ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ​ແລະ ກອງ​ປະ​ຊຸມ​ເຈົ້າ​ໜ້າ​ທີ່​ອາ​ວຸ​ໂສ​ອາ​ຊຽນ​ແບບ​ວົງ​ແຄບ​ກ່ຽວ​ກັບ ແນວ​ຄວາມ​ຄິດອິນ​ໂດ-ປາ​ຊີ​ຟິກ ສະ​ບັບ​ຂອງ​ອາ​ຊຽນ, ໃນ​ລະ​ຫວ່າງວັນ​ທີ 7-8 ມີ​ນາ 2019 ທີ່ ຊຽງ​ລາຍ, ປະ​ເທດ ໄທ.

ກອງປະຊຸມເຈົ້າໜ້າທີ່ອາວຸໂສອາຊຽນ, ເຊີ່ງ​ຈັດ​ຂື້ນ​ໃນ​ວັນ​ທີ 7 ມີ​ນາ 2019 ໄດ້ປຶກສາຫາລື ກ່ຽວກັບການຮັດແໜ້ນປະຊາຄົມອາຊຽນໃຫ້ມີຄວາມເຂັ້ມແຂງ ແລະ ໄດ້ຮັບຊາບຄວາມຄືບໜ້າຂອງການຈັດຕັ້ງປະຕິບັດ ກິດ​ຈະ​ກຳບູລິມະສິດ ຂອງການ​ເປັນປະທານອາຊຽນຂອງໄທ ໃນປີ 2019, ປຶກສາຫາລື ກ່ຽວກັບ ການຮ່ວມມືຂອງອາຊຽນກັບພາຍນອກ ທີ່ແນໃສ່ຮັດແໜ້ນການເປັນຄູ່ຮ່ວມມືທັງພາຍໃນອາຊຽນ ແລະ ກັບພາຍນອກ ເພື່ອສົ່ງເສີມຄວາມຍືນຍົງໃນທຸກດ້ານ, ລວມທັງປຶກສາຫາລື ກ່ຽວກັບ ວັນເວລາຂອງການຈັດກອງປະຊຸມ ແລະ ກິດຈະກໍາ ລະຫວ່າງ ອາຊຽນ ກັບບັນດາຄູ່ຮ່ວມມືພາຍນອກ ສຳລັບປີ 2019. ພ້ອມ​ກັນ​ນັ້ນ, ກອງ​ປະ​ຊຸມ​ໄດ້​ປຶກ​ສາ​ຫາ​ລື​ ກ່ຽວ​ກັບ​ ການ​ກະ​ກຽມ​ໃຫ້​ແກ່ກອງ​ປະ​ຊຸມ​ສຸດຍອດ​ອາ​ຊຽນ ຄັ້ງ​ທີ 34 ທີ່​ຈະ​ຈັດ​ຂື້ນ​ໃນ​ເດືອນ ມິ​ຖຸ​ນາ 2019, ໂດຍ​ສະ​ເພາະ​ບັນ​ດາ​ເອ​ກະ​ສານ​ທີ່​ຜູ້​ນຳ​ອາ​ຊຽນ​ຈະ​ຮັບ​ຮອງເອົາ. ນ​ອກ​ຈາກນີ້,​ ກອງ​ປະ​ຊຸມຍັງໄດ້ແລກປ່ຽນທັດສະນະກ່ຽວກັບບັນຫາພາກພື້ນ ແລະ ສາກົນ ທີ່ພົ້ນເດັ່ນໃນປັນຈຸບັນ, ລວມ​ທັງ ການປະ​ເມີນ​ຄວາມ​ຕ້ອງ​ການ​ຕົວ​ຈິງ​ກ່ຽວ​ກັບ ການ​ຊ່ວຍ​ເຫຼືອ​ດ້ານ​ມະ​ນຸດ​ສະ​ທຳ​ຂອງ​ອາ​ຊຽນ ໃນລັດ​ລະ​ຄາຍ ຂອງ​ມຽນ​ມາ.

​ກອງ​ປະ​ຊຸມ​ເຈົ້າ​ໜ້າ​ທີ່​ອາ​ວຸ​ໂສ​ອາ​ຊຽນ​ແບບ​ວົງ​ແຄບ​ ໄດ້​ຈັດ​ຂື້ນໃນ​ວັນ​ທີ 8 ມີ​ນາ 2019 ເພື່ອແລກ​ປ່ຽນ​ຄຳ​ຄິດ​ເຫັນ ກ່ຽວກັບ​ ເອ​ກະ​ສານ​ແນວ​ຄວາມ​ຄິດ ອິນ​ໂດ-ປາ​ຊີ​ຟິກ ສະ​ບັບ​ຂອງ​ອາ​ຊຽນ, ແນ່ໃສ່ສົ່ງເສີມການຮ່ວມມືໃນພາກພື້ນ ທີ່ມີອາ​ຊຽນເປັນ​ແກນກາງ ​ແລະ ເພື່ອຮັບປະກັນຜົນປະໂຫຍດໂດຍ​ລວມຂອງອາຊຽນ.