ໃນວັນທີ 10 ຕຸລາ 2018, ທີ່ ກະຊວງການຕ່າງປະເທດ, ທ່ານ ນາງ ຄຳ​ເ​ພົາ ເອີນ​ທະ​ວັນ, ຮອງລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ ແຫ່ງ ສປປ ລາວ ໄດ້​ຕ້ອນ​ຮັບ​ການ​ເຂົ້າ​ຢ້ຽມຂ່ຳ​ນັບ ແລະ ມອບ​ໜັງ​ສື​ແຕ່ງ​ຕັ້ງຂອງ ທ່ານ ວໍລະວຸດ ພົງປະພາພັນ, ​ກົງ​ສຸນ​ໃຫຍ່ ​ແຫ່ງ ຣາຊະອານາຈັກໄທ ປະ​ຈຳ​ ແຂວງສະຫວັນນະເຂດ.

          ໃນໂອກາດດັ່ງກ່າວ, ທ່ານ ນາງ ຄຳເພົາ ເອີນທະວັນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ວໍລະວຸດ ພົງປະພາພັນ ທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນກົງສຸນໃຫຍ່ ແຫ່ງ ຣາຊະອານາຈັກໄທ ປະຈໍາແຂວງສະຫວັນນະເຂດ, ພ້ອມທັງໄດ້ສະແດງຄວາມເຊື່ອໝັ້ນວ່າ ໃນໄລຍະດໍາລົງຕໍາແໜ່ງນີ້ ທ່ານ ກົງສຸນໃຫຍ່ ຈະເຮັດສຸດຄວາມສາມາດ ເພື່ອສືບຕໍ່ເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສປປ ລາວ - ຣາຊະອານາຈັກ ໄທ ໃຫ້ໄດ້ຮັບການພັດທະນາຍິ່ງໆຂຶ້ນ. ພ້ອມນັ້ນ, ຮອງລັດທ່ານລັດຖະມົນຕີກໍໄດ້ ຕາງໜ້າລັດຖະບານ ແລະ ປະຊາຊົນລາວສະແດງຄວາມຂອບໃຈມາຍັງລັດຖະບານ ແລະ ປະຊາຊົນໄທ ທີ່ໄດ້ໃຫ້ການຊ່ວຍເຫຼືອ ສປປ ລາວ ດ້ານມະນຸດສະທຳ ທີ່ເປັນວັດຖຸປັດໄຈຕ່າງໆລວມທັງເງິນ ແລະ ທີມງານກູ້ໄພເພື່ອໄປຊ່ວຍປະຊາຊົນຜູ້ທີ່ໄດ້ຖືກເຄາະຮ້າຍ ຈາກໄພພິບັດທຳມະຊາດຢູ່ເມືອງສະໜາມໄຊ, ແຂວງອັດຕະປື ໃນທ້າຍ​​ເດືອນກໍລະກົດຜ່ານ​ມາ.
          ໃນໂອກາດດຽວກັນ, ທ່ານ ກົງສຸນໃຫຍ່ ກໍ່ໄດ້ສະແດງຄວາມຂອບໃຈຕໍ່ທ່ານຮອງລັດຖະມົນຕີຕ່າງປະເທດທີ່ໄດ້ໃຫ້ການຕ້ອນຮັບອັນອົບອຸ່ນ ແລະໃຫ້ຄໍາໝັ້ນສັນຍາວ່າ ຕະຫຼອດໄລຍະການປະຕິບັດໜ້າທີ່ຂອງຕົນ ຢູ່ ສປປ ລາວ ຈະເຮັດສຸດຄວາມສາມາດ ເພື່ອເຮັດໃຫ້ການພົວພັນຮ່ວມມືຂອງສອງຝ່າຍ ລາວ-ໄທ ໃຫ້ໄດ້ຮັບການພັດທະນາຍິ່ງໆຂຶ້ນ.