ໃນວັນທີ 05 ກໍລະກົດ 2018, ເວລາ 14:00 ໂມງ, ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີ ກະຊວງການຕ່າງປະເທດ, ໄດ້ໃຫ້ກຽດຕ້ອນຮັບ ທ່ານ ນາງ ມະນີໄລ ທິບພະລັງສີ ແລະ ທ່ານ ທີມໍ ເຮນດຣິກ ຮໍເກນຮຸດ, ກົງສຸນກິດຕິມະສັກ ແຫ່ງ ສາທາລະນະລັດ ສັງຄົມນິຍົມ ປະຊາທິປະໄຕ ສີລັງກາ ແລະ ໂຮນລັງ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ, ເຊິ່ງມີສຳນັກງານຕັ້ງຢູ່ ນະຄອນຫລວງວຽງຈັນຕາມລຳດັບ.
ໃນໂອກາດນີ້, ທ່ານ ຮອງລັດຖະມົນຕີ ກະຊວງການຕ່າງປະເທດ ໄດ້ສະແດງຄວາມຊົມເຊີຍ ແລະ ອວຍພອນໃຫ້ແກ່ ທ່ານ ນາງ ມະນີໄລ ທິບພະລັງສີ ແລະ ທ່ານ ທີມໍ ເຮນດຣິກ ຮໍເກນຮຸດ ທີ່ໄດ້ຮັບຫນ້າທີ່ ເປັນກົງສຸນກິດຕິມະສັກ ຢູ່ ສາທາລະນະລັດ ປະຊາທິປະໄຕ ປະຊາຊົນລາວ ປະສົບແຕ່ຜົນສຳເລັດໃນການປະຕິບັດຫນ້າທີ່ຂອງພວກກ່ຽວ, ທ່ານ ຮອງລັດຖະມົນຕີ ຍັງໄດ້ຢ້ຳຕື່ມວ່າ ຕະຫລອດໄລຍະການປະຕິບັດຫນ້າທີ່ດັ່ງກ່າວ, ທ່ານ ກົງສຸນກິດຕິມະສັກ ຈະໄດ້ປະກອບສ່ວນເປັນຂົວຕໍ່ອັນສຳຄັນ ໃນການສົ່ງເສີມ, ຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ-ສີລັງກາ ແລະ ລາວ-ໂຮນລັງ ໃຫ້ມີບາດກ້າວຂະຫຍາຍຕົວຂຶ້ນໄປເລື້ອຍໆ ເພື່ອແນໃສ່ນຳຜົນປະ ໂຫຍດມາສູ່ປະຊາຊົນພວກເຮົາ ກໍຄືປະຊາຊົນສອງປະເທດດັ່ງກ່າວ ແລະ ເປັນການປະກອບສ່ວນເຂົ້າໃນ ພາລະກິດສັນ ຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ. ທ່ານ ນາງ ມະນີໄລ ທິບພະລັງສີ ແລະ ທ່ານ ທີມໍ ເຮນດຣິກ ຮໍເກນຮຸດ, ໄດ້ສະແດງຄວາມດີໃຈ ແລະ ຂອບໃຈຕໍ່ທ່ານ ຮອງລັດຖະມົນຕີ ທີ່ໄດ້ສະ ຫລະເວລາອັນມີຄ່າໃຫ້ກຽດຕ້ອນຮັບ ແລະ ມອບຫນັງສືຮັບຮອງ ການແຕ່ງຕັ້ງເປັນກົງສຸນກິດຕິມະສັກ ແລະ ໄດ້ໃຫ້ຄຳຫມັ້ນສັນຍາວ່າ ຈະເຮັດສຸດຄວາມສາມາດ ເພື່ອເສີມຂະຫຍາຍການພົວພັນທີ່ມີມູນເຊື້ອ ໃຫ້ນັບມື້ນັບແຕກດອກອອກຜົນ.