ທ່ານ ທອງ​ຜ່ານ ສະ​ຫວັນ​ເພັດ, ຮ​ອງ​ລັດ​ຖະ​ມົນ​ຕີ​ກະ​ຊວງ​ກາ​ນ​ຕ່າງ​ປະ​ເທດ ທັງ​ເປັນ​ເຈົ້າ​ໜ້າ​ທີ່​ອາ​ວຸ​ໂສ​ອາ​ຊຽນຂອງ ສ​ປ​ປ ລາວໄດ້​ນຳ​ພາ​ຄະ​ນະ​ຜູ້​ແທນ​ລາວ ເຂົ້າ​ຮ່ວມກອງ​ປະ​ຊຸມ​ປຶກ​ສາ​ຫາ​ລື​ອາ​ຊຽນ-ຍີ່​ປຸ່ນ ຄັ້ງ​ທີ 33, ຊຶ່ງ​ໄດ້​ຈັດ​ຂຶ້ນ​ໃນ​ວັນ​ທີ 13 ມິ​ຖຸ​ນາ 2018 ທີ່ ໂຕ​ກຽວ, ຍີ່​ປຸນພາຍ​ໃຕ້​ການ​ເປັນ​ປະ​ທານ​ຮ່ວມ​ຂອງ ທ່ານ Takeo MORI, ຮອງ​ລັດ​ຖະ​ມົນ​ຕີ​ຕ່າງ​ປະ​ເທດ ທ​ັງ​ເປັນ​ເຈົ້າ​ໜ້າ​ທີ່​ອາ​ວຸ​ໂສ​ອາ​ຊຽນຂອງຍີ່​ປຸ່ນ ແລະ ທ່ານ ນາງ Emaleen ABD RAHMAN TEO, ຫົວ​ໜ້າ​ຫ້ອງ​ການກະ​ຊ​ວງ​ການ​ຕ່າງ​ປະ​ເທດ ທັງ​ເປັນ​ເຈົ້າ​ໜ້າ​ທີ່​ອາ​ວຸ​ໂສອາ​ຊຽນຂອງບ​ຣູ​ໄນ.

ກອງ​ປະ​ຊຸມໄດ້​ທົບ​ທວນ​ຄືນ​ຄວາມ​ຄືບ​ໜ້າ​ຂອງ​ການ​ຮ່ວມ​ມື​ອາ​ຊຽນ-ຍີ່​ປຸ່ນ ໃນ​ໄລ​ຍະ​ປີ​ຜ່ານ​ມາກວມ​ເອົາ​ຂົງ​ເຂດ​ການ​ເມືອງ-ຄວາມ​ໝັ້ນ​ຄົງ, ເສດ​ຖະ​ກິດ​ ແລະ ວັດ​ທະ​ນາ​ທຳ​ສົງ​ຄົມ ໂດຍສະເພາະຄວາມຄືບໜ້າຂອງການ​ຮ່ວມມື​ ໃນຂົງເຂດການຕ້ານອາ​ສະ​ຍາ​ກຳ​ຂ້າມ​ຊາດ, ການ​ຕ້ານ​ການ​ກໍ​ການ​ຮ້າຍ, ການ​ຄ້າ​ ແລະ ການ​ລົງ​ທຶນ, ການ​ຄຸ້ມ​ຄອງ​ໄພ​ພິ​ບັດ​, ການ​ເຊື່ອມ​ຈອດ, ການ​ຮັດ​ແຄບ​ຄວາມ​ແຕກ​ໂຕນ​ດ້ານ​ການ​ພັດ​ທະ​ນາ, ການ​ສຶກ​ສາ, ສາ​ທາ​ລະ​ນະ​ສຸກ ແລະ ການ​ໄປ​ມາ​ຫາ​ສູ່​ ລະ​ຫວ່າງ ​ປະ​ຊາ​ຊົນລວມ​ທັງ​ການ​ຈັດ​ຕັ້ງ​ປະ​ຕິ​ບັດ​ບັນ​ດາ​ໂຄງ​ການ ແລະ ກິດ​ຈະ​ກຳ​ຕ່າງໆພາຍໃຕ້ແຜນປະຕິບັດງານ ເພື່ອ​ຈັດ​ຕັ້ງ​ປະ​ຕິ​ບັດ​ຖະ​ແຫຼງ​ການ​ວິ​ໄສ​ທັດ ວ່າ​ດ້ວຍ ມິດ​ຕະ​ພາບ ແລະ ການ​ຮ່ວມ​ມື​ອາ​ຊຽນ-ຍີ່​ປຸ່ນ ສະ​ບັບ​ປັບ​ປຸງ. ກອງ​ປະ​ຊຸມ​ ຍັງໄດ້​ປຶກ​ສາ​ຫາ​ລືກ່ຽວ​ກັບການ​ສະ​ເຫຼີມ​ສະຫຼອງ​ ຄົບ​ຮອບ 45 ປີ ແຫ່ງ​ມິດ​ຕະ​ພາບແລະການ​ຮ່ວມ​ມື ລະ​ຫວ່າງ ອາ​ຊຽນ ແລະ ຍີ່​ປຸ່ນໃນ​ປີ 2018 ນີ້. ກອງປະຊຸມ ໄດ້ແລກປ່ຽນກ່ຽວກັບບັນຫາພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ. ໃນໂອກາດນີ້, ກອງປະຊຸມໄດ້ປຶກສາຫາລື ແລະ ມກະກຽມດ້ານຕ່າງໆໃຫ້ໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ-ຍີ່ປຸ່ນ ທີ່ຈະຈັດຂຶ້ນໃນເດືອນສິງຫາ 2018 ທີ່ສິງກະໂປ.