ເພື່ອເປັນການເຜີຍແຜ່ຜົນສໍາເລັດວຽກງານການທູດຫລາຍຝ່າຍຂອງ ສປປ ລາວ, ໃນວັນທີ 23 ມີນາ 2018, ທີ່ ມະຫາວິທະຍາໄລແຫ່ງຊາດ, ກົມເສດຖະກິດ, ກະຊວງການຕ່າງປະເທດ, ຮ່ວມກັບ ມະຫາວິທະຍາໄລແຫ່ງຊາດ ໄດ້ມີການຈັດປາຖະກະຖາ ກ່ຽວກັບ ການເຄື່ອນໄຫວວຽກງານອາເຊັມ ຂອງ ສປປ ລາວ ແລະ ການເຄື່ອນໄຫວວຽກງານຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ, ພາຍໃຕ້ການເປັນປະທານຮ່ວມຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ແລະ ທ່ານ ສຈ. ປອ ສົມສີ ຍໍພັນໄຊ, ວ່າການອະທິການບໍດີມະຫາວິທະຍາໄລແຫ່ງຊາດ, ໂດຍມີບັນດາພະນັກງານກະຊວງການຕ່າງປະເທດ, ຄູອາຈານ, ນັກສຶກສາ ມະຫາວິທະຍາໄລແຫ່ງຊາດ ແລະ ທ່ານເອກອັກຄະລັດຖະທູດ ສະຫະພາບເອີຣົບ ປະຈຳ ລາວ ເຂົ້າຮ່ວມຈໍານວນ 300 ກວ່າທ່ານ.
ຈຸດປະສົງໃນການຈັດປາຖະກະຖາໃນຄັ້ງນີ້ ແມ່ນເພື່ອເຜີຍແຜ່ຜົນສຳເລັດຂອງ ສປປ ລາວ ໃນການເຄື່ອນໄຫວວຽກງານອາເຊັມ ລວມທັງເພື່ອເປັນການສະເຫລີມສະຫລອງ ຄົບຮອບ 22 ປີ ແຫ່ງການສ້າງຕັ້ງອາເຊັມ. ຜູ້ເຂົ້າຮ່ວມໄດ້ຮັບຟັງການທົບທວນຄືນ ຜົນສຳເລັດຂອງອາເຊັມໃນໄລຍະສອງທົດສະວັດທີ່ຜ່ານມາ ໂດຍຜ່ານ 3 ເສົາຄໍ້າ ທາງດ້ານການເມືອງ, ເສດຖະກິດ ແລະ ດ້ານວັດທະນະທຳ-ສັງຄົມ. ໄດ້ຮັບຮູ້ບົດບາດ ແລະ ວິໄສທັດການຮ່ວມມືອາເຊັມ ໂດຍສະເພາະ ດ້ານການເຊື່ອມຈອດໂຄງບົນ ແລະ ໂຄງລ່າງ, ລະບົບກົນໄກເຮັດວຽກ ແລະ ທິດທາງໃນອະນາຄົດຂອງອາເຊັມ ເພື່ອສ້າງຄວາມເຂັ້ມແຂງທາງດ້ານການເມືອງ, ການພັດທະນາເສດຖະກິດ ແບບຍືນຍົງ, ສິ່ງແວດລ້ອມ ແລະ ການມີສ່ວນຮ່ວມຂອງຂະແໜງການກ່ຽວຂ້ອງ ໃຫ້ເປັນຮູບປະທຳຫລາຍຂຶ້ນ ອັນຈະນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນຂອງສອງທະວີບອາຊີ ແລະ ຢູໂຣບ. ໂອກາດດຽວກັນນີ້, ກໍ່ໄດ້ມີການເຜີຍແຜ່ວຽກງານຂອງຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ເຊິ່ງເປັນຂອບວຽກໜຶ່ງທີ່ມີຄວາມສຳຄັນສຳລັບບັນດາປະເທດແມ່ນ້ຳຂອງ ໂດຍຜ່ານການຮ່ວມມືທາງດ້ານການເມືອງ-ຄວາມໝັ້ນຄົງ, ເສດຖະກິດ, ວັດທະນາທຳ-ສັງຄົມ ແລະ ການແລກປ່ຽນລະຫວ່າງປະຊາຊົນກັບປະຊາຊົນ ເພື່ອຮັກສາສັນຕິພາບ ແລະ ສະຖຽນລະພາບ, ພັດທະນາການເປັນປະເທດເພື່ອນບ້ານທີ່ດີ, ດຳເນີນການຮ່ວມມືທຸກດ້ານຢ່າງເປັນຮູບປະທຳ ແລະ ສົ່ງເສີມການພັດທະນາແບບຍືນຍົງ ເພື່ອຜົນປະໂຫຍດຮ່ວມກັນຂອງບັນດາປະເທດໃນອະນຸພາກພື້ນ. ໃນໂອກາດນີ້ ທ່ານ ເລອົງ ຟາແບຮ໌, ເອກອັກຄະລັດຖະທູດ ສະຫະພາບເອີຣົບ ປະຈຳລາວ ໄດ້ຂຶ້ນບັນຍາຍການຮ່ວມມື ລະຫວ່າງ ລາວ-ອີຢູ ໃນໄລຍະຜ່ານມາ. ພ້ອມນີ້, ກໍ່ໄດ້ມີການວາງສະແດງຮູບພາບ ກິດຈະກໍາເຄື່ອນໄຫວວຽກງານອາເຊັມ ຂອງສະຫະພາບເອີຣົບ.
ສປປ ລາວ ໄດ້ເຂົ້າເປັນສະມາຊິກອາເຊັມ ໃນປີ 2004 ຊຶ່ງປະຈຸບັນມີສະມາຊິກທັງໝົດ 53 ຄູ່ຮ່ວມມື. ພາຍຫຼັງທີ່ບັນດາສະມາຊິກອາເຊັມໄດ້ຮັບຮອງເອົາ ວັນທີ 1 ມີນາ ຂອງທຸກປີ ເປັນວັນສ້າງຕັ້ງອາເຊັມ, ທີ່ ໄດ້ຮັບຮອງເອົາຢູ່ກອງປະຊຸມສຸດຍອດອາເຊັມ ຄັ້ງທີ 11, ທີ່ ມົງໂກລີ, ໃນປີ 2016, ສປປ ລາວ ກໍ່ໄດ້ຈັດກິດຈະກຳສະເຫຼີມສະຫຼອງວັນດັ່ງກ່າວທຸກປີ ເປັນຕົ້ນ ສົ່ງສານອວຍພອນຂອງ ທ່ານ ລັດຖະມົນຕີກະຊວງການຕ່າງປະເທດ ແລະ ກິດຈະກຳອື່ນໆ ເພື່ອໃຫ້ສັງຄົມໄດ້ຮັບຮູ້ເຖິງຄວາມສຳຄັນຂອງການຮ່ວມມື ລະຫວ່າງ ສອງທະວີບ ໃນການປະກອບສ່ວນໃຫ້ແກ່ສັນຕິພາບ ແລະ ຄວາມຈະເລີນຮຸ່ງເຮືອງ.