ໃນລະຫວ່າງວັນທີ 13-16 ມິຖຸນາ 2018 ທີ່ຜ່ານມາ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ພົນຕີ ຄໍາສີ ວົງຄໍາຊາວ ຫົວໜ້າຫ້ອງວ່າການກະຊວງປ້ອງກັນປະເທດ ພ້ອມດ້ວຍຄະນະຈາກກະຊວງການຕ່າງປະເທດ ແລະ ກະຊວງປ້ອງກັນປະເທດ ໄດ້ເດີນທາງໄປຢ້ຽມຢາມການປະຕິບັດງານຮ່ວມ ລາວ-ອາເມລິກາ ໃນການສໍາຫຼວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ (MIA), ຄັ້ງທີ 4 ປະຈໍາສົກປີ 2017-2018, ຢູ່ເຂດບ້ານໜອງມ້າ, ເມືອງບົວລະພາ, ແຂວງຄຳມ່ວນ. ການເດີນທາງໄປຢ້ຽມຢາມຂອງຄະນະດັ່ງກ່າວໃນຄັ້ງນີ້ ແມ່ນເພື່ອເປັນການຕິດຕາມ ແລະ ກວດກາການປະຕິບັດງານຂອງຄະນະວິຊາການຮ່ວມ ລາວ-ອາເມລິກາ ໃນການປະຕິບັດວຽກງານດ້ານມະນຸດສະທຳ ແລະ ທັງເປັນການສະແດງເຖິງຄວາມເອົາໃຈໃສ່ໃຫ້ການຮ່ວມມືຂອງລັດຖະບານ ແຫ່ງ ສປປ ລາວ ເພື່ອແກ້ໄຂບັນຫາຜູ້ຫາຍສາບສູນໃນປາງສົງຄາມຢູ່ລາວ.
ໃນໂອກາດນີ້, ທ່ານຮອງລັດຖະມົນຕີກະຊວງການຕ່າງປະເທດ ກໍ່ໄດ້ພົບປະ ແລະ ໂອ້ລົມກັບບັນດາພະນັກ ງານວິຊາການປະຈໍາພາກສະໜາມຈາກກະຊວງການຕ່າງປະເທດ, ກະຊວງປ້ອງກັນປະເທດ ແລະ ອໍານາດການປົກຄອງທ້ອງຖິ່ນທີ່ຄ້າຍພັກບ້ານໜອງມ້າ, ເມືອງບົວລະພາ, ແຂວງຄຳມ່ວນ. ນອກຈາກນັ້ນ, ຄະນະຍັງໄດ້ເຄື່ອນໄຫວຢ້ຽມຢາມການປະຕິບັດງານຕົວຈິງຢູ່ຈຸດຂຸດຄົ້ນຕ່າງໆ, ໂດຍໄດ້ຮັບຟັງການລາຍງານສະພາບການປະຕິບັດວຽກງານຢູ່ແຕ່ລະຈຸດຂຸດຄົ້ນຈາກຫົວໜ້າພາກສະໜາມຝ່າຍລາວ ແລະ ຝ່າຍອາເມລິກາ, ຊຶ່ງເຫັນວ່າ ການຮ່ວມມືມີປະສິດທິຜົນອັນດີ, ຍ້ອນພະ ນັກງານວິຊາການທັງສູນກາງ ແລະ ທ້ອງຖິ່ນ ພ້ອມດ້ວຍພໍ່ແມ່ປະຊາຊົນທ້ອງຖິ່ນໄດ້ປະກອບສ່ວນຢ່າງຕັ້ງໜ້າ ແລະ ມີຄວາມເອົາໃຈໃສ່ຕໍ່ການປະຕິບັດໜ້າທີ່ວຽກງານຂອງຕົນເປັນຢ່າງດີ. ຄັ້ງນີ້ ໄດ້ຂຸດຄົ້ນພົບສິ້ນສ່ວນເສດເຫຼືອຂອງ ທະຫານອາເມລິກາຢູ່ຈຸດ 0376,ເຂດບ້ານໜອງມ້າ, ເມືອງບົວລະພາ, ແຂວງຄໍາມ່ວນ, ຊຶ່ງຈະໄດ້ຈັດພິທີມອບ-ຮັບຢ່າງເປັນທາງການໃນເວລາປິດພາກສະໜາມ
ຕະລອດໄລຍະເວລາ 30 ກວ່າປີທີ່ຜ່ານມາ, ການຮ່ວມມືສອງຝ່າຍລາວ-ອາເມລິກາ ໃນວຽກງານມະນຸດສະ ທຳໄດ້ພົບຄວາມຫຍຸ້ງຍາກຫຼາຍປະການ ເນື່ອງຈາກວ່າສະພາບແວດລ້ອມພູມີປະເທດທີ່ສູງຊັນ, ໄລຍະເວລາໃນການເຮັດວຽກຂຶ້ນກັບສະພາບດິນຟ້າອາກາດ, ຈຸດຂຸດຄົ້ນສ່ວນຫຼາຍບໍ່ມີທາງລົດເຂົ້າໄປເຖິງຈໍາເປັນຕ້ອງໄດ້ນໍາໃຊ້ຍົນ ແລະ ໄດ້ບຸກເບີກເສັ້ນທາງຈໍານວນໜຶ່ງ ເພື່ອຂົ່ນສົ່ງທີມງານ ແລະ ອຸປະກອນເຂົ້າໄປຈຸດຂຸດຄົ້ນ. ມາເຖິງປະຈຸບັນ ການຂຸດຄົ້ນໄດ້ສຳເລັດແລ້ວ ຈຳນວນ 282 ກໍລະນີ ຈາກຈໍານວນຜູ້ຫາຍສາບສູນທັງໝົດຢູ່ລາວໃນຈໍານວນ 573 ກໍລະນີ ແລະ ຍັງເຫຼືອຈະສືບຕໍ່ຄົ້ນຫາອີກ 291 ກໍລະນີ.
ສັງລວມແລ້ວ, ລັດຖະບານກໍ່ຄືປະຊາຊົນລາວໄດ້ໃຫ້ການຮ່ວມມືຕະຫຼອດມາ ແລະ ຈະສືບຕໍ່ໃຫ້ການຮ່ວມມືໃນວຽກງານດັ່ງກ່າວຕາມຄວາມອາດສາມາດຕົວຈິງ ເພື່ອນໍາເອົາສິ່ງເສດເຫຼືອຂອງທະຫານອາເມລິກາທີ່ຫາຍສາບສູນທັງໝົດສົ່ງຄືນໃຫ້ຄອບຄົວຂອງພວກກ່ຽວ. ການຮ່ວມມືໃນດ້ານນີ້ໄດ້ຮັບຜົນສຳເລັດເປັນຢ່າງດີ ກໍ່ຍ້ອນການຮ່ວມມືຂອງລັດຖະບານລາວ, ເຈົ້າໜ້າທີ່ຂອງລາວທຸກໆຂັ້ນແຕ່ສູນກາງລົງຮອດທ້ອງຖິ່ນ ແລະ ການຮ່ວມມືອັນດີຂອງປະຊາຊົນບັນ ດາເຜົ່າ. ສິ່ງເຫຼົ່ານີ້ໄດ້ສະແດງໃຫ້ເຫັນເຖິງນະໂຍບາຍມະນຸດສະທຳອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ປະຊາຊົນອາເມລິກາ, ໂດຍສະເພາະຕໍ່ຄອບຄົວຍາດພີ່ນ້ອງຂອງຜູ້ທີ່ຫາຍສາບສູນໃນປາງສົງຄາມຢູ່ລາວ.