ໃນວັນທີ 26-27 ມິຖຸນາ 2018 ,ທີ່ ສາງຊາ, ສປ ຈີນ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ, ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສ ວ່າດ້ວຍການຈັດຕັ້ງປະຕິບັດຖະແຫຼງການແຫ່ງການປະພຶດ ຂອງບັນດາຝ່າຍໃນທະເລຈີນໃຕ້ ຄັ້ງທີ 15 ພາຍໃຕ້ການເປັນປະທານຮ່ວມຂອງ ສິງກະໂປ ແລະ ສປ ຈີນ.
ໃນກອງປະຊຸມຄັ້ງນີ້, ບັນດາເຈົ້າໜ້າທີ່ອາວຸໂສຂອງບັນດາປະເທດສະມາຊິກອາຊຽນ ແລະ ສປ ຈີນ ໄດ້ທົບທວນຄືນ ແລະ ຕີລາຄາສູງ ຕໍ່ການຈັດຕັ້ງປະຕິບັດຖະແຫຼງການແຫ່ງການປະພຶດ ຂອງບັນດາຝ່າຍໃນທະເລຈີນໃຕ້ ແລະ ພ້ອມນີ້ ຍັງໄດ້ປຶກສາຫາລືກົດແຫ່ງການປະພຶດໃນທະເລຈີນໃຕ້ ພາຍຫຼັງທີ່ບັນດາຜູ້ນຳອາຊຽນ ແລະ ສປ ຈີນ ປະກາດເລີ່ມຕົ້ນການເຈລະຈາກົດແຫ່ງການປະພຶດ ໃນທ້າຍປີ 2017 ທີ່ຜ່ານມາ.