ຄະນະຜູ້ແທນລາວ ນຳພາໂດຍ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແລະຄະນະໄດ້ສຳເລັດການເຂົ້າຮ່ວມກອງປະຊຸມ ສປຊ ເພື່ອຮັບຮອງເອົາເອກະສານຄຳໝັ້ນສັນຍາສາກົນ ວ່າດ້ວຍ ການເຄື່ອນ ຍ້າຍຖິ່ນຖານ ຢ່າງປອດໄພ, ເປັນລະບຽບ ແລະ ປົກກະຕິ ທີ່ໄດ້ຈັດຂຶ້ນ ໃນວັນທີ 10-11 ທັນວາ 2018 ທີ່ເມືອງ   ມາຣາເກດສ, ຣາຊະອານາຈັກມາຣົກ, ພາຍໃຕ້ການເປັນປະທານຂອງລັດຖະມົນຕີກະຊວງຕ່າງປະເທດ ແລະ ການຮ່ວມມືສາກົນມາຣົກ ໂດຍມີປະມຸກລັດ, ຫົວໜ້າລັດຖະບານ ແລະ ຄະນະຜູ້ແທນຂັ້ນສູງຈາກປະເທດສະມາຊິກ ສປຊ ເຂົ້າຮ່ວມ 160 ກວ່າປະເທດ ແລະ ມີປະທານສະມັດຊາໃຫຍ່ ສປຊ ສະ​ໄໝທີ 73, ເລຂາທິການໃຫຍ່ ສປຊ, ຫົວໜ້າ ແລະ ຜູ້ຕາງໜ້າອົງການເຄືອຂ່າຍ ສປຊ ແລະ ອົງການຈັດຕັ້ງສາກົນອື່ນໆເຂົ້າຮ່ວມຢ່າງຫຼວງຫຼາຍ.

ໃນໂອກາດເຂົ້າຮ່ວມກອງປະຊຸມສາກົນທີ່ສຳຄັນໃນຄັ້ງນີ້, ທ່ານ ນາງ ຄໍາເພົາ ເອີນທະວັນ ໄດ້ຂຶ້ນກ່າວຄຳເຫັນຕໍ່ ກອງປະຊຸມ ໂດຍໄດ້ຊີ້ໃຫ້ເຫັນສະພາບຄວາມເປັນຈິງດ້ານການພັດທະນາ ແລະ ທີ່ຕັ້ງຂອງ ສປປ ລາວ ທີ່ເປັນທັງປະເທດ ຕົ້ນທາງ ແລະ ເປັນປະເທດປາຍທາງຂອງການເຄື່ອນຍ້າຍຖິ່ນຖານທີ່ມີລັກສະນະສະຫຼັບຊັບຊ້ອນ ແລະ ມີສາເຫດຕົ້ນຕໍມາຈາກສະພາບຄວາມທຸກຍາກ, ຄວາມແຕກໂຕນດ້ານການພັດທະນາ ແລະ ວິກິດການຕ່າງໆ ອັນໄດ້ບັັງຄັບໃຫ້ ຄົນສ່ວນຫຼາຍຈຳຕ້ອງເຄື່ອນຍ້າຍເພື່ອຊອກຫາໂອກາດທາງດ້ານເສດຖະກິດ ແລະ ຊີວິດການເປັນຢູ່ທີ່ດີ, ດັ່ງນັ້ນ ພວກເຮົາຄວນສຸມໃສ່ແກ້ໄຂບັນຫາທີ່ເປັນສາເຫດຕົ້ນຕໍທີ່ພາໃຫ້ເກີດມີການເຄື່ອນຍ້າຍຖິ່ນຖານດັ່ງກ່າວ.

ທ່ານໄດ້ສະແດງຄວາມຍິນດີຕໍ່ການຮັບຮອງເອົາເອກະສານຄຳໝັ້ນສັນຍາທີ່ສຳຄັນສະບັບນີ້ ຊຶ່ງເປັນເອກະສານທີ່ບໍ່ມີຂໍ້ຜູກມັດທາງກົດໝາຍ ແຕ່ຈະເປັນບ່ອນອີງສຳລັບວົງຄະນະຍາດສາກົນໃນການ ສົ່ງເສີມການຮ່ວມມືເພື່ອແກ້ໄຂບັນຫາທີ່ຕິດພັນກັບການເຄື່ອນຍ້າຍຖິ່ນຖານ, ພ້ອມທັງໄດ້ຢືນຢັນທັດສະນະຂອງ ສປປ ລາວ ໃນການທີ່ຈະຮ່ວມມືສະໜັບສະໜູນວົງຄະນະຍາດສາກົນ ໃນການຈັດຕັ້ງປະຕິບັດເອກະສານຄຳໜັັ້ນສັນຍາດັ່ງກ່າວ ໂດຍສອດຄ່ອງກັບນະໂຍບາຍ ລະບຽບການ ກໍຄື ສະພາບຄວາມເປັນຈິງພາຍໃນຂອງ ສປປ ລາວ.

ໃນໂອກາດເຂົ້າຮ່ວມກອງປະຊຸມຄັ້ງນີ້, ທ່ານຮອງລັດຖະມົນຕີຍັງໄດ້ພົບປະສອງຝ່າຍກັບ ທ່ານ ນາງ ມູເນຍ ບຸເຊຕາ (Mrs. Mounia Boucetta),​ ຮອງລັດຖະມົນຕີກະຊວງການຕ່າງປະເທດ ແລະ ການຮ່ວມມືສາກົນມາຣົກ ເພື່ອປຶກສາຫາລືຂອບການຮ່ວມມືສອງຝ່າຍ ແລະ ຫຼາຍຝ່າຍ ກໍຄືທິດທາງການຮ່ວມມືໃນຕໍ່ໜ້າ ໃນໂອກາດດັ່ງກ່າວ ກໍໄດ້ສະແດງຄວາມຂອບໃຈ ແລະ ຊົມເຊີຍຕໍ່ການຕ້ອນຮັບ ແລະ ການເປັນເຈົ້າພາບກອງປະຊຸມສາກົນທີ່ສຳຄັນໃນຄັ້ງນີ້ ດ້ວຍຜົນສຳເລັດອັນຈົບງາມ.