ໃນວັນທີ 6 ມິຖຸນາ 2018, ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ບັນດາທຸຕານຸທູດປະເທດສະມາຊິກ ສະຫະພາບ ເອີຣົບ (ອີຢູ), ໃນນັ້ນ ສໍານັກງານຜູ້ຕາງໜ້າອີຢູ, ອັງກິດ, ເຢຍລະມັນ ແລະ ຝຣັ່ງ ມີສໍານັກງານການທູດຂອງຕົນຕັ້ງຢູ່ ສປປ ລາວ; ແລະ ອີກ 7 ປະເທດ ຄື: ແອັດສະປາຍ, ໂອຕຣິດ, ລຸກຊໍາບວກ, ຊູແອັດ, ໂຮນລັງ, ແບນຊິກ ແລະ ສະໂລວາກີ ບໍ່ມີສໍານັກງານການທູດຕັ້ງຢູ່ ສປປ ລາວ.

ໃນໂອກາດນີ້, ທ່ານຮອງລັດຖະມົນຕີ ແສງເພັດ ຮຸ່ງບຸນຍວງ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ບັນດາທຸຕານຸທູດປະເທດສະມາຊິກອີຢູ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາແໜ່ງການທູດຢູ່ ສປປ ລາວ, ພ້ອມທັງສະແດງຄວາມເຊື້ອໝັ້ນວ່າ ໃນໄລຍະດໍາລົງຕໍາແໜ່ງຢູ່ ສປປ ລາວ ບັນດາທຸຕານຸທູດ ຈະເຮັດສຸດຄວາມສາມາດ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ກັບ ບັນດາປະເທດສະມາຊິກອີຢູ ໃນຂອບສອງຝ່າຍ ແລະ ຂອບການຮ່ວມມືຫຼາຍຝ່າຍ ລາວ-ອີຢູ ໃຫ້ແໜ້ນແຟ້ນຍິ່ງຂຶ້ນ. ພ້ອມນັ້ນ, ຍັງໄດ້ໃຫ້ຄໍາຢືນຢັນວ່າ ຈະໃຫ້ການຮ່ວມມືເປັນຢ່າງດີ ເພື່ອເຮັດໃຫ້ການປະຕິບັດໜ້າທີ່ຂອງບັນດາທຸຕານຸທູດ ຢູ່ ສປປ ລາວ ປະສົບຜົນສໍາເລັດດ້ວຍດີ. ພ້ອມທັງໄດ້ແຈ້ງໃຫ້ຊາບວ່າ: ປີ 2018 ນີ້ແມ່ນ ປີທ່ອງທ່ຽວລາວ, ຊຶ່ງໄດ້ຈັດຫຼາຍກິດຈະກໍາການທ່ອງທ່ຽວໃນແຕ່ລະແຂວງຂອງລາວ ໃຫ້ມີຄວາມຟົດຟື້ນ ບົນພື້ນຖານການທ່ອງທ່ຽວທໍາມະຊາດ, ປະຫວັດສາດ ແລະ ວັດທະນະທໍາ ແລະ ສະເໜີໃຫ້ບັນດາທຸຕານຸທູດ ຊຸກຍູ້ຂົນຂວາຍນັກທ່ອງທ່ຽວຂອງຕົນ ຈາກເອີຣົບມາທ່ຽວ ສປປ ລາວ ໃຫ້ຫລາຍຂຶ້ນ.

ນອກຈາກນີ້, ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສປປ ລາວ ແລະ ອີຢູ ໃນໄລຍະຜ່ານມາ, ຊຶ່ງການພົວພັນແມ່ນຢູ່ໃນທ່ວງທ່າທີ່ດີ, ເຖິງແມ່ນວ່າ ບາງດ້ານຍັງມີຂໍ້ຄົງຄ້າງ ແລະ ບໍ່ສະດວກບາງຄັ້ງຄາວ. ເຖິງແນວໃດກໍ່ຕາມ, ອີຢູ ແມ່ນໄດ້ໃຫ້ການຊ່ວຍເຫຼືອເພື່ອການພັດທະນາ ແກ່ ສປປ ລາວ ໃນການປັບປຸງຊີວິດການເປັນຢູ່ຂອງປະຊາຊົນ, ນັບແຕ່ປີ 2014-2020 ມີມູນຄ່າເຖິງ 207 ລ້ານເອີໂຣ, ຊຶ່ງແບ່ງເປັນ 2 ໄລຍະ ຄື: ສົກປີ 2014-2015 ຈໍານວນ 45 ລ້ານເອີໂຣ ແລະ ສົກປີ 2016-2020 ຈໍານວນ 162 ລ້ານເອີໂຣ, ໂດຍເນັ້ນໃສ່ວຽກງານທາງດ້ານການພັດທະນາຊັບພະຍາກອນມະນຸດ, ການສຶກສາຂັ້ນພື້ນຖານ, ດ້ານສາທາລະນະສຸກ, ດ້ານວຽກງານກົດໝາຍ ແລະ ສິດທິມະນຸດ, ດ້ານການປົກຄອງ ແລະ ອື່ນໆ. ພ້ອມນີ້, ສອງຝ່າຍຍັງໄດ້ທົບທວນຄືນການຈັດຕັ້ງປະຕິບັດ ບັນດາໂຄງການຕ່າງໆພາຍໃຕ້ການຊ່ວຍເຫຼືອຂອງ ອີຢູ ແລະ ປຶກສາຫາລື ເພື່ອສືບຕໍ່ຊຸກຍູ້ການປະຕິບັດບັນດາໂຄງການດັ່ງກ່າວໃຫ້ໄດ້ຮັບໝາກຜົນຢ່າງມີປະສິດທິພາບໃນອະນາຄົດ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນທັງສອງຝ່າຍ. ນອກນີ້, ສອງຝ່າຍຍັງໄດ້ແລກປ່ຽນຄໍາຄິດຄໍາເຫັນນໍາກັນ ກ່ຽວກັບ ສະພາບການພົ້ນເດັ່ນໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.

ໃນໂອກາດນີ້, ທ່ານ ແລໂອ ຟາເບີ (Leo Faber), ເອກອັກຄະລັດຖະທູດ ແຫ່ງ ສະຫະພາບ ເອີຣົບ ປະຈໍາ ສປປ ລາວ, ກໍໄດ້ຕາງໜ້າໃຫ້ຄະນະທຸຕານຸທູດ ສະແດງຄວາມຂອບໃຈຕໍ່ ທ່ານຮອງລັດຖະມົນຕີ ແສງເພັດ ຮຸ່ງບຸນຍວງ ທີ່ໃຫ້ການຕ້ອນຮັບອັນອົບອຸ່ນ ແລະ ໃຫ້ຄໍາຢຶນຢັນວ່າ ຕະຫຼອດໄລຍະການປະຕິບັດໜ້າທີ່ ຢູ່ ສປປ ລາວ ຈະເຮັດສຸດຄວາມສາມາດ ເພື່ອເຮັດໃຫ້ການພົວພັນຮ່ວມມື ລະຫວ່າງ ສປປ ລາວ ແລະ ອີຢູ ໄດ້ຮັບການເສີມຂະຫຍາຍຍິ່ງໆຂຶ້ນ. ພ້ອມນີ້, ກໍ່ໄດ້ແຈ້ງແຜນການ ແລະ ຈຸດປະສົງຂອງ ການມາຢ້ຽມຢາມ ສປປ ລາວ ຂອງຄະນະທຸຕານຸທູດ ໃນຄັ້ງນີ້ວ່າ ເປັນການຢັ້ງຢືນຄືນອີກເທື່ອໜຶ່ງ ຕໍ່ນະໂຍບາຍຂອງອີຢູ ໃນການຊ່ວຍເຫຼືອພັດທະນາ ສປປ ລາວ ແລະ ກໍ່ເປັນການສືບຕໍ່ເສີມຂະຫຍາຍສາຍພົວພັນ ແລະ ການຮ່ວມມືໃນຂອບສອງຝ່າຍ ແລະ ຫຼາຍຝ່າຍ, ແລະ ເປັນການສ້າງໂອກາດໃຫ້ບັນດາທຸຕານຸທູດ ໄດ້ເຫັນສະພາບການຕົວຈິງ ຂອງການພັດທະນາເສດຖະກິດ-ສັງຄົມ, ການເມືອງ ແລະ ການລົງທຶນ ຢຸ່ ສປປ ລາວ, ທັງຮັບຊາບນະໂຍບາຍ ແລະ ວິໄສທັດ ຂອງລັດຖະບານຊຸດໃໝ່ ໃນການຈັດຕັ້ງແຜນພັດທະນາເສດຖະກິດ-ສັງຄົມ ຂອງ ສປປ ລາວ ເພື່ອໃຫ້ຫຼຸດພົ້ນອອກຈາກບັນຊີປະເທດດ້ອຍພັດທະນາ ໃນປີ 2020 ແລະ ບັນລຸຕາມແຜນພັດທະນາ (SDGs) ຂອງອົງການສະຫະປະຊາຊາດ ອີກດ້ວຍ.