ໃນວັນທີ 29 ມີນາ 2019, ກະຊວງການຕ່າງປະເທດ ໄດ້ຈັດກອງປະຊຸມສະຫລຸບການເຄື່ອນໄຫວວຽກງານກວດກາຂອງຂະແໜງການຕ່າງປະເທດ ປະຈຳປີ 2018 ໂດຍການໃຫ້ກຽດເປັນປະທານຂອງ ທ່ານ ນາງ. ຄໍາເພົາ ເອີນທະວັນ, ຄະນະປະຈຳພັກ, ປະທານຄະນະກວດກາພັກ, ຮອງລັດຖະມົນຕີກະຊວງການຕ່າງປະເທດ ເຊິ່ງມີຄະນະພັກ-ຄະນະນຳກະຊວງ, ບັນດາຄະນະກົມ, ຄະນະພະແນກ, ພະນັກງານຫລັກແຫລ່ງ ແລະ ລັດຖະກອນພາຍໃນກະຊວງການຕ່າງປະເທດເຂົ້າຮ່ວມ.
ກອງປະຊຸມຄັ້ງນີ້ ໄດ້ຕີລາຕາ ແລະ ຍົກໃຫ້ເຫັນການຈັດຕັ້ງປະຕິບັດວຽກງານກວດກາ ໂດຍສະເພາະໃນຂະ ແໜງການຕ່າງປະເທດໃນໄລຍະປີຜ່ານມາ ໂດຍການເອົາໃຈໃສ່ຊີ້ນຳ-ນຳພາຢ່າງໃກ້ຊິດ ແລະ ເປັນປົກກະຕິ ຈາກຄະນະພັກ-ຄະນະນຳກະຊວງການຕ່າງປະເທດ; ພ້ອມທັງ ໄດ້ເອົາໃຈໃສ່ຊຸກຍູ້ ແລະ ສ້າງເງື່ອນໄຂອຳນວຍຄວາມສະດວກສຳລັບການເຄື່ອນໄຫວວຽກງານວິຊາສະເພາະ ລວມເຖິງການກໍ່ສ້າງພະນັກງານກວດກາຂອງຂະແໜງການຕ່າງປະເທດ ໃຫ້ມີຄວາມສາມາດຮັບປະກັນວຽກງານແຕ່ລະໄລຍະໄດ້ຢ່າງມີປະສິດທິພາບ ແລະ ປະສິດທິຜົນ. ໃນປີ 2018 ຜ່ານມາ, ການເຄື່ອນໄຫວວຽກງານກວດກາຂອງກະຊວງ ຕປທ ໄດ້ດຳເນີນຢ່າງເປັນປົກກະຕິ ແລະ ສຳເລັດຕາມແຜນການທີ່ວາງໄວ້ຄື: ລົງກວດກາປົກກະຕິວຽກພັກ-ລັດ ລວມທັງໝົດ 25 ເປົ້າໝາຍ; ໃນນັ້ນ ມີ 03 ເປົ້າໝາຍ ກວດກາຕາມຄໍາສັ່ງ. ຜ່ານການເຄື່ອນໄຫວລົງກວດກາຕົວຈິງເຫັນວ່າ ຄະນະໜ່ວຍພັກທຸກຂັ້ນຕະຫລອດຮອດສະມາຊິກພັກ-ພະນັກງານຂອງກະຊວງ ຕປທ ມີຄວາມຮັບຮູ້, ເຂົ້າໃຈຢ່າງຖືກຕ້ອງ ຕໍ່ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫລວງ, ມີຄວາມຕື່ນຕົວ ແລະ ໃຫ້ການຮ່ວມມືເປັນຢ່າງດີ, ມີສະຕິຕໍ່ການຈັດຕັ້ງ, ເຄົາລົບກົດລະບຽບຂອງພັກ ແລະ ປະຕິບັດຕາມກົດໝາຍຂອງລັດຢ່າງເຂັ້ມງວດ; ພ້ອມດຽວກັນນັ້ນ, ກໍ່ໄດ້ວາງທິດທາງແຜນການເຄື່ອນໄຫວສຳລັບປີ 2019 ແລະ ເຜີຍແຜ່ເຊື່ອມຊືມເນຶ້ອໃນເອກະສານສໍາຄັນຈໍານວນໜຶ່ງເຊັ່ນ: ບົດໂອ້ລົມຂອງ ທ່ານ ປອ. ບຸນທອງ ຈິດມະນີ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫລວງ ຂັ້ນສູນກາງ ຕໍ່ກອງປະຊຸມວຽກງານກວດກາທົ່ວປະເທດ ປະຈຳປີ 2018; ບົດແນະນໍາກ່ຽວກັບການດໍາເນີນຊີວິດການເມືອງພາຍໃນພັກ ເພື່ອກ້າວເຂົ້າສູ່ກອງປະຊຸມໃຫຍ່ 03 ຂັ້ນ; ບົດປາຖະກະຖາ ເນື່ອງໃນໂອກາດວັນຕ້ານການສໍ້ລາດບັງຫລວງສາກົນ ຄົບຮອບ 14 ປີ (ວັນທີ 09 ທັນວາ 2003-09 ທັນວາ 2017); ແລະ ເອກະສານລະນຶກວັນສ້າງຕັ້ງອົງການກວດກາພັກ-ລັດ ສປປ ລາວ ຄົບຮອບ 37 ປີ (16 ກຸມພາ 1982-16 ກຸມພາ 2019).
ກອງປະຊຸມໃນຄັ້ງນີ້, ຍັງໄດ້ຮັບຟັງການໂອ້ລົມຂອງທ່ານ ສະເຫລີມໄຊ ກົມມະສິດ, ກຳມະການສູນກາງພັກ, ເຂລາຄະນະພັກກະຊວງ, ລັດຖະມົນຕີກະຊວງ ຕປທ ໂດຍເນັ້ນໃຫ້ຄະນະພັກທຸກຂັ້ນ, ສະມາຊິກພັກ, ພະນັກງານ-ລັດຖະກອນທຸກຄົນມີຄວາມເຂົ້າໃຈເລິກເຊິ່ງຕໍ່ພາລະບົດບາດຄວາມສຳຄັນຂອງວຽກງານກວດກາ ເຊິ່ງພັກ-ລັດຢາມໃດກໍ່ໃຫ້ຄວາມສຳຄັນ ແລະ ມີທັດສະນະທີ່ຈະແຈ້ງວ່າ: ການຕິດຕາມ, ກວດກາ ແມ່ນໜຶ່ງໃນພາລະບົດບາດຕົ້ນຕໍແຫ່ງການນຳພາຂອງພັກ, ບໍ່ມີການກວດກາກໍ່ໝາຍຄວາມວ່າບໍ່ມີການນຳພາ, ສ້າງຈິດສໍານຶກທີ່ດີຕໍ່ວຽກງານດັ່ງກ່າວທີ່ສອດຫ້ອຍຢູ່ໃນທຸກຂົງເຂດວຽກງານ ແລະ ນຳໄປຈັດຕັ້ງຜັນຂະຫຍາຍໃຫ້ມີປະສິດຜົນສຸງສູດໃນຂົງເຂດວຽກງານຕົນ; ພ້ອມນີ້ ກໍ່ໄດ້ຮຽກຮ້ອງການນໍາທຸກຂັ້ນ ກໍ່ຄືພະນັກງານກະຊວງການຕ່າງປະເທດຈົ່ງພ້ອມກັນເອົາໃຈໃສ່ເຮັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ ແລະ ມີບາດກ້າວບຸກທະລຸ.