ໃນວັນທີ 09 ມີນາ 2018, ກະຊວງການຕ່າງປະເທດ ໄດ້ຈັດກອງປະຊຸມສະຫລຸບວຽກງານກວດກາຂອງຂະແໜງການຕ່າງປະເທດ ປະຈຳປີ 2017 ແລະ ເຜີຍແຜ່ເອກະສານສໍາຄັນຕ່າງໆ ໂດຍການໃຫ້ກຽດເປັນປະທານຂອງ ທ່ານ ນາງ ຄໍາເພົາ ເອີນທະວັນ, ຄະນະປະຈຳພັກ, ປະທານຄະນະກວດກາພັກ, ຮອງລັດຖະມົນຕີກະຊວງການຕ່າງປະເທດ ເຊິ່ງມີຄະນະພັກ-ຄະນະນຳກະຊວງ, ບັນດາຄະນະກົມ, ຄະນະພະແນກ, ພະນັກງານຫລັກແຫລ່ງ ແລະ ພະນັກງານລັດຖະກອນພາຍໃນກະຊວງການຕ່າງປະເທດ ເຂົ້າຮ່ວມ.
ກອງປະຊຸມຄັ້ງນີ້ ໄດ້ຍົກໃຫ້ເຫັນການຈັດຕັ້ງປະຕິບັດວຽກງານກວດກາ ໂດຍສະເພາະໃນຂະແໜງການຕ່າງປະເທດໃນໄລຍະຜ່ານມາ ໂດຍການເອົາໃຈໃສ່ຊີ້ນຳ-ນຳພາຢ່າງໃກ້ຊິດ ແລະ ເປັນປົກກະຕິ ຈາກຄະນະພັກ-ຄະນະນຳກະຊວງການຕ່າງປະເທດ; ພ້ອມທັງ ໄດ້ເອົາໃຈໃສ່ຊຸກຍູ້ ແລະ ສ້າງເງື່ອນໄຂອຳນວຍຄວາມສະດວກສຳລັບການເຄື່ອນໄຫວວຽກງານວິຊາສະເພາະ ລວມເຖິງການກໍ່ສ້າງພະນັກງານກວດກາຂອງຂະແໜງການຕ່າງປະເທດ ໃຫ້ມີຄວາມສາມາດຮັບປະກັນວຽກງານແຕ່ລະໄລຍະໄດ້ຢ່າງມີປະສິດທິພາບ ແລະ ປະສິດທິຜົນ. ໃນປີ 2017 ຜ່ານມາ, ການເຄື່ອນໄຫວວຽກງານກວດກາຂອງກະຊວງ ຕປທ ໄດ້ດຳເນີນຢ່າງເປັນປົກກະຕິ ແລະ ສຳເລັດຕາມແຜນການທີ່ວາງໄວ້ຄື: ລົງກວດກາປົກກະຕິວຽກ ພັກ-ລັດ ລວມທັງໝົດ 13 ເປົ້າໝາຍ (ຢູ່ພາຍໃນ 05 ເປົ້າໝາຍ ແລະ ຢູ່ບັນດາສຳນັກງານຕາງໜ້າການທູດແຫ່ງ ສປປ ລາວ ທີ່ຕ່າງປະເທດ 06 ເປົ້າໝາຍ); ໃນນັ້ນ ມີ 01 ເປົ້າໝາຍ ກວດກາຕາມຄຳສັ່ງ ແລະ 01 ເປົ້າໝາຍ ກວດກາສະເພາະກິດ. ຜ່ານການເຄື່ອນໄຫວລົງກວດກາຕົວຈິງໃນໄລຍະຜ່ານມາເຫັນວ່າ ຄະນະໜ່ວຍພັກທຸກຂັ້ນຕະຫລອດຮອດສະມາຊິກພັກ-ພະນັກງານຂອງກະຊວງ ຕປທ ມີຄວາມຮັບຮູ້, ເຂົ້າໃຈຢ່າງຖືກຕ້ອງ ຕໍ່ວຽກງານຕິດຕາມ, ກວດກາ, ມີຄວາມຕື່ນຕົວ ແລະ ໃຫ້ການຮ່ວມມືເປັນຢ່າງດີ, ມີສະຕິຕໍ່ການຈັດຕັ້ງ, ເຄົາລົບກົດລະບຽບຂອງພັກ ແລະ ປະຕິບັດຕາມກົດໝາຍຂອງລັດວາງອອກຢ່າງເຂັ້ມງວດ. ພ້ອມດຽວກັນນັ້ນ, ກໍ່ໄດ້ວາງທິດທາງແຜນການເຄື່ອນໄຫວສຳລັບປີ 2018 ແລະ ເຜີຍແຜ່ເຊື່ອມຊືມເນຶ້ອໃນເອກະສານສຳຄັນຈຳນວນໜຶ່ງເຊັ່ນ: ບົດໂອ້ລົມຂອງ ທ່ານ ປອ. ບຸນທອງ ຈິດມະນີ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫລວງ ຂັ້ນສູນກາງ ຕໍ່ກອງປະຊຸມວຽກງານກວດກາທົ່ວປະເທດ ປະຈຳປີ 2017 ແລະ ຕໍ່ກອງປະຊຸມເປີດກວ້າງວຽກງານກວດສອບງົບປະມານແຫ່ງລັດ ປະຈຳປີ 2017 ຂອງອົງການກວດສອບແຫ່ງລັດ; ແລະ ບົດປະຖະກະຖາ ເນື່ອງໃນໂອກາດວັນຕ້ານການສໍ້ລາດບັງຫລວງສາກົນ ຄົບຮອບ 14 ປີ (ວັນທີ 09 ທັນວາ 2003 – 09 ທັນວາ 2017).
ນອກຈາກນີ້, ຜູ້ເຂົ້າຮ່ວມກອງປະຊຸມ ຍັງໄດ້ຮັບຟັງການໂອ້ລົມຂອງທ່ານປະທານຄະນະກວດກາພັກ ໂດຍເນັ້ນໃຫ້ພະນັກງານທຸກຄົນມີຄວາມເຂົ້າໃຈເລິກເຊິ່ງ ຕໍ່ພາລະບົດບາດຄວາມສຳຄັນຂອງວຽກງານກວດກາ ດັ່ງຄຳເວົ້່າທີ່ວ່າ “ຖ້າບໍ່ມີການກວດກາ ກໍ່ໝາຍຄວາມວ່າບໍ່ມີການນຳພາ”, ສ້າງຈິດສຳນຶກທີ່ດີຕໍ່ວຽກງານດັ່ງກ່າວ, ພ້ອມທັງ ນຳໄປຈັດຕັ້ງຜັນຂະຫຍາຍໃຫ້ມີປະສິດຜົນສຸງສູດໃນຂົງເຂດວຽກງານຕົນ. ທ່ານປະທານ ໄດ້ຮຽກຮ້ອງການນຳທຸກຂັ້ນ ກໍ່ຄືພະນັກງານກະຊວງການຕ່າງປະເທດ ຈົ່ງພ້ອມກັນເອົາໃຈໃສ່ເຮັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ ແລະ ມີບາດກ້າວບຸກທະລຸ.