ໃນ​ຕອນ​ເຊົ້າ​ຂອງ​ວັນ​ທີ 12 ທັນວາ 2018, ທີ່​ກະຊວງ​ການ​ຕ່າງປະ​ເທດ, ​ທ່ານ ແສງເພັດ ຮຸ່ງບຸນຍວງ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ, ໄດ້ຮັບການເຂົ້າ​ຢ້ຽມ​ຄ່ຳ​ນັບ ​ແລະ ການຍື່ນ​ໜັງສື​ແຕ່ງ​ຕັ້ງ ​ຂອງ​ ທ່ານ ມູຮາມັດ ນາຊາ ຮາຢັດ (Mr. Muhammad Nasar Hayat) ຜູ້ຕາງໜ້າຄົນໃໝ່ ຂອງ ອົງການອາຫານ ແລະ ການກະເສດ (FAO) ປະຈຳ ສປປ ລາວ.

ໃນໂອກາດດັ່ງກ່າວ, ທ່ານ ຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ ທ່ານຜູ້ຕາງໜ້າຄົນໃໝ່ຂອງອົງການ FAO ປະຈໍາ ສປປ ລາວ. ທ່ານ ແສງເພັດ ຮ່ວງບຸນຍ່ວງ ໄດ້ຕີລາຄາສູງຕໍ່ການຮ່ວມມືທີ່ດີ ແລະ ການຊ່ວຍເຫຼືອຂອງອົງການ FAO ໃຫ້ແກ່ ສປປ ລາວ ໃນໄລຍະຜ່ານມາ ແລະ ຫວັງວ່າ ພາຍໃຕ້ການນຳພາຂອງຜູ້ຕາງໜ້າຄົນໃໝ່, ອົງການ FAO ຈະປະກອບສ່ວນອັນສຳຄັນ ເຂົ້າໃນການເພີ່ມທະວີການຮ່ວມມື ແລະ ສະໜັບສະໜູນລັດຖະບານ ສປປ ລາວ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8, ການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ​ແລະ ການ​ບັນ​ລຸ​​ເປົ້າ​ໝາຍການ​ພັດທະນາ​ແບບ​ຍືນ​ຍົງ ພາຍໃຕ້ຂອບວຽກທີ່ກ່ຽວຂ້ອງກັບອົງການ FAO ໃຫ້ບັນລຸໄດ້ຕາມຄາດໝາຍ, ໂດຍສະເພາະການສົ່ງເສີມຜະລິດຕະພັນກະສິກຳ ແລະ ການພັດທະນາຊົນນະບົດ, ການປັບປຸງການຄ້ຳປະກັນສະບຽງອາຫານ ແລະ ໂພຊະນາການ, ການສົ່ງເສີມ ແລະ ປົກປັກຮັກສາລະບົບນິເວດ ແລະ ປ່າໄມ້, ສ້າງຂີດຄວາມສາມາດເພື່ອຕອບໂຕ້ຄວາມສ່ຽງທາງດ້ານອາຫານ ແລະ ກະສິກຳ, ການຊ່ວຍເຫຼືອສຸກເສີນ ແລະ ຜົນກະທົບຈາກການປ່ຽນແປງດິນຟ້າອາກາດ.

ນອກຈາກນີ້, ທ່ານ ຮອງລັດຖະມົນຕີ ຍັງໄດ້ສະແດງຄວາມຂອບໃຈຕໍ່ອົງການ FAO ໃນການປະກອບສ່ວນຊ່ວຍເຫຼືອສຸກເສີນແກ່ປະຊາຊົນຜູ້ປະສົບໄພພິບັດທາງທຳມະຊາດໃນປີ 2018 ນີ້,​ ໄດ້ອວຍພອນໃຫ້ແກ່ຜູ້ຕາງໜ້າອົງການ FAO ຄົນໃໝ່ ປະສົບຜົນສຳເລັດໃນການປະຕິບັດໜ້າທີ່ວຽກງານຢຸ່ ສປປ ລາວ.

ທ່ານ ມູຮາມັດ ນາຊາ ຮາຢັດ, ຜູ້ຕາງໜ້າອົງການ FAO ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງ ທ່ານ ແສງເພັດ ຮ່ວງບຸນຍ່ວງ, ຮອງລັດຖະມົນຕີ ກະຊວງການຕ່າງປະເທດ ແລະ ມີຄຳເຫັນວ່າອົງການ FAO ຈະສຶບຕໍ່ເພີ່ມທະວີຮ່ວມມື ແລະ ຊ່ວຍເຫຼືອແກ່ ສປປ ລາວ ໃນການຈັດຕັ້ງປະຕິບັດແຜນຍຸດທະສາດການຮ່ວມມືສອງຝ່າຍ ລະຫວ່າງອົງການ FAO ແລະ ສປປ ລາວ (2016-2020) ແລະ ແຜນພັດທະນາເສດຖະກິດ-ສັງຄົມແຫ່ງຊາດ ຂອງ ສປປ ລາວ ໃຫ້ໄດ້ຮັບໝາກຜົນທີ່ດີຍິ່ງໆຂື້ນໃນຕໍ່ໜ້າ.