ໃນຕອນເຊົ້າວັນທີ 12 ມິຖຸນາ 2019, ທີ່ ກະຊວງການຕ່າງປະເທດ, ທ່ານ ນາງ ຄໍາເພົາ ເອີນທະວັນ, ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບ ແລະ ຍື່ນຂໍ້ຕົກລົງແຕ່ງຕັ້ງຂອງ ທ່ານ ຫວູ້ ແອ່ງ ຢຸ້ງ ເພື່ອມາດຳລົງຕຳແໜ່ງເປັນ ກົງສຸນໃຫຍ່ ຄົນໃໝ່ ແຫ່ງ ສສ. ຫວຽດນາມ ປະຈຳ 3 ແຂວງພາກກາງຂອງລາວ, ຊຶ່ງມີສຳນັກງານຕັ້ງຢູ່ ແຂວງສະຫວັນນະເຂດ, ສປປ ລາວ.
ໃນໂອກາດນີ້, ທ່ານຮອງລັດຖະມົນຕີ ຄຳເພົາ ເອີນທະວັນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ຫວູ້ ແອ່ງ ຢຸ້ງ ທີ່ໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງເປັນ ກົງສຸນໃຫຍ່ ຄົນໃໝ່ ແຫ່ງ ສສ. ຫວຽດນາມ ປະຈຳ 3 ແຂວງພາກກາງຂອງລາວ, ຊຶ່ງຈະເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ, ກໍ່ຄືການຊຸກຍູ້ການພົວພັນຮ່ວມມື ລະຫວ່າງ 3 ແຂວງພາກກາງຂອງລາວ ກັບບັນດາແຂວງພາກກາງຂອງຫວຽດນາມ ເປັນຕົ້ນ ແຂວງບໍລິຄໍາໄຊ ທີ່ໄດ້ມີການຮ່ວມມືກັບ 8 ແຂວງ; ແຂວງຄໍາມ່ວນ ມີການຮ່ວມມືກັບ 14 ແຂວງ ແລະ ແຂວງສະຫວັນນະເຂດ ມີການຮ່ວມມືກັບ 13 ແຂວງ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ພ້ອມນີ້, ກໍ່ສະເໜີໃຫ້ສືບຕໍ່ຊຸກຍູ້ປະສານສົມທົບກັບຂະແໜງການກ່ຽວຂ້ອງຂອງສອງຝ່າຍ ເພື່ອອໍານວຍຄວາມສະດວກໃຫ້ແກ່ການໄປມາຫາສູ່ກັນຂອງປະຊາຊົນແລະການຂົນສົ່ງສິນຄ້າ ລະຫວ່າງ ປະເທດຢູ່ບັນດາດ່ານຊາຍແດນຂອງບັນດາແຂວງ, ພ້ອມທັງເອົາໃຈໃສ່ຊຸກຍູ້ບັນດາແຂວງທີ່ມີຊາຍແດນຕິດຈອດກັນໃຫ້ຮັກສາເສັ້ນຊາຍແດນໃຫ້ມີຄວາມສະຫງົບ, ຮ່ວມກັນແກ້ໄຂບັນຫາການຍົກຍ້າຍພູມລໍາເນົາແລະການແຕ່ງດອງບໍ່ຖືກຕ້ອງຕາມລະບຽບກົດໝາຍ ຕາມບໍລິເວນຊາຍແດນຂອງສອງປະເທດ, ສືບຕໍ່ຊຸກຍູ້ຝ່າຍຫວຽດນາມ ໃນການຊ່ວຍກໍ່ສ້າງດ້ານຊັບພະຍາກອນມະນຸດ ໃຫ້ແກ່ບັນດາແຂວງພາກກາງຂອງລາວ; ຊຸກຍູ້ໃນການຈັດຕັ້ງປະຕິບັດບັນດາເນື້ອໃນບົດບັນທຶກ ຄວາມເຂົ້າໃຈລະຫວ່າງ 3 ແຂວງພາກກາງຂອງລາວກັບບັນດາແຂວງ, ທ້ອງຖິ່ນຂອງຫວຽດນາມທີ່ໄດ້ລົງນາມຮ່ວມກັນ ແລະ ຊຸກຍູ້ໃຫ້ນັກລົງທຶນຂອງຫວຽດນາມ ເຂົ້າມາລົງທຶນ ຢູ່ 3 ແຂວງຂອງລາວ ໃຫ້ຫຼາຍຂຶ້ນ.ພ້ອມນັ້ນ, ກໍໄດ້ສະແດງຄວາມເຊື່ອໝັ້ນວ່າ ທ່ານ ຫວູ້ ແອ່ງ ຢຸ້ງ ຈະສືບຕໍ່ເອົາໃຈໃສ່ໂຄສະນາເຜີຍແຜ່ມູນເຊື້ອການພົວພັນຮ່ວມມືລະຫວ່າງສອງປະເທດ ໃຫ້ແກ່ປະຊາຊົນຂອງສອງປະເທດຢູ່ທ້ອງຖິ່ນ ໃຫ້ປະກອບສ່ວນປົກປັກຮັກສາແລະເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດແລະການຮ່ວມມືຮອບດ້ານລະຫວ່າງສອງປະເທດພວກເຮົາ, ສືບຕໍ່ຂົນຂວາຍຊີ້ນຳສະມາຄົມຫວຽດນາມຢູ່ 3 ແຂວງ ໃນການປະກອບສ່ວນພັດທະນາທ້ອງຖິ່ນ ກໍ່ຄືເຄົາລົບລະບຽບກົດໝາຍຂອງ ສປປ ລາວ ແລະ ປະກອບສ່ວນເຂົ້າໃນວຽກງານເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ໃຫ້ນັບມື້ແຕກດອກອອກຜົນຍິ່ງໆຂຶ້ນ.
ໃນໂອກາດດຽວກັນນີ້, ທ່ານ ຫວູ້ ແອ່ງ ຢຸ້ງ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອົບອຸ່ນຂອງ ທ່ານຮອງລັດຖະມົນຕີ ຄໍາເພົາ ເອີນທະວັນ ແລະ ສະແດງຄວາມຂອບໃຈມາຍັງລັດຖະບານ ແຫ່ງ ສປປ ລາວ ທີ່ໄດ້ອະນຸມັດໃຫ້ທ່ານ ມາປະຕິບັດໜ້າທີ່ຢູ່ ສປປ ລາວ. ພ້ອມນີ້, ກໍ່ໄດ້ສະແດງຄວາມຢືນຢັນຈະສືບຕໍ່ເພີ່ມທະວີຊູກຍູ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຂອງສອງປະເທດ ຫວຽດນາມ-ລາວ ລາວ-ຫວຽດນາມ ໃຫ້ນັບມື້ຈະເລີນງອກງາມຂຶ້ນເລື້ອຍໆ.