ໃນຕອນເຊົ້າວັນທີ 19 ​ກັນຍາ 2019, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ສືບຕໍ່ເຂົ້າຮ່ວມກອງ​ປະ​ຊຸມ​ເຈົ້າ​ໜ້າ​ທີ່ອາ​ວຸ​ໂສອາ​ຊຽນບວກ​ສາມ ແລະ ກອງປະຊຸມເຈົ້າຫນ້າທີ່ອາວຸໂສຂອງກອງປະຊຸມສຸດຍອດອາຊີຕາເວັນອອກ (EAS).

ກອງປະຊຸມເຈົ້າ​ໜ້າ​ທີ່ອາ​ວຸ​ໂສອາ​ຊຽນບວກ​ສາມ ໄດ້ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິບັດແຜນງານກິດຈະກຳຮ່ວມມືອາຊຽນບວກສາມ ໂດຍສະເພາະບັນ​ດາ​ຂໍ້​ສະ​ເໜີ​ແນະ​ຂອງ​ໜ່ວຍ​ງານ​ວິ​ໄສ​ທັດ​ອາ​ຊີ​ຕາ​ເວັນ​ອອກ ຄັ້ງທີ II (EAVG II). ພ້ອມນີ້, ກອງປະຊຸມ ຍັງໄດ້ປຶກສາຫາລືການກະກຽມທາງດ້ານພາລາທິການ ແລະ ເນື້ອໃນໃຫ້ແກ່ກອງປະຊຸມສຸດຍອດອາຊຽນບວກສາມ ຄັ້ງທີ 22, ເຊິ່ງຈະຈັດຂື້ນໃນເດືອນພະຈິກ 2019 ທີ່ ບາງກອກ, ປະເທດໄທ ລວມທັງສະແດງຄວາມພໍໃຈຕໍ່ຄວາມຄືບໜ້າໃນການຮ່າງບັນດາເອກະສານ ທີ່ຈະນຳສະເໜີຕໍ່ກອງປະຊຸມສຸດຍອດດັ່ງກ່າວ ຮັບຮອງເອົາ ເປັນຕົ້ນ: ຖະແຫຼງການຜູ້ນໍາອາຊຽນບວກສາມວ່າດ້ວຍການເຊື່ອມສານບັນດາຂໍ້ລິເລີ່ມການເຊື່ອມຈອດ; ການສ້າງເວັບໄຊ ອາຊຽນບວກສາມ ແລະ ບັນດາຂໍ້ສະເໜີແນະຂອງ ເຄືອຂ່າຍຄັງປັນຍາອາຊີຕາເວັນອອກ (Network of East Asian Think-Tanks - NEAT).

ກອງປະຊຸມເຈົ້າຫນ້າທີ່ອາວຸໂສຂອງກອງປະຊຸມສຸດຍອດອາຊີຕາເວັນອອກ (EAS) ໄດ້ສະແດງຄວາມພໍເພີ່ງພໍໃຈຕໍ່ຄວາມຄືບໜ້າໃນການຈັດຕັ້ງປະຕິບັດຂອບການຮ່ວມມືກອງປະຊຸມສຸດຍອດອາຊີຕາເວັນອອກ ຜ່ານມາ ແລະ ໄດ້ພ້ອມກັນປຶກສາຫາລືການກະກຽມທັງທາງດ້ານພີທີການ ແລະ ເນື້ອໃນໃນດ້ານຕ່າງໆໃຫ້ແກ່ກອງປະຊຸມສຸດຍອດອາຊີຕາເວັນອອກ ຄັ້ງທີ 14 ໃນເດືອນພະຈິກ 2019 ທີ່ ບາງກອກ, ປະເທດໄທ ໂດຍສະເພາະໄດ້ກວດຄືນຄວາມຄືບໜ້າການຮ່າງບັນດາເອກະສານຜົນຂອງກອງປະຊຸມທີ່ຈະນຳສະເໜີໃຫ້ຜູ້ນຳ EAS ຮັບຮອງເອົາ, ເປັນຕົ້ນ : ຖະແຫຼ່ງການຕ້ານອາຊະຍາກໍາຂ້າມຊາດ; ຖະແຫຼ່ງການຕ້ານການແຜ່ຂະຫຍາຍຂອງຢາເສບຕິດ; ແລະ ຖະແຫຼ່ງການເປັນຄູ່ຮ່ວມເພື່ອຄວາມຍືນຍົງ.