ໃນວັນທີ 28-29 ມີນາ 2018 ທີ່ ຫ້ອງປະຊຸມສະພາປະຊາຊົນ ແຂວງ ຫຼວງພະບາງ, ກະຊວງການຕ່າງປະເທດ ໄດ້ຈັດຕັ້ງກອງປະຊຸມເພື່ອທາບທາມຄຳຄິດເຫັນນໍາ ເຈົ້າໜ້າທີ່ຂັ້ນແຂວງ 08 ແຂວງພາກເໜືອ ຄື: ແຂວງ ຜົ້ງສາລີ, ຫົວພັນ, ອຸດົມໄຊ, ບໍ່ແກ້ວ, ຫຼວງນ້ຳທາ, ຊຽງຂວາງ, ໄຊຍະບູລີ ແລະ ຫຼວງພະບາງ ຕໍ່ຮ່າງກົດໝາຍວ່າດ້ວຍສຳນັກງານຜູ້ຕາງໜ້າແຫ່ງ ສປປ ລາວ ຢູ່ຕ່າງປະເທດ ພາຍໃຕ້ການເປັນປະທານຮ່ວມຂອງ ທ່ານ ນາງ. ຄໍາເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ວົງສະຫວັນ ເທບພະຈັນ, ຮອງເຈົ້າແຂວງຫຼວງພະບາງ ໂດຍມີຜູ້ຕາງໜ້າຈາກ ສະພາແຫ່ງຊາດ, ບັນດາທ່ານຮອງປະທານສະພາປະຊາຊົນຂັ້ນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ຫົວໜ້າ ແລະ ຮອງຫົວໜ້າພະ ແນກການຕ່າງປະເທດແຂວງ, ຜູ້ຕາງໜ້າຈາກຂະແໜງການທີ່ກ່ຽວຂ້ອງ ເຂົ້າຮ່ວມ.
ກອງປະຊຸມໃນຄັ້ງນີ້ ເປັນກອງປະຊຸມທາບທາມ ຄັ້ງທີສາມ ພາຍຫຼັງທີ່ໄດ້ຈັດຂຶ້ນຢູ່ພາກກາງ ແລະ ພາກໃຕ້. ຫຼັງຈາກສຳເລັດການທາບທາມຄຳຄິດເຫັນໃນຄັ້ງນີ້ແລ້ວ ກະຊວງການຕ່າງປະເທດ ຈະສັງລວມຄຳຄິດເຫັນຂອງຜູ້ເຂົ້າຮ່ວມ ແລະ ຂໍ້ສະ ເໜີຂອງທັງສາມພາກ ເພື່ອນຳໄປປັບປຸງຮ່າງກົດໝາຍໃຫ້ມີເນື້ອໃນລະອຽດ, ຈະແຈ້ງ ແລະ ຄົບຖ້ວນ. ກົດໝາຍສະບັບນີ້ຈະກຳ ນົດຫຼັກການ, ລະບຽບການ ແລະ ມາດຕະການ ກ່ຽວກັບ ການຈັດຕັ້ງ ແລະ ການເຄື່ອນໄຫວຂອງສຳນັກງານຜູ້ຕາງໜ້າ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຢູ່ຕ່າງປະເທດ ລວມມີ ສະຖານເອກອັກຄະລັດຖະທູດ, ສຳນັກງານຜູ້ຕາງໜ້າຖາວອນປະຈຳອົງການຈັດຕັ້ງສາກົນ, ສະຖານກົງສຸນໃຫຍ່ ແລະ ສະຖານກົງສຸນ ຂອງ ສປປ ລາວ ຢູ່ຕ່າງປະເທດ ເພື່ອສ້າງເງື່ອນໄຂໃຫ້ສຳນັກງານຜູ້ຕາງໜ້າ ແຫ່ງ ສປປ ລາວ ຢູ່ ຕ່າງປະເທດ ສາມາດປະຕິບັດສິດແລະ ໜ້າທີ່ຂອງຕົນ ໃຫ້ມີປະສິດທິ ພາບ ແລະ ປະສິດທິຜົນສູງກວ່າເກົ່າ.
ກະຊວງການຕ່າງປະເທດ ມີແຜນຈະນຳເອົາຮ່າງກົດໝາຍສະບັບດັ່ງກ່າວ ເຂົ້າໃນກອງປະຊຸມລັດຖະບານໃນເດືອນ ມິຖຸນາ 2018. ເມື່ອໄດ້ຮັບການຮັບຮອງຈາກລັດຖະບານແລ້ວ ຈະນຳສະເໜີຕໍ່ສະພາແຫ່ງຊາດເພື່ອນຳເຂົ້າໃນກອງປະຊຸມສະພາແຫ່ງຊາດ ເພື່ອພິຈາລະນາຮັບຮອງໃນເດືອນ ຕຸລາ 2018. ກົດໝາຍສະບັບນີ້ ເມື່ອຖືກຮັບຮອງໂດຍສະພາແຫ່ງຊາດ ຈະເປັນອີກບາດກ້າວສຳຄັນໃນການພັດທະນາລະບົບນິຕິກຳຂອງຂະແໜງການຕ່າງປະເທດໃຫ້ຄົບຖ້ວນຍິ່ງຂຶ້ນ, ເປັນບ່ອນອີງໃນການປະ ຕິບັດນະໂຍບາຍການຕ່າງປະເທດ ແລະ ປະກອບສ່ວນໃນການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ.