ໃນວັນທີ 15 ພະຈິກ 2018, ທີ່ ຫໍປະຊຸມແຫ່ງຊາດ, ນະຄອນຫລວງວຽງຈັນ, ກະຊວງການຕ່າງປະເທດ ຮ່ວມກັບ ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານ (IOM) ໄດ້ຈັດກອງປະຊຸມ​ສຳ​ມະ​ນາ​ລະດັບ​ຊາດ​ ກ່ຽວກັບ ການເຄື່ອນຍ້າຍຖິ່ນຖານ ​ແລະ ການ​ຮ່ວມ​ມື​ ລະຫວ່າງ ສປປ ລາວ ແລະ ອົງການ IOM, ໂດຍການເປັນປະທານຮ່ວມຂອງ ທ່ານ ນ. ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ, ທ່ານ ນາງ ລໍຣາ ທອມຊັນ, ຮອງຜູ້ອຳນວຍການໃຫຍ່ ອົງການ IOM, ທີ່ມາຈາກສໍານັກງານໃຫຍ່ ທີ່ ເຊີແນວ, ປະເທດສະວິດ ແລະ ທ່ານ ນາງ ຄາຣິນາ ອິມໂມເນັນ, ຜູ້ປະສານງານຫ້ອງການ ສປຊ, ຜູ້ຕາງໜ້າອົງການ ສປຊ ເພື່ອການພັດທະນາ ປະຈຳ ສປປ ລາວ. ກອງປະຊຸມສຳມະນາຮ່ວມດັ່ງກ່າວ ແມ່ນຈັດຂຶ້ນເປັນຄັ້ງທໍາອິດ ລະຫວ່າງ ສປປ ລາວ ແລະ ອົງການ IOM ພາຍຫຼັງ ສປປ ລາວ ໄດ້ເຂົ້າເປັນສະມາຊິກຂອງອົງການ IOM ຢ່າງເປັນທາງການໃນທ້າຍເດືອນມິຖຸນາ ທີ່ຜ່ານມາ, ຊຶ່ງມີບັນ​ດາ​ຜູ້ຕາງໜ້າຈາກກະ​ຊວງ​ ແລະ ຂະແໜງ​ກ່ຽວ​ຂ້ອງອ້ອມຂ້າງສູນກາງ, ​ຄູ່​ຮ່ວມ​ພັດ​ທະ​ນາ, ບັນ​ດາ​ອົງການເຄືອຂ່າຍສ​ປ​ຊ, ອົງ​ການ​ຈັດຕັ້ງທາງ​ສັງ​ຄົມ ແລະ ພາກ​ເອ​ກະ​ຊົນ ​ເຂົ້າ​ຮ່ວມ.

      ຈຸດປະສົງຕົ້ນຕໍຂອງກອງປະຊຸມດັ່ງກ່າວ ​ແມ່ນ​ເພື່ອຍົກລະດັບຄວາມຮັບ​ຮູ້​ ແລະ ຄວາມເຂົ້າໃຈຂອງກະຊວງ ແລະ ຂະ​ແໜງ​ການ​ກ່ຽວຂ້ອງ ​ຕໍ່ກັບວຽກ​ງານ​ການ​ເຄື່ອນ​ຍ້າຍ​ຖິ່ນ​ຖານ ໂດຍ​ຜ່ານ​ບົດ​ນຳ​ສະ​ເໜີ​ທີ່​ສຳ​ຄັນ ແລະ ການປຶກສາຫາລື​ແບບ​ມີ​ສ່ວນ​ຮ່ວມ​ຂອງ​ຜູ້​ເຂົ້າ​ຮ່ວມໃນກອງປະຊຸມ. ພ້ອມ​ດຽວ​ກັນ​ນັ້ນ, ຍັງ​​ໄດ້​ປຶກສາຫາລື​ກັນ ​ກ່ຽວ​ກັ ບ​ສາຍພົວພັນດ້ານຕ່າງໆຂອງ​ການ​ເຄື່ອນ​ຍ້າຍ​ຖິ່ນ​ຖານ​ ຕໍ່ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ແຫ່ງ​ຊາດ 5 ປີ ​ຄັ້ງ​ທີ 8 ຂອງ ສ​ປ​ປ ລາວ ແລະ ວາລະ 2030 ​ເພື່ອ​ການ​ພັດ​ທະ​ນາ​ແບບ​ຍືນ​ຍົງ ແລະ ເປົ້າໝາຍການພັດທະນາແບບຍືນຍົງ (ປພຍ) ​ຂອງອົງການ ສປຊ ແລະ ໄດ້ນຳສະເໜີຫຍໍ້ ກ່ຽວກັບ ຮ່າງຖະ​ແຫຼ​ງການສາກົນ ​ວ່າ​ດ້ວຍ ການ​ເຄື່ອນ​ຍ້າຍຖິ່ນຖານ​ທີ່​ປອດ​ໄພ, ເປັນ​ລະ​ບຽບແລະປົກ​ກະ​ຕິ. ນອກຈາກນີ້, ກອງປະຊຸມດັ່ງກ່າວ ຍັງໄດ້ ປຶກສາຫາລື ກ່ຽວກັບ ທິດທາງແຜນການໃນການເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງ ສປປ ລາວ ແລະ ອົງການ IOM ໃນຕໍ່ໜ້າ.

      ໃນຕອນທ້າຍຂອງກອງປະຊຸມດັ່ງກ່າວ ຄະນະປະທານຮ່ວມໄດ້ສະຫລຸບຕີລາຄາ ເຖິງຜົນສຳເລັດຂອງກອງປະຊຸມສຳມະນາຄັ້ງນີ້ວ່າ ເປັນບາດກ້າວທີ່ສຳຄັນສຳລັບການຮ່ວມມືໃນຕໍ່ໜ້າ ລະຫວ່າງ ສປປ ລາວ, ອົງການ IOM ປະຈໍາ ສ​ປ​ປ ລາວ ແລະ ຄູ່​ຮ່ວມ​ພັດ​ທະ​ນາ ​ເພື່ອສືບຕໍ່ເສີມຂະຫຍາຍການ​ຮ່ວມ​ມື​​ ແລະ ສະໜັບສະໜູນ ລັດຖະບານ ສປປ ລາວ ​ໃນດ້ານຕ່າງໆ ເປັນ​ຕົ້ນແມ່ນ ການສ້າງຂີດຄວາມສາມາດໃຫ້ແກ່ພະນັກງານລັດ ແລະ ເຈົ້າໜ້າທີ່ກ່ຽວຂ້ອງ, ການຊ່ວຍເຫລືອຜູ້ເຄາະຮ້າຍຈາກການຄ້າມະນຸດ ແລະ ການເຄື່ອນຍ້າຍຖິ່ນຖານລະຫວ່າງປະເທດ, ການ​ຄຸ້ມ​ຄອງການເຂົ້າ-ອອກເມືອງ ແລະ ​ຊາຍ​ແດນ, ການປິ່ນປົວສຸ​ຂະ​ພາບ​ໃຫ້ແກ່​ແຮງງານເຄື່ອນ​ຍ້າຍ, ການ​ຕອບໂຕ້ ແລະ ການ​ຊ່ວຍເຫລືອໃນພາວະ​ໄພ​ພິ​ບັດ.