ໃນວັນທີ 20 ພຶດສະພາ 2019, ທີ່ກະຊວງການຕ່າງປະເທດ, ທ່ານ ນາງ ຄໍາເພົາ ເອີນທະວັນ, ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Gilad Cohen, ຫົວໜ້າກົມອາຊີ-ປາຊີຟິກ, ກະຊວງການຕ່າງປະເທດ ແຫ່ງ ອິດສະຣາແອນ ພ້ອມດ້ວຍຄະນະ, ໃນໂອກາດເດີນທາງຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 19-22 ພຶດສະພາ 2019.
ໃນໂອກາດນີ້, ທ່ານຮອງລັດຖະມົນຕີ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ຕໍ່ການເດີນທາງມາຢ້ຽມຢາມ ແລະ ເຮັດວຽກຂອງ ທ່ານ Gilad Cohen ພ້ອມດ້ວຍຄະນະ ໃນຄັ້ງນີ້ ແລະ ໄດ້ສະແດງຄວາມຊົມເຊີຍອັນຈິງໃຈ ແລະ ພອນໄຊອັນປະເສີດ ໄປຍັງລັດຖະບານ ແລະ ປະຊາຊົນ ອິດສະຣາແອນ ເນື່ອງໃນໂອກາດວັນຊາດ ແຫ່ງ ອິດສະຣາແອນ ຄົບຮອບ 71 ປີ ໃນວັນທີ 14 ພຶດສະພາ ຜ່ານມາ. ພາຍຫຼັງທີ່ ສປປ ລາວ ແລະ ອິດສະຣາແອນ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 06 ທັນວາ 1993 ເປັນຕົ້ນມາ ການພົວພັນຮ່ວມມືລະຫວ່າງສອງປະເທດ ໄດ້ມີການພັດທະນາຢ່າງຕໍ່ເນື່ອງ. ສອງຝ່າຍໄດ້ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນຕ່າງໆ ອັນໄດ້ປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ລະຫວ່າງສອງປະເທດ. ພ້ອມນີ້, ທ່ານຮອງລັດຖະມົນຕີ ໄດ້ສະແດງຄວາມຂອບໃຈ ໄປຍັງລັດຖະບານ ອິດສະຣາແອນ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນໄລຍະຜ່ານມາ ເປັນຕົ້ນ ດ້ານການພັດທະນາຊັບພະຍາກອນມະນຸດ, ໂດຍສະເພາະໃນຂະແໜງກະສິກໍາ ຜ່ານໂຄງການຮ່ວມມື ລະຫວ່າງ ອິດສະຣາແອນ ກັບ ມະຫາວິທະຍາໄລແຫ່ງຊາດລາວ, ມະຫາວິທະຍາໄລສະຫວັນນະເຂດ ແລະ ມະຫາວິທະຍາໄລສຸພານຸວົງ, ຊຶ່ງໃນໄລຍະຜ່ານມາ ໄດ້ມີການຮັບເອົານັກສຶກສາລາວ ໄປຝຶກອົບຮົມ ແລະ ເຮັດວຽກ ຢູ່ ອິດສະຣາແອນ ຫຼາຍກວ່າ 1.500 ຄົນ.
ໃນວັນດຽວກັນ, ທ່ານ Gilad Cohen ພ້ອມຄະນະ ຍັງໄດ້ພົບປະເຮັດວຽກກັບ ທ່ານ ນາງ ຟອງສະໝຸດ ອັ່ນລາວັນ, ຫົວໜ້າກົມອາຊີ-ປາຊີຟິກ ແລະ ອາຝຣິກາ, ກະຊວງການຕ່າງປະເທດ ແຫ່ງ ສປປ ລາວ. ສອງຝ່າຍ ໄດ້ທົບທວນຄືນຜົນການພົວພັນຮ່ວມມື ລະຫວ່າງ ສປປ ລາວ ແລະ ອິດສະຣາແອນ ໃນໄລຍະຜ່ານມາ ແລະ ໄດ້ປຶກສາຫາລື ເພື່ອເສີມຂະຫຍາຍການພົວພັນຮ່ວມມື ລະຫວ່າງສອງຝ່າຍໃນອະນາຄົດ. ພ້ອມນີ້, ສອງຝ່າຍ ຍັງໄດ້ປຶກສາຫາລື ກ່ຽວກັບ ສະພາບການພົ້ນເດັ່ນໃນພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.
ພ້ອມນັ້ນ, ທ່ານ Gilad Cohen, ຫົວໜ້າກົມອາຊີ-ປາຊີຟິກ, ກະຊວງການຕ່າງປະເທດ ແຫ່ງ ອິດສະຣາແອນ ພ້ອມດ້ວຍຄະນະ ກໍໄດ້ເຂົ້າຢ້ຽມຂໍ່ານັບ ທ່ານ ນາງ ສູນທອນ ໄຊຍະຈັກ, ຫົວໜ້າຄະນະພົວພັນຕ່າງປະເທດສູນກາງພັກ; ພົບປະເຮັດວຽກກັບ ຜູ້ປະສານງານອົງການ ສປຊ ປະຈໍາ ສປປ ລາວ ແລະ ຄະນະກໍາມາທິການແມ່ນໍ້າຂອງແຫ່ງຊາດ. ນອກນີ້, ທ່ານ Gilad Cohen ພ້ອມຄະນະ ຍັງໄດ້ເດີນທາງຢ້ຽມຢາມ ແລະ ເຮັດວຽກ ຢູ່ທີ່ ແຂວງຫຼວງພະບາງ ຕື່ມອີກ.