່​ບົດ​ປະຊາ​ຄົມ​ວັດທະນະທຳ-ສັງຄົມອາຊຽນ 2025. ພ້ອມກັນນັ້ນ, ຜູ້ເຂົ້າຮ່ວມ​ຍັງ​ໄດ້​ຮັບ​ຊາບ​ກ່ຽວກັບ​ແຜນບູລິມະສິດໃນການເປັນປະທານອາຊຽນຂອງ ສິງກະໂປ ໃນປີ 2018 ເປັນຕົ້ນແມ່ນຂໍ້​ສະ​ເໜີ​ໃນ​ການ​ສ້າງ​ເຄືອ​ຂ່າຍ​ເມືອງ​ທັນ​ສະ​ໄໝອາຊຽນ (ASEAN Smart Cities Network) ​ໂດຍມີ​ຈຸດປະສົງ​ໃຫ້​ປະ​ເທດ​ສະມາຊິກ​ອາຊຽນ ສະ​ເໜີຕົວເມືອງຂອງຕົນ ເພື່ອ​ສ້າງ​ໃຫ້​ເປັນ​ເມືອງທີ່​ທັນ​ສະ​ໄໝ ​ແລະ ມີ​ການ​ພັດທະນາ​ແບບ​ຍືນ​ຍົງ.

ໃນໂອກາດກອງປະຊຸມຄັ້ງນີ້, ບັນດາ​ຜູ້ຕາງຫນ້າຈາກ​ຂະ​ແຫນງ​ການ​ຂອງ​ແຂວງ ​ກໍໄດ້ແຈ້ງສະພາບດ້ານການຄ້າ ແລະ ການລົງທຶນ, ລວມທັງສິ່ງທ້າທາຍຕ່າງໆ ແລະ ຂໍ້ສະດວກ ຢູ່ພາຍໃນແຂວງຂອງຕົນ, ຊື່ງກອງປະຊຸມ ໄດ້ມີການແລກປ່ຽນຄຳຄິດເຫັນຢ່າງກົງໄປກົງມາ ແລະ ໄດ້ຊຸກຍູ້ໃຫ້ບັນດາຜູ້​ເຂົ້າ​ຮ່ວມ ນຳເອົາເນື້ອໃນຈິດໃຈຜົນ​ການ​ປຶກສາ​ຫາລື​ໃນ​ກອງ​ປະຊຸມ​ຄັ້ງ​ນີ້ ໄປຈັດຕັ້ງຜັນຂະຫຍາຍຕາມພາລະບົດບາດ ແລະ ໜ້າວຽກທີ່ຕົນຮັບຜິດຊອບ ເພື່ອສືບຕໍ່ຍາດແຍ່ງຜົນປະໂຫຍດຈາກການເປັນປະຊາຄົມເສດຖະກິດອາຊຽນ ມາສູ່ແຂວງຂອງຕົນກໍ່ຄື ສປປ ລາວ.