ໃນ​ວັນ​ທີ 3 ພຶດສະພາ 2019, ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ, ທັງ​ເປັນຫົວ​ໜ້າ​ເຈົ້າ​ໜ້າ​ທີ່​ອາ​ວຸ​ໂສອາ​ຊຽນຂອງ ສ​ປ​ປ ລ​າວ ໄດ້​ນໍາ​ພາ​ຄະ​ນະ​ຜູ້​ແທນ​ລາວ ເຂົ້າ​ຮ່ວມກອງ​ປະ​ຊຸມ​ປຶກສາຫາລື ອາຊຽນ-ອົດສະຕຣາລີ ຄັ້ງທີ 31ທີ່ ປຸດທຣາຈາຢາ, ມາເລເຊຍ ພາຍ​ໃຕ້​ການ​ເປັນ​ປະ​ທານ​ຮ່ວມ​ຂອງ ທ່ານ Dato’ Sri Muhammad Shahrul Ikram Bin Yaakob, ຫົວ​ໜ້າ​ຫ້ອງ​ການ​ກະ​ຊວງ​ການ​ຕ່າງ​ປະ​​ເທ​ດ, ທັງ​ເປັນຫົວ​ໜ້າເຈົ້າ​ໜ້າ​ທີ່​ອາ​ວຸ​ໂສອາ​ຊຽນຂອງມາເລເຊຍ ແລະ ທ່ານ Richard Maude, ​​ຜູ້​ຊ່ວຍ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ, ທັງເປັນຫົວ​ໜ້າເຈົ້າ​ໜ້າ​ທີ່​ອາ​ວຸ​ໂສອາ​ຊຽນຂອງອົດສະຕຣາລີ.

ກອງ​ປະ​ຊຸມໄດ້ສະແດງຄວາມຍິນດີຕໍ່ ໂອກາດຄົບຮອບ 45 ປີ ແຫ່ງການພົວພັນ ອາຊຽນ-ອົດສະຕຣາລີ ໃນປີ 2019 ແລະ ໄດ້​ທົບ​ທວນ​ຄືນ​ຄວາມ​ຄືບ​ໜ້າ​ຂອງ​ການ​ຮ່ວມ​ມື​ ອາ​ຊຽນ-ອົດສະຕຣາລີ ໃນ​ໄລ​ຍະ​ໜຶ່ງ​ປີ​ຜ່ານ​ມາ ​ໂດຍ​ສະ​ເພາະການ​ຜັນ​ຂະ​ຫຍາຍ​ຜົນກອງ​ປະ​ຊຸມ​ສຸດຍອດອາຫານເຊົ້າແບບບໍ່ເປັນທາງການ ອາຊຽນ-ອົດສະຕຣາລີ ໃນ​ເດືອນພະ​ຈິກ 2018 ທີ່ສິງ​ກະ​ໂປ ແລະ ກອງປະຊຸມສຸດຍອດ ອາຊຽນ-ອົດສະຕຣາລີ ສະໄໝພິເສດໃນເດືອນມີນາ 2018 ທີ່ ຊິດນີ, ອົດສະຕຣາລີ, ລວມ​ທັງ​ການ​ຈັດ​ຕັ້ງ​ປະ​ຕິ​ບັດບັນ​ດາ​ຂໍ້​ລິ​ເລີ່ມ​ໃນ​ຂົງ​ເຂດ​ຕ່າງໆ​ ທີ່ໄດ້ປະກາດໃນໂອກາດສອງກອງປະຊຸມສຸດຍອດ ເຊັ່ນ: ການ​ຕ້ານ​ການ​ກໍ່​ການ​ຮ້າຍ, ການ​ຮ່ວມ​ມື​ດ້ານ​ຄວາມ​ໝັ້ນ​ຄົງທາງ​ທະ​ເລ, ການ​ພັດ​ທະ​ນາ​ພື້ນ​ຖານ​ໂຄ່ງ​ລາງ ແລະ ການ​ປົກ​ຄອງ​ດ້ານ​ເສດ​ຖ​ະ​ກິດອາ​ຊີ​ຕາ​ເວັນ​ອອກ​ສຽງ​ໃຕ້, ການ​ພັດ​ທະ​ນາ​ຕົວ​ເມືອງ​ອັດ​ສະ​ລິ​ຍະ ແລະ ໂຄງ​ການ​ການ​ທູດ​ປະ​ຊາ​ຊົນຂ​ອງອົດ​ສະ​ຕ​ຣາ​ລີ (Australia Now).

ກອງປະຊຸມໄດ້ສະແດງຄວາມເພິ່ງພໍໃຈຕໍ່ຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານ ອາຊຽນ-ອົດສະຕຣາລີ ສໍາລັບປີ 2015-2019 ກວມ​ເອົາ​ຂົງ​ເຂດ​ການ​ເມືອງ-ຄວາມ​ໝັ້ນ​ຄົງ, ເສດ​ຖະ​ກິດ ແລະ ວັດ​ທະ​ນະ​ທຳ-ສັງ​ຄົມ, ຊຶ່ງ​ຈະ​ສິ້ນ​ສຸດ​ລົງ​ໃນ​ປີ 2019 ນີ້ພ້ອມ​ທັງຮັບຊາບຄວາມຄືບໜ້າຂອງການເຈລະຈາຮ່າງແຜນປະຕິບັດງານ ອາຊຽນ-ອົດສະຕຣາລີ ສະບັບໃໝ່ສຳ​ລັບ​ປີ 2020-2024, ​ຊຶ່ງຈະໄດ້​ຮັບ​ຮອງ​ເອົາ​ໃນ​ກອງ​ປະ​ຊຸມ​ລັດ​ຖະ​ມົນ​ຕີ​ຕ່າງ​ປະ​ເທດ​       ອາ​ຊຽນ-ອົດ​ສະ​ຕ​ຣາ​ລີ ໃນ​ເດືອນ​ສິງ​ຫາປີ 2019 ທີ່ບາງກອກ, ປະ​ເທດ​ໄທ. ກອງ​ປະ​ຊຸມໄດ້​​ເຫັນ​​ດີ​ເພີ່ມ​ທະ​ວີ​ການ​ຮ່ວມມື​ທີ່​ເປັນ​ຮູ​ບ​ປະ​ທຳໃນ​ຂົງ​ເຂດ​ຕ່າງໆທີ່​ມີ​ຄວາມ​ສົນ​ໃຈແລະທ່າ​ແຮງ​ຮ່ວມ​ກັນເຊັັ່ນ: ການຕ້ານການກໍ່ການຮ້າຍ ແລະ ອາຊະຍາກຳຂ້າມຊາດ, ຄວາມໝັ້ນຄົງທາງຄອມພິວເຕີ ແລະເຕັກໂນໂລຊີຂໍ້ມູນຂ່າວສານ (ICT), ການຮ່ວມມືທາງທະເລ, ການເຊື່ອມຈອດແລະການ​ເຊື່ອມ​ໂຍງ​ທາງ​ເສດ​ຖະ​ກິດ, ເສດ​ຖະ​ກິດ​ດີ​ຈີ​ຕອນ, ກາ​ນ​ຮັດ​ແຄບ​ຄວາມ​ແຕກ​ໂຕນດ້ານການພັດທະນາ,ການ​ສຶກ​ສາ, ກ​ານ​ແລກ​ປ່ຽນ​ລະ​ຫວ່າງປະ​ຊາ​ຊົນ, ການຮັບມືກັບສະພາບການປ່ຽນແປງຂອງດິນຟ້າອາກາດ, ການຮ່ວມມືໃນຂອບແມ່ນຳ້ຂອງ ແລະ ອື່ນ​ໆ.

​ກອງ​ປະ​ຊຸມ​​ໄດ້​ແລກ​ປ່ຽນ​ຄຳ​ຄິດ​​ເຫັນກ່ຽວ​ກັບບັນ​ຫາ​ພາກ​ພື້ນ ແລະ ສາ​ກົນທີ່​ມີ​ຄວາມ​ສົນ​ໃຈ​ຮ່ວມ​ກັນເຊັ່ນ: ​ການສືບຕໍ່​ສົ່ງເສີມລະບົບການຄ້າ​ຫຼາຍ​ຝ່າຍແບບເປີດກ້ວາງ, ໂຄງສ້າງພາກພື້ນ ທີ່ ອາ​ຊຽນ​ເປັນ​ຜູ້​ລິ​ເລີ່ມ ແລະ ບັນ​ຫາ​ອື່ນໆ. ນອກນີ້, ກອງ​ປະ​ຊຸ​ມ​ ຍັງ​ໄດ້ປຶກສາຫາລືການ​ກະ​ກຽມ​ໃຫ້​ແກ່ກອງ​ປະ​ຊຸມ​ລັດ​ຖະ​ມົນ​ຕີ​ຕ່າງ​ປະ​ເທດ ​ອາ​ຊຽນ-ອົດສະຕຣາລີ ຊຶ່ງ​ຈະ​ຈັດ​ຂຶ້ນ​ໃນ​ເດືອນ​ສິງຫາ 2019 ທີ່ບາງກອກ, ປະ​ເທດໄທ.