ໃນວັນທີ 2 ເມສາ 2019, ທີ່ນະຄອນຫຼວງວຽງຈັນ, ກະຊວງການຕ່າງປະເທດໂດຍຮ່ວມມືກັບພາກສ່ວນຕ່າງໆທີ່ກ່ຽວຂ້ອງ ໄດ້ຈັດພິທີສະເຫຼີມສະຫຼອງວັນຟຣັງໂກໂຟນີສາກົນ 20 ມີນາ ຂຶ້ນຢ່າງເປັນທາງການ ຢູ່ທີ່ ສະໂມສອນໃຫຍ່, ຄະນະເສດຖະສາດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດ. ພິທີທາງການດັ່ງກ່າວ ແມ່ນດໍາເນີນໄປໂດຍການເປັນປະທານຂອງ ທ່ານ ນາງ ແສງເດືອນ ຫຼ້າຈັນທະບູນ, ລັດຖະມົນຕີກະຊວງສຶກສາທິການ ແລະ ກິລາ ແລະ ມີການເຂົ້າຮ່ວມເປັນກຽດຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທ່ານ ນາງ Florence Jeanblanc-Risler, ເອກອັກຄະລັດຖະທູດຝຣັ່ງ ປະຈໍາ ສປປ ລາວ. ນອກຈາກນີ້ ໃນພິທີດັ່ງກ່າວ ຍັງມີການເຂົ້າຮ່ວມຂອງບັນດາທູຕານຸທູດປະເທດທີ່ໃຊ້ພາສາຝຣັ່ງ; ທ່ານ ຫົວໜ້າຫ້ອງການມະຫາວິທະຍາໄລຟຣັງໂກໂຟນີ (AUF) ປະຈຳ ສປປ ລາວ; ບັນດາຄູອາຈານ ແລະ ນັກຮຽນ-ນັກສຶກສາທີ່ຮຽນພາສາຝຣັ່ງ ພາຍໃນມະຫາວິທະຍາໄລແຫ່ງຊາດເຂົ້າຮ່ວມຈຳນວນ 300 ກວ່າທ່ານ.
ໃນໂອກາດດັ່ງກ່າາວ, ທ່ານ ລັດຖະມົນຕີກະຊວງສຶກສາທິການ ແລະ ກິລາໄດ້ໃຫ້ກຽດກ່າວຄຳເຫັນ ໂດຍໄດ້ຍົກໃຫ້ເຫັນຄວາມໝາຍສຳຄັນຂອງວັນຟຣັງໂກໂຟນີສາກົນ, ການສົ່ງເສີມການນໍາໃຊ້ພາສາຝຣັ່ງ ຢູ່ ສປປ ລາວ ແລະ ການສົ່ງເສີມການພົວພັນຮ່ວມມືລະຫວ່າງ ສປປ ລາວ ແລະ ອົງການຟຣັງໂກໂຟນີສາກົນ (OIF). ພ້ອມດຽວກັນນີ້, ທ່ານເອກອັກຄະລັດຖະທູດຝຣັ່ງ ປະຈຳ ສປປ ລາວກໍໄດ້ກ່າວຄຳເຫັນໂດຍໄດ້ເນັ້ນເຖິງຄວາມສຳຄັນຂອງວັນຟຣັງໂກໂຟ ນີສາກົນ, ພ້ອມທັງໄດ້ຍົກໃຫ້ເຫັນການນຳໃຊ້ພາສາຝຣັ່ງໃນເວທີສາກົນ, ແລະ ການຮ່ວມມືດ້ານພາສາຝຣັ່ງ ຢູ່ ສປປ ລາວ. ນອກຈາກນີ້, ທ່ານ ບຸນຍະລິດ ສຸດທິຈັກ, ຜູ້ປະສານງານແຫ່ງຊາດ ປະຈຳ ອົງການດັ່ງກ່າວ, ກໍໄດ້ອ່ານສານຂອງ ເລຂາທິການໃຫຍ່ອົງການຟຣັງໂກໂຟນີສຳລັບການສະເຫຼີມສະຫຼອງວັນດັ່ງກ່າວປະຈຳປີ 2019 ພາຍໃຕ້ຫົວຂໍ້ “ກາລຸນາ ເວົ້າເປັນພາສາຝຣັ່ງ”
ໃນຕອນທ້າຍຂອງພິທີດັ່ງກ່າວ, ບັນດາຜູ້ເຂົ້າຮ່ວມ ໄດ້ຮ່ວມຊົມການສະແດງສິລະປະວັນນະຄະດີຂອງນ້ອງນັກຮຽນ-ນັກສຶກສາພາສາຝຣັ່ງ, ຕະຫຼອດເຖິງໄດ້ຢ້ຽມຊົມການວາງສະແດງຮູບພາບ ແລະ ຂໍ້ມູນຂ່າວສານກ່ຽວກັບການເຄື່ອນໄຫວກິດຈະກຳຕ່າງໆຂອງຄູອາຈານ ແລະ ນັກຮຽນ-ນັກສຶກສາພາສາຝຣັ່ງ ຂອງມະຫາວິທະຍາໄລແຫ່ງຊາດ ໃນຂອບວຽກງານຝຣັ່ງໂກໂຟນີ. ພິທີດັ່ງກ່າວ ໄດ້ດຳເນີນໄປ ແລະ ອັດລົງດ້ວຍຜົນສຳເລັັດຢ່າງຈົບງາມ.