ໃນວັນທີ 22 ຕຸລາ 2018, ກະຊວງການຕ່າງປະເທດ ໄດ້ຈັດກອງປະຊຸມປຶກສາຫາລື ແລະ ຜັນຂະຫຍາຍຜົນຂອງ ກອງປະຊຸມສຸດຍອດ ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ (CLV) ຄັ້ງທີ 10, ກອງປະຊຸມສຸດຍອດ ກຳປູເຈຍ-ລາວ-ມຽນມາ-ຫວຽດນາມ (CLMV) ຄັ້ງທີ 9, ກອງປະຊຸມສຸດຍອດ ຍຸດທະສາດການຮ່ວມມື ດ້ານເສດຖະກິດ ແມ່ນໍ້າອີຣະວະດີ- ແມ່ນໍ້າເຈົ້າພະຍາ-ແມ່ນໍ້າຂອງ (ACMECS) ຄັ້ງທີ 8 ແລະ ກອງປະຊຸມສຸດຍອດ ແມ່ນໍ້າຂອງ-ຍີ່ປຸ່ນ ຄັ້ງທີ 10 ຂຶ້ນທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ນະຄອນຫຼວງວຽງຈັນ, ຊຶ່ງໄດ້ຮັບກຽດກ່າວເປີດກອງປະຊຸມໂດຍ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແລະ ມີຜູ້ເຂົ້າຮ່ວມຈາກ ກະຊວງຂະແໜງການກ່ຽວຂ້ອງ ຂັ້ນສູນກາງ ລວມທັງໝົດ 50 ທ່ານ.
ບັນດາຜູ້ເຂົ້າຮ່ວມ ໄດ້ຮັບຟັງການນຳສະເໜີ ກ່ຽວກັບ ຂໍ້ມູນພື້ນຖານ ແລະ ການສະຫຼຸບຕີລາຄາ ຂອບການຮ່ວມມື CLV, CLMV, ACMECS ແລະ ແມ່ນໍ້າຂອງ-ຍີ່ປຸ່ນ ໃນໄລຍະຜ່ານມາ ພ້ອມທັງໄດ້ຮັບຟັງໝາກຜົນຂອງ ກອງປະຊຸມສຸດຍອດ ຂອບການຮ່ວມມື ACMECS ຄັ້ງທີ 8 ແລະ ກອງປະຊຸມສຸດຍອດ CLMV ຄັ້ງທີ 9 ທີ່ ໄດ້ຈັດຂຶ້ນໃນເດືອນມີຖຸນາ 2018 ທີ່ ບາງກອກ, ປະເທດໄທ, ກອງປະຊຸມສຸດຍອດເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ (CLV) ຄັ້ງທີ 10 ໃນເດືອນມີນາ 2018 ທີ່ ຮ່າໂນ້ຍ, ສສ ຫວຽດນາມ ແລະ ກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 10 ໃນເດືອນຕຸລາ 2018 ທີ່ ໂຕກຽວ, ຍີ່ປຸ່ນ. ພ້ອມດຽວກັນນີ້, ກອງປະຊຸມ ຍັງໄດ້ປຶກສາຫາລື ກ່ຽວກັບ ການຜັນຂະຫຍາຍເນື້ອໃນຂອງ ບັນດາເອກະສານທີ່ຖືກຮັບຮອງເອົາຢູ່ໃນກອງປະຊຸມສຸດຍອດ ໃນ 4 ຂອບການຮ່ວມມືດັ່ງກ່າວຄື: 1). ຖະແຫຼງການຮ່ວມ ຂອງ ກອງປະຊຸມສຸດຍອດເຂດສາມຫຼ່ຽມພັດທະນາ (CLV) ຄັ້ງທີ 10; 2). ແຜນປະຕິບັດງານວ່າດ້ວຍການເຊື່ອມຈອດເສດຖະກິດ CLV ຮອດປີ 2030; 3). ຖະແຫຼງການຮ່ວມຂອງກອງປະຊຸມສຸດຍອດ CLMV ຄັ້ງທີ 9; 4). ຖະແຫຼງການບາງກອກ ຂອງ ກອງປະຊຸມສຸດຍອດ ACMECS ຄັ້ງທີ 8; 5). ແຜນແມ່ບົດ ACMECS ປີ 2019-2023; ແລະ 6). ຍຸດທະສາດໂຕກຽວ 2018 ເພື່ອສົ່ງເສີມການຮ່ວມມືລະຫວ່າງປະເທດ ແມ່ນໍ້າຂອງ ແລະ ຍີ່ປຸ່ນ ແຕ່ປີ 2019-2021.
ກອງປະຊຸມຄັ້ງນີ້ ໄດ້ອັດລົງດ້ວຍຜົນສຳເລັດອັນຈົບງາມ ໂດຍບັນລຸໄດ້ຕາມຈຸດປະສົງ ແລະ ເປົ້າໝາຍທີ່ກຳນົດໄວ້ ແລະ ຖືໄດ້ວ່າເປັນກອງປະຊຸມທີ່ມີຄວາມໝາຍຄວາມສຳຄັນຢ່າງຍິ່ງ ເພາະເປັນເວທີທີ່ໄດ້ເປີດໂອກາດໃຫ້ບັນດາຂະແໜງການກ່ຽວຂ້ອງ ໄດ້ປຶກສາຫາລື ແລະ ແລກປ່ຽນຄຳຄິດເຫັນນຳກັນ ຕໍ່ ບັນຫາ ແລະ ສິ່ງທ້າທາຍຕ່າງໆ ໃນການຈັດຕັງປະຕິບັດວຽກງານການຮ່ວມມືໃນຂອບ CLV, CLMV, ACMECS ແລະ ແມ່ນໍ້າຂອງ-ຍີ່ປຸ່ນ ໃນໄລຍະຜ່ານມາ ເພື່ອວາງແຜນວຽກງານໃນຕໍ່ໜ້າ ພາຍໃຕ້ກົນໄກການຮ່ວມມືດັ່ງກ່າວ.