ໃນວັນທີ 17 ພຶດສະພາ 2018,​ ເວລາ 14:00 ໂມງ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບ ທ່ານ ອັດຖະຢຸດ ສຣີສະມຸດ, ຮອງຫົວໜ້າຫ້ອງການ, ກະຊວງການຕ່າງປະເທດ ໄທ, ທັງເປັນຜູ້ຕາງໜ້າພິເສດຂອງ ທ່ານ ດອນ ປຣະມັດວິໄນ, ລັດຖະມົນຕີ ກະຊວງການຕ່າງປະເທດ ໄທ.

ຈຸດປະສົງ ຂອງການພົບປະຄັ້ງນີ້ ແມ່ນເພື່ອປຶກສາຫາລື ກ່ຽວກັບ ການກະກຽມຄວາມພ້ອມດ້ານຕ່າງໆໃຫ້ແກ່ ການເປັນເຈົ້າພາບ ແລະ ການເປັນປະທານກອງປະຊຸມສຸດຍອດ ACMECS ຄັ້ງທີ 8 ຂອງ ໄທ ພາຍໃຕ້ຫົວຂໍ້: “ກ້າວໄປສູ່ການເຊື່ອມໂຍງ ແລະ ເຊື່ອມຈອດປະຊາຄົມແມ່ນໍ້າຂອງ” ແລະ ກອງປະຊຸມປິ່ນອ້ອມ ທີ່ຈະຈັດຂຶ້ນໃນວັນທີ 15-16 ມິຖຸນາ 2018 ທີ່ ບາງກອກ.

ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີ ກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບອັນ ອົບອຸ່ນ ແລະ ຂອບໃຈ ຕໍ່ ທ່ານ ອັດຖະຢຸດ ສຣີສະມຸດ, ຮອງຫົວໜ້າຫ້ອງການ, ກະຊວງການຕ່າງປະເທດໄທ ກໍ່ຄືລັດ ຖະບານ ໄທ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປ ລາວ ທັງໃນຂອບສອງຝ່າຍ ແລະ ຂອບການຮ່ວມມື ACMECS ໃນໄລຍະຜ່ານມາ ແລະ ໄດ້ສະແດງຄວາມຊົມເຊີຍຕໍ່ ໄທ ທີ່ມີແນວຄິດລິເລີ່ມ ສ້າງແຜນແມ່ບົດ ACMECS ແຕ່ປີ 2019-2023 ເພື່ອປັບປຸງກົນໄກການຮ່ວມມື ແລະ ເປັນບ່ອນອີງໃນການສືບຕໍ່ຮັດແໜ້ນການ ຮ່ວມມື ລະຫວ່າງປະເທດສະມາຊິກໃນຕໍ່ໜ້າ ລວມທັງຂໍ້ລິເລີ່ມໃນການສ້າງຕັ້ງກອງທຶນພື້ນຖານໂຄງລ່າງ ACMECS, ເຊື່ອໝັ້ນວ່າ ກອງປະຊຸມສຸດຍອດ ACMECS ຄັ້ງທີ 8 ແລະ ກອງປະຊຸມປິ່ນອ້ອມ ພາຍໃຕ້ການເປັນເຈົ້າພາບ ແລະ ເປັນປະທານຂອງ ໄທ ຈະປະສົບຜົນສໍາເລັດຢ່າງສະຫງ່າງາມ.

ທ່ານ ອັດຖະຢຸດ ສຣີສະມຸດ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ການພົບປະໃນຄັ້ງນີ້. ທ່ານ ໄດ້ແຈ້ງຈຸດປະສົງຂອງການເດີນທາງມາ ສປປ ລາວ ໃນຄັ້ງນີ້ ແລະ ແຈ້ງໃຫ້ຊາບ ກ່ຽວກັບ ສະພາບການກະກຽມ ດ້ານຕ່າງໆ ໃຫ້ແກ່ກອງປະຊຸມສຸດຍອດ ACMECS ຄັ້ງທີ 8 ລວມທັງການສະເໜີຂໍພົບປະສອງຝ່າຍ ລະຫວ່າງ    ທ່ານ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ນາຍົກລັດຖະມົນຕີ ໄທ ໃນໄລຍະກອງປະຊຸມສຸດຍອດດັ່ງກ່າວ ແລະ ປະເດັນອື່ນໆ ທີ່ປິ່ນອ້ອມ ການຮ່ວມມື ລາວ-ໄທ ໃນຂອບສອງຝ່າຍ ແລະ ການຮ່ວມມືພາກພື້ນ ໂດຍສະເພາະ ACMECS.

ໃນຕອນທ້າຍ ທ່ານ ແສງເພັດ ຮຸ່ງບຸນຍວງ ໄດ້ອວຍພອນໃຫ້ ທ່ານ ອັດຖະຢຸດ ສຣີສະມຸດ ພ້ອມດ້ວຍຄະນະ ປະສົບຜົນສໍາເລັດ ຕາມຈຸດປະສົງຄາດໝາຍ ໃນໜ້າທີ່ວຽກງານ ໃນຖານະຜູ້ຕາງໜ້າພິເສດຂອງ ລັດຖະມົນຕີ ກະຊວງ ການຕ່າງປະເທດ ໄທ.