ໃນວັນທີ 18 ກຸມພາ 2020, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຮອງຫົວໜ້າຄະນະກໍາມະການຮັບຜິດຊອບຊີ້ນໍາລວມ ເພື່ອກະກຽມ ແລະ ເປັນເຈົ້າພາບ ຈັດກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນໍ້າຂອງ-ແມ່ນໍ້າລ້ານ ຄັ້ງທີ 5 ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດ ກ່ຽວກັບ ການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ໄດ້ໃຫ້ສໍາພາດຂ່າວ ຕໍ່ສື່ມວນຊົນລາວ ກ່ຽວກັບ ການກະກຽມຄວາມພ້ອມໃນການເປັນເຈົ້າພາບຈັດສອງກອງປະຊຸມດັ່ງກ່າວ, ລາຍລະອຽດດັ່ງນີ້:

ການກະກຽມຄວາມພ້ອມຂອງອະນຸກໍາມະການຕ່າງໆ ໃນການເປັນເຈົ້າພາບ ຈັດກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດ ໃນວັນທີ 20 ກຸມພາ 2020

ກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດ ຈະຈັດຂຶ້ນໃນວັນທີ 20 ກຸມພາ 2020, ທີ່ ໂຮງແຮມດອນຈັນພາເລດ, ຕາມລາຍລະອຽດດັ່ງນີ:

1. ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດ ຈະຈັດໃສ່ພາກເຊົ້າ ຫຼັງຈາກສໍາເລັດກອງປະຊຸມ ຈະມີພິທີຖະແຫຼງຂ່າວຮ່ວມ.ພ້ອມດຽວກັນນັ້ນ ກ່ອນກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ກໍຈະມີກອງປະຊຸມພາຍໃນອາຊຽນກ່ອນ ຊຶ່ງແມ່ນກອງປະຊຸມເຈົ້າໜ້າທີ່ອາວຸໂສອາຊຽນ ແລະ ກອງປະຊຸມສະພາປະສານງານອາຊຽນສະໄໝພິເສດ.
2. ກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ຈະຈັດໃສ່ພາກບ່າຍ ຫຼັງຈາກສໍາເລັດກອງປະຊຸມ ຈະມີພິທີຖະແຫຼງຂ່າວຮ່ວມ.

ປັດຈຸບັນ ການກະກຽມເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດແມ່ນມີຄວາມຄືບໜ້າດີທັງທາງດ້ານເນື້ອໃນ, ພາລາທິການ ແລະ ບຸກຄະລາກອນ, ລວມເຖິງການກຽມຄວາມພ້ອມຂອງມາດຕະການປ້ອງກັນການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກໂຄໂຣນາສາຍພັນໃໝ່ (COVID 19), ​ໂດຍ​ໄດ້​ຮັບ​ການ​ຮ່ວມ​ມື ແລະ ຊ່ວຍ​ເຫລືອ​ເປັນ​ຢ່າງ​ດີ ຈາກ​ພາຍ​ໃນ ​ແລະ ຕ່າງປະ​ເທດ, ກໍ​ຄື ​ໄດ້​ສ້າງຕັ້ງຄະນະ​ກຳມະການ​ຮັບ​ຜິດຊອບ​ຊີ້​ນຳ​ລວມ ​ໂດຍ​ແມ່ນ ທ່ານ ສະເຫຼີມໄຊ ກົມມະສິດ, ລັດຖະມົນຕີ​ກະຊວງ​ການ​ຕ່າງປະ​ເທດ ເປັນຫົວໜ້າຄະນະ ​ແລະ ​ໄດ້​ແຕ່ງຕັ້ງ8ຄະນະ​ອະນຸກຳມະ​ການຮັບຜິດຊອບແຕ່ລະ​ໜ້າ​ວຽກແຕກຕ່າງ​ກັນ ຄື: ອະນຸກໍາມະການກະກຽມເນື້ອໃນ, ອະນຸກໍາມະການກອງເລຂາ, ອະນຸກໍາມະການພິທີການ, ສະຖານທີ່ພັກເຊົາ ແລະ ຕ້ອນຮັບ, ອະນຸກໍາມະການປ້ອງກັນຄວາມສະຫງົບ, ອະນຸກໍາມະການໂຄສະນາ ແລະ ຂ່າວສານ, ອະນຸກໍາມະການພາຫະນະຂົນສົ່ງ, ອະນຸກໍາມະການການແພດ ແລະ ສາທາລະນະສຸກ ແລະ ອະນຸກໍາມະການສັງລວມລາຍຈ່າຍ ແລະ ງົບປະມານ.

ບັນດາເນື້ອໃນ ແລະ ເອກະສານທີ່ຈະຮັບຮອງເອົາໃນກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດ

# ກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5

ກອງປະຊຸມຄັ້ງນີ້ ຈັດຂຶ້ນໂດຍການເປັນປະທານຮ່ວມຂອງ ທ່ານລັດຖະມົນຕີຕ່າງປະເທດ ແຫ່ງ ສປປ ລາວ ແລະ ທ່ານ ທີ່ປຶກສາແຫ່ງລັດ, ລັດຖະມົນຕີຕ່າງປະເທດ ແຫ່ງ ສປ ຈີນ.

ຈຸດປະສົງຂອງກອງປະຊຸມ ແມ່ນເພື່ອທົບທວນຄືນການຈັດຕັ້ງຜັນຂະຫຍາຍຜົນ ກອງປະຊຸມຜູ້ນຳແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2, ກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 4 ແລະ ແຜນປະຕິບັດງານ5 ປີ ແມ່ນໍ້າຂອງ-ແມ່ນໍ້າລ້ານຊ້າງ (2018-2022) ແລະ ຈະໄດ້ຮ່ວມກັນປຶກສາຫາລື ໃນການວາງທິດທາງການຮ່ວມມືໃນຕໍ່ໜ້າ ໂດຍແນໃສ່ການຮ່ວມກັນພັດທະນາເສດຖະກິດ-ສັງຄົມ ໃນຂົງເຂດພາກພື້ນແມ່ນໍ້າຂອງ ບົນພື້ນຖານ 3 ເສົ້້າຄໍ້າ (ການເມືອງ-ຄວາມໝັ້ນຄົງ; ການພັດທະນາເສດຖະກິດ; ສັງຄົມ-ວັດທະນະທໍາ ແລະ ການໄປມາຫາສູ່ຂອງປະຊາຊົນ ໃນພາກພື້ນແມ່ນໍ້າຂອງ) ແລະ 5 ຂົງເຂດບູລິມະສິດ (ການບໍລິຫານຊັບພະຍາກອນນໍ້າ; ການພັດທະນາກະສິກໍາ ແລະ ລືບລ້າງຄວາມທຸກຍາກ; ການເຊື່ອມໂຍງ ແລະ ເຊື່ອມຈອດ; ສ້າງຂີດຄວາມສາມາດໃນການຜະລິດ; ແລະ ເສດຖະກິດຂ້າມຊາຍແດນ).

ນອກຈາກນີ້, ກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ນີ້ຍັງເປັນການກະກຽມໃຫ້ແກ່ກອງປະຊຸມຜູ້ນຳ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ທີ່ ສປປ ລາວ ຈະເປັນເຈົ້າພາບຈັດຂຶ້ນໃນເດືອນ ມີນາ 2020 ທີ່ ນະຄອນຫລວງວຽງຈັນ.

ເອກະສານສໍາຄັນທີ່ຈະພິຈາລະນາຮັບຮອງເອົາໃນກອງປະຊຸມຄັ້ງນີ້ມີ 1 ສະບັບຄື: ບົດຖະແຫຼງຂ່າວຮ່ວມຂອງກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງຄັ້ງທີ 5 (Joint Press Communique of the 5^th Mekong-Lancang Cooperation Foreign Ministers’ Meeting).ພ້ອມທັງຮັບຊາບເອກະສານຄັດຕິດຈໍານວນ 3 ສະບັບຄື: 1). ບົດລາຍງານຄວາມຄືບໜ້າການຈັດຕັ້ງປະຕິບັດແຜນປະຕິບັດງານ 5 ປີ, 2). ຕາຕະລາງຕິດຕາມຄວາມຄືບໜ້າການຈັດຕັ້ງປະຕິບັດໂຄງການຮ່ວມມືແລະ 3). ບົດແນະນໍາຂອງສູນຄົ້ນຄວ້າແມ່ນໍ້າຂອງສາກົນກ່ຽວກັບການສ້າງແລວພັດທະນາເສດຖະກິດແມ່ນໍ້າຂອງ-ແມ່ນໍ້າລ້ານຊ້າງ.

ພາຍຫຼັງກອງປະຊຸມ, ກໍຈະມີກອງປະຊຸມຖະແຫຼງຂ່າວຂອງປະທານຮ່ວມຄື ທ່ານລັດຖະມົນຕີຕ່າງປະເທດ ແຫ່ງ ສປປ ລາວ ແລະ ທ່ານ ທີ່ປຶກສາແຫ່ງລັດ, ລັດຖະມົນຕີຕ່າງປະເທດ ແຫ່ງ ສປ ຈີນ.

# ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດກ່ຽວກັບ ການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່(COVID-19)

ກອງປະຊຸມຄັ້ງນີ້ ສປ ຈີນ ແລະ ສ. ຟີລິບປິນ (ໃນນາມປະເທດປະສານງານການຮ່ວມມື ອາຊຽນ-ຈີນ) ຈະຮ່ວມກັນເປັນປະທານ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອປຶກສາຫາລືແລະແລກປ່ຽນຄຳຄິດຄຳເຫັນຮ່ວມກັນລະຫວ່າງອາຊຽນແລະຈີນໃນການຊອກຫາຊ່ອງທາງ, ລວມທັງແລກປ່ຽນບົດຮຽນທີ່ດີແລະກຳນົດມາດຕະການໃນການຕ້ານແລະຮັບມືການລະບາດຂອງ ພະຍາດອັກເສບປອດຈາກເຊື້ອຈຸລະໂລກໂຄໂຣນາສາຍພັນໃໝ່ (COVID-19).

ກອງປະຊຸມຈະພິຈາລະນາຮັບຮອງເອົາ ຖະແຫຼງການຮ່ວມຂອງປະທານ ກ່ຽວກັບ ການຕ້ານແລະຮັບມືກັບການລະບາດ ຂອງພະຍາດອັກເສບປອດຈາກເຊື້ອຈຸລະໂລກໂຄໂຣນາສາຍພັນໃໝ່(COVID-19)ເພື່ອເປັນທິດທາງ ໃຫ້ແກ່ຂະແໜງການກ່ຽວຂ້ອງໄປຜັນຂະຫຍາຍຕໍ່ໄປ.

ພາຍຫຼັງກອງປະຊຸມ ຈະມີກອງປະຊຸມຖະແຫຼງຂ່າວຂອງປະທານຮ່ວມ ກ່ຽວກັບຜົນຂອງກອງປະຊຸມ.

ມາດຕະການເຝົ້າລະວັງ ແລະ ກະກຽມຄວາມພ້ອມ ໃນການປ້ອງກັນການແຜ່ລະບາດຂອງ (COVID-19)ໃນຊ່ວງໄລຍະກອງປະຊຸມ

ອີງຕາມບົດລາຍງານຂອງກະຊວງສາທາລະນະສຸກ, ປັດຈຸບັນ ສປປ ລາວ ຍັງບໍ່ມີກໍລະນີຕິດເຊື້ອພະຍາດດັ່ງກ່າວ, ເຊິ່ງກະຊວງສາທາລະນະສຸກ, ອົງການອະນາໄມໂລກ ແລະ ພາກສ່ວນກ່ຽວຂ້ອງ ກໍໄດ້ເອົາໃຈໃສ່ຕິດຕາມສະພາບການຢ່າງໃກ້ຊິດ.

ເພື່ອຮັບປະກັນໃຫ້ແກ່ສຸຂະພາບຂອງບັນດາລັດຖະມົນຕີຕ່າງປະເທດອາຊຽນ-ຈີນ ລວມທັງເລຂາທິການໃຫຍ່ ອາຊຽນ ແລະ ຜູ້ເຂົ້າຮ່ວມກອງປະຊຸມທັງໝົດ, ສ​ປ​ປລາວແມ່ນ​ໄດ້​ໃຫ້​ຄວາມ​ເປັນ​ຫວ່ງແລະຖື​ເປັນ​ບັນ​ຫາ​ສຳ​ຄັນແລະໄດ້​ມີ​ມາດ​ຕະ​ການ​ຕ່າງໆທີ່​ຈຳ​ເປັນມາ​ຕັ້ງ​ແຕ່​ຕົ້​ນ​ເດືອນມັງ​ກອນ, 2020. ພິເສດ, ທ່ານ​ນາ​ຍົກ​ລັດ​ຖະ​ມົນ​ຕີໄດ້​ແຕ່ງ​ຕັ້ງ​ຄະ​ນະ​ສະ​ເພາະ​ກິດ​ເພື່ອ​ຮັບ​ຜິດ​ຊອບ​ໂດຍ​ກົງ​ໃນ​ການ​ເຝົ້າ​ລະ​ວັງ, ປ້ອງ​ກັນ, ຄວບ​ຄຸມແລະຕອບ​ໂຕ້ ​ຕໍ່​ການ​ລະ​ບາດ​ຂອງ​ພະ​ຍາດ COVID-19.

ນອກ​ຈາກນັ້ນ, ກະ​ຊວງ​ກ່ຽວ​ຂ້ອງໂດຍ​ສະ​ເພາະກະ​ຊວງ​ສາ​ທາ​ລະ​ນະ​ສຸກໄດ້ວາງ​ມາດ​ຕະ​ການ​ສຳ​ຄັນຫຼາຍ​ຢ່າງ​ໃນການ​ປ້ອງ​ກັນ, ​ຄວບ​ຄຸມ​ການ​ລະ​ບາດ​ຂອງ​ພະ​ຍາດ​ດັ່ງ​ກ່າວ. ພວກ​ເຮົາ​ໄດ້​ປະ​ຕິ​ບັດ​ກົນ​ລະ​ບຽບ​ສາ​ກົນ​ດ້ານ​ສາ​ທາ​ລະ​ນະ​ສຸກ (International Health Regulation) ຢ່າງ​ເຂັ່ງ​ຂັດ.

ສະ​ນັ້​ນ, ຈຶ່ງ​ເວົ້າ​ໄດ້​ວ່າສ​ປ​ປລາວ ​ແມ່ນ​ມີ​ຄວາມ​ພ້ອມ​ສູງ​ໃນ​ການ​ປ້ອງ​ກັນແລະຄວບ​ຄຸມ​ໃນ​ການ​ລະ​ບາດ​ຂອງ​ພະ​ຍາດ​ COVID-19. ເ​ຖິງ​ຢ່າງ​ໃດ​ກໍ່​ດີ, ເພື່ອ​ປ້ອງ​ກັນ​ການ​ແຜ່​ລະ​ບາດ​ຂອງ​ພະ​ຍາດ​ດັ່ງ​ກ່າວ​ໃຫ້​ໄດ້​​ດີ​​ທີ່​ສຸດໂດຍ​ສະ​ເພາະໃນ​ໄລ​ຍະປະ​ເທດ​ເຮົາ​ເປັນ​ເຈົ້າ​ພາບ​ກອງ​ປະ​ຊຸມທີ່​ຈະ​ມີ​ແຂກ​ຮັບ​ເຊີນ​ຂັ້ນ​ສູງ​​ມາ​ຈາກຫຼາຍ​ປະ​ເທດ. ພວກ​ເຮົາ​ໄດ້​ວາງ​ມາດ​ຕະ​ການ​ເພີ່ມ​ຕື່ມໂດຍ​ອີງ​ໃສ່​ກົດ​ລະ​ບຽບ​ສາ​ກົນ​ດ້ານ​ສາ​ທາ​ລະ​ນະ​ສຸກດັ່ງ​ຕໍ່​ໄປ​ນີ້:

- ໄດ້​ຕິດ​ຕັ້ງ ເຄື່ອງວັດ​ແທກ​ອຸນ​ຫະ​​ພຸມ​ຂອງ​ຮ່າງ​ກາຍ (Thermo Scan) ຢູ່​ສະ​ໜາມ​ບິນ​ສາ​ກົນ​ວັດ​ໄຕ, ສະ​ໜາມ​ບິນ​ສາ​ກົນ​ນະ​ຄອນຫຼວງ​ພະ​ບາງ ເພື່ອ​ກວດ​ວັດ​ແທກ​ອຸນ​ຫະ​ພຸມ​ຮ່າງ​ກາຍ​ຂອງ​​ບັນ​ດາ​ນັກ​ທ່ອງ​ທ່ຽວ ແລະ ​ແຂກ​ທຸກ​ທ່ານ​ທີ່​ຈະ​ເ​ດີນ​ທາງ​ມາ ປະ​ເທດ​ເຮົາ;

- ໄດ້​ມີ​ການ​ກະ​ກຽມ​ຫ້ອງ​ແຍກ​ດ່ຽວ​ຢູ່​ສະ​ໜາມ​ບິນ​ສາ​ກົນ ເພື່ອ​ຕິດ​ຕາມ ແລະ ກຽ​ມ​ສົ່ງ​ຕໍ່​​ຄົນ​ເຈັບ​ທີ່​ມີ​ອາ​ການ​ສົ່ງ​ໃສ່ໄປ​ ໂຮງ​ໝໍ​ມິດ​ຕະ​ພາບ ແລະ ໂຮງ​ໝໍ 103 ​ບ່ອນ​ທີ່​ໄດ້​ມີ​ການ​ກະ​ກຽມ​ຄວາມ​ພ້ອມດ້ານ​ຕ່າງໆ ເພື່ອ​ຕິດ​ຕາມ ແລະ ປິ່ນ​ປົວ​ຖ້າ​ມີ​ຄົນ​ເຈັບ​ທີ່​ມີ​ອາ​ການ​ສົງ​ໃສ່ ຫຼື ເປັນ​ພະ​ຍາດ ຍ້ອນ​ເຊື້ອ COVID-19 ໄວ້​ແລ້ວ;

- ໄດ້​ມີ​​ລົດ​ນຳ​ສົ່ງ​ຄົນ​ເຈັບ​ສະ​ເພາະ ທີ່ສາ​ມາດ​ຮຽກ​ໃຊ້ໄດ້ຕະຫຼອດ 24 ຊົ່ວ​ໂມງ ແລະ ມີ​ເບີ​ໂທ​ສາຍ​ດ່ວນ ເລກ​ເບີ 166 ແລະ ເບີ​ໂທ IHR 02054066777 ຕະຫຼອດ 24 ຊົ່ວ​ໂມງ; 

- ໄດ້​ມີ​ການ​ຕິດ​ຕັ້ງ Thermo Scan ຢູ່​ໂຮງ​ແຮມ​ບ່ອນ​ທີ່​ຈະ​ຈັດ​ກອງ​ປະ​ຊຸມ, ​ເພື່ອ​ວັດ​ແທກ​ອຸນ​ຫະ​ພຸມ​ຮ່າງ​ກາຍ​ຂ​ອງ​ແຂກ​ທີ່​ເຂົ້າ​ຮ່ວມກອງ​ປະ​ຊຸມ ຖ້າ​ພົບ​ກໍ​ລະ​ນີ​ສົ່ງ​ໃສ່​ກໍ່​ຈະ​ໄດ້​ອະ​ນຸ​ຍາດເພື່ອ​ດຳ​ເນີນ​ຕາມ​ມາດ​ຕະ​ການ​ຕ່າງໆ​ທີ່​ໄດ້​ວາງ​ໄວ້;

- ພະ​ນັກ​ງານ​ທັງ​ໝົດຂອງ​​ໂຮງ​ແຮມ​ຕ້ອງ​ໄດ້​ໃສ່​ໜ້າ​ກາກ​ອະ​ນາ​ໄມ​ ໃນ​ເວ​ລາ​ຮັບ​ໃຊ້​ແຂກ​ທີ່​ເຂົ້າມາ​​ໃຊ້​ບໍ​ລິ​ການ​ໂຮງ​ແຮມ.