ໃນວັນທີ27ມີນາ2019, ທີ່ນະຄອນຫຼວງວໍຊິງຕັນດີຊີ, ສະຫະລັດອາເມຣິກາ, ໄດ້ມີການຈັດກອງປະຊຸມປຶກສາຫາລືແບບກລມລວມກ່ຽວກັບ ການຮ່ວມມືສອງຝ່າຍລະຫວ່າງສປປລາວແລະສະຫະລັດ ອາເມຣິກາຄັ້ງທີ9ພາຍໃຕ້ການເປັນປະທານຮ່ວມຂອງທ່ານທອງຜ່ານສະຫວັນເພັດ, ຮອງລັດຖະມົນຕີກະຊວງການຕ່າງປະເທດແລະທ່ານPatrick Murphy, ຮອງຜູ້ຊ່ວຍລັດຖະມົນຕີກະຊວງຕ່າງປະເທດສະຫະລັດ ອາເມຣິກາ.
ໃນໂອກາດກອງປະຊຸມດັ່ງກ່າວ, ຄະນະຜູ້ແທນທັງສອງຝ່າຍ ລາວ-ອາເມຣິກາໄດ້ມີການທົບທວນ ແລະສະຫຼຸບຕີລາຄາຄືນການພົວພັນຮ່ວມມືລະຫວ່າງສອງປະເທດແຕ່ກອງປະຊຸມປຶກສາຫາລືແບບກວມລວມລະຫວ່າງສປປລາວແລະສະຫະລັດອາເມຣິກາຄັ້ງທີ8, ຊຶ່ງໄດ້ຈັດຂຶ້ນທີ່ນະຄອນຫຼວງວໍຊິງຕັນດີຊີ, ສະຫະລັດອາເມຣິກາໃນເດືອນກໍລະກົດ2017,ໂດຍສະເພາະທັງສອງຝ່າຍໄດ້ດຳເນີນການປຶກສາຫາລືແລະແລກປ່ຽນຄຳຄິດຄຳເຫັນນຳກັນຢ່າງກວ້າງຂວາງ ກ່ຽວກັບບັນຫາຕ່າງໆທີ່ນອນຢູ່ໃນຂອບການຮ່ວມມືສອງຝ່າຍເຊັ່ນ:ວຽກງານມະນຸດສະທຳ ເພື່ອຊອກຄົ້ນຫາສິ່ງເສດເຫຼືອ ຂອງທະຫານອາເມຣິກາທີ່ຫາຍສາບສູນໃນປາງສົງຄາມ(MIA),ການເກັບກູ້ລະເບີດທີ່ບໍ່ທັນແຕກ(UXO), ການຮ່ວມມືດ້ານສາທາລະນະສຸກ,ການສຶກສາແລະວັດທະນະທຳ,ການຊຸກຍູ້ສົ່ງເສີມການພົວພັນຮ່ວມມືດ້ານການຄ້າ-ການລົງທຶນແລະບັນຫາອື່ນໆ, ການຈັດຕັ້ງປະຕິບັດແລະຜັນຂະຫຍາຍຖະແຫຼງການຮ່ວມວ່າດ້ວຍການເປັນຄູ່ຮ່ວມມືແບບກວມລວມ ລະຫວ່າງ ສອງປະເທດ ໃນໂອກາດການຢ້ຽມຢາມລັດຖະກິດຄັ້ງປະຫວັດສາດຢູ່ສປປລາວຂອງປະທານາທິບໍດີບາຣັກ ໂອບາມາໃນເດືອນກັນຍາ2016. ນອກຈາກນັ້ນ, ທັງສອງຝ່າຍຍັງໄດ້ປຶກສາຫາລືກ່ຽວກັບການຮ່ວມມື ອາເມ ຣິກາ ກັບ ບັນດາປະເທດແມ່ນ້ຳຂອງ(LMI)ແລະບັນຫາສະພາບການພາກພື້ນແລະສາກົນທີ່ຕ່າງຝ່າຍໃຫ້ຄວາມສົນໃຈ, ເປັນຕົ້ນແມ່ນການແລກປ່ຽນທັດສະນະກ່ຽວກັບວຽກງານອາຊຽນ, ບົດບາດຂອງອາເມຣິກາໃນພາກພື້ນອາຊີ-ປາຊີຟິກແລະບັນຫາອື່ນໆ ອີກຈຳນວນໜຶ່ງ.
ຜ່ານການປຶກສາຫາລືສອງຝ່າຍເຫັນວ່າການພົວພັນຮ່ວມມືລະຫວ່າງສອງປະເທດໃນປະຈຸບັນມີທ່ວງທ່າຂະຫຍາຍຕົວໃໝ່. ຝ່າຍອາເມຣິກາ ສະແດງຄວາມຂອບໃຈ ຕໍ່ການຮ່ວມມືຂອງຝ່າຍລາວໃນໄລຍະຜ່ານມາ ລວມທັງການເຮັດບົດບາດເປັນປະເທດປະສານງານຕາງໜ້າອາຊຽນ ໃນການພົວພັນຮ່ວມມື ອາຊຽນ-ອາເມຣິກາແລະ ຢືນຢັນທີ່ຈະສືບຕໍ່ສະໜັບສະໜູນແລະໃຫ້ການຮ່ວມມືອັນດີກັບສປປລາວໃນອະນາຄົດ. ພ້ອມກັນນັ້ນ,ກໍ່ຈະປະກອບສ່ວນຢ່າງເໝາະສົມເຂົ້າໃນການຈັດຕັ້ງປະຕິບັດບັນດາໂຄງການຕ່າງໆທີ່ອາເມຣິກາມີສ່ວນຮ່ວມກັບບັນດາປະເທດອາຊຽນກໍ່ຄືບັນດາປະເທດໃນພາກພື້ນອາຊີ-ປາຊີຟິກ.