ໃນລະຫວ່າງວັນທີ 18-20 ກຸມພາ 2020, ທ່ານ Dr. Qu Dongyu, ຜູ້ອຳນວຍການໃຫຍ່ອົງການອາຫານ ແລະ ການກະເສດ (FAO) ຊຶ່ງມີສຳນັກງານໃຫຍ່ຕັ້ງຢູ່ທີ່ ນະຄອນຫຼວງໂຣມ, ປະເທດ ອິຕາລີ, ພ້ອມດ້ວຍຄະນະ ໄດ້ເດີນ​ທາງ​ມາຢ້ຽມຢາມ ສ​ປ​ປ ລາວ ຢ່າງເປັນທາງການ ຊຶ່ງເປັນຄັ້ງທຳອິດນັບຕັ້ງແຕ່ທ່ານໄດ້ຮັບຕຳແໜ່ງເປັນ ຜູ້ອຳນວຍການໃຫຍ່ຄົນໃໝ່ຂອງ ອົງການ FAO ແລະ ເປັນຄັ້ງທີ່ສອງໃນຮອບສອງປີຕິດຕໍ່ກັນ ທີ່ຜູ້ອຳນວຍການໃຫຍ່ ອົງການ FAO ໄດ້ເດີນທາງມາຢ້ຽມຢາມ ສປປ ລາວ ໃນປີ 2019 ຜ່ານມາ ຊຶ່ງເປັນຄັ້ງທຳອິດໃນຮອບ 30 ປີ.

ໃນໂອກາດດັ່ງກ່າວຄະນະຜູ້ແທນ​ຈາກ ອົງການ FAOໄດ້ເຂົ້າ​ຢ້ຽ​ມ​ຂໍ່າ​ນັບການ​ນຳ​ຂັ້ນ​ສູງ​ຂອງ ສ​ປ​ປ ລາວ​ ໂດຍໄດ້ເຂົ້າພົບ ພະນະທ່ານ ທອງລຸນ ສີສຸລິດ, ​ນາ​ຍົກ​ລັດ​ຖະ​ມົນ​ຕີ ແຫ່ງ ສປປ ລາວ ໃນວັນທີ 19 ກຸມພາ 2020 ຊຶ່ງທ່ານນາຍົກລັດຖະມົນຕີ ກໍໍ່ໄດ້ຕີລາຄາສູງຕໍ່ການຢ້ຽມຢາມ ສປປ ລາວ ໃນຄັ້ງນີ້ ເປັນການຮັດແໜ້ນສາຍພົວພັນການຮ່ວມມື ລະຫວ່າງ ສປປ ລາວ ແລະ ອົງການ ໃຫ້ແໜ້ນແຟ້ນຂຶ້ນກວ່າເກົ່າ ແລະ ໄດ້ມີການແລກປ່ຽນປຶກສາຫາລື ກ່ຽວກັບບັນດາໂຄງການຮ່ວມມືໃນໄລຍະຜ່ານມາ ແລະ ແນວທາງການຮ່ວມມືໃນຕໍ່ໜ້າ ໂດຍສະເພາະແມ່ນຂໍ້ລິເລີ່ມຈາກມືສູ່ມື (Hand-in-Hand Initiative) ຂອງ ຜູ້ອຳນວຍການໃຫຍ່ຄົນໃໝ່ ຊຶ່ງຈຸດປະສົງແມ່ນເພື່ອນຳເອົາການຊ່ວຍເຫຼືອຈາກບັນດາຄູ່ຮ່ວມພັດທະນາ ມາສູ່ບັນດາປະເທດທີ່ມີຄວາມຈຳເປັນ. ໃນໂອກາດນີ້, ໃນນາມຕາງໜ້າໃຫ້ລັດຖະບານ ສປປ ລາວ ທ່ານ ນາຍົກລັດຖະມົນຕີ ກໍ່ໄດ້ສະແດງຄວາມຂອບໃຈມາຍັງອົງການ ທີ່ໄດ້ປະກອບສ່ວນໃນການລະດົມຂົນຂວາຍທຶນເຂົ້າໃນການປັບປຸງແລະພັດທະນາວຽກງານໃນຂົງເຂດກ່ຽວຂ້ອງ ໂດຍຜ່ານບັນດາໂຄງການຕ່າງໆທີ່ໄດ້ຈັດຕັ້ງປະຕິບັດ ຮ່ວມກັບຂະແໜງການພາກລັດຂອງລາວ ລວມເຖິງບັນດາໂຄງການຊ່ວຍເຫຼືອທີ່ຈະເກີດມີໃນອະນາຄົດ. ນອກຈາກນີ້, ທ່ານນາຍົກລັດຖະມົນຕີ ຍັງໄດ້ໃຫ້ຂໍ້ມູນແກ່ ທ່ານຜູ້ອຳນວຍການໃຫຍ່ ອົງການ FAO ກ່ຽວກັບບັນດາວຽກງານບູລິມະສິດຕ່າງໆຂອງລັດຖະບານ ໂດຍສະເພາະການສຸມໃສ່ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 ​(2016-2020)ກໍ່ຄື ການກະກຽມໃຫ້ແກ່ການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021 - 2025), ລວມທັງສຸມໃສ່ການຈັດຕັ້ງປະຕິບັດ ວາລະ 2030 ເພື່ອການພັດທະນາແບບຍືນຍົງ, ຄວາມພະຍາຍາມເຮັດໃຫ້ ສປປ ລາວ ຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ໂດຍສະເພາະການລຶບລ້າງຄວາມທຸກຍາກ ແລະ ການລຶບລ້າງໄພອຶດຫິວ ກໍ່ຄືການປັບປຸງຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນ ຊຶ່ງວຽກງານເຫຼົ້ານັ້ນລ້ວນແຕ່ເປັນວຽກທີ່ຕິດພັນໂດຍກົງກັບບູລິມະສິິດ ແລະ ເປົ້າໝາຍຂອງ ອົງການ FAO. ສະນັ້ນ, ການສືບຕໍ່ ແລະ ຮັດແໜ້ນການຮ່ວມມືກັບອົງການ ແມ່ນມີຄວາມສຳຄັນ. ໃນໂອກາດດັ່ງກ່າວ, ທ່ານຜູ້ອຳນວຍການໃຫຍ່ ອົງການ FAO ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ການ​ເດີນ​ທາງ​ມາຢ້ຽມ​ຢາມໃນ​ຄັ້ງ​ນີ້ ຖື​ເປັນນິມິດໝາຍອັນໃໝ່ ແລະ ບາດກ້າວທີ່ສຳຄັນ ສະແດງໃຫ້ເຫັນເຖິງການຮ່ວມມືທີ່ດີ ລະຫວ່າງ ສປປ ລາວ ແລະ ອົງການ FAO ໃນໄລຍະຜ່ານມາ ແລະ ການເອົາໃຈໃສ່ເປັນພິເສດ ໃນການຮ່ວມມືວຽກງານ ດ້ານການຄ້ຳປະກັນສະບຽງອາຫານ ແລະ ປັບປຸງໂພຊະນາການ.

ນອກຈາກນີ້, ໃນໄລຍະການຢ້ຽມຢາມ ສປປ ລາວ, ທ່ານຜູ້ອຳນວຍການໃຫຍ່ ກໍ່ໄດ້ເຂົ້າຢ້ຽມຂ່ຳນັບ ທ່ານ ປອ. ລຽນ ທີແກ້ວ, ລັດຖະມົນຕີ ກະຊວງກະສິກຳ ແລະ ປ່າໄມ້; ທ່ານ ສົມມາດ ພົລເສນາ, ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ; ແລະ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ, ພ້ອມທັງຍັງໄດ້ເດີນທາງໄປຢ້ຽມຊົມບັນດາໂຄງການທີ່ຈັດຕັ້ງປະຕິບັດຮ່ວມກັນ ລະຫວ່າງ ອົງການ FAO ແລະ ຄູ່ຮ່ວມງານພາກລັດ ທີ່ ສະຖາບັນຄົ້ນຄວ້າກະສິກຳ, ປ່າໄມ້ ແລະ ການພັດທະນາຊົນນະບົດ ແຫ່ງຊາດ ກ່ອນທີ່ຈະເດີນທາງກັບດ້ວຍຄວາມສະຫວັດດີພາບ.

ອົງການ FAO ໄດ້ມີການຮ່ວມມືກັບ ສປປ ລາວ ຕັ້ງແຕ່ປີ 1975 ເປັນຕົ້ນມາ ແລະ ໄດ້ສ້າງຕັ້ງຫ້ອງການຜູ້ຕາງໜ້າຂອງຕົນ ປະຈຳ ສປປ ລາວ ໃນປີ 1980. ໃນປັດຈຸບັນ, ສປປ ລາວ ແລະ ອົງການFAO ກຳລັງຈັດຕັ້ງປະຕິບັດແຜນງານຊ່ວຍເຫຼືອ ສປປ ລາວ ຊຶ່ງມີມູນຄ່າ 37 ລ້ານໂດລາສະຫະລັດ ສຳລັບ 2016 - 2021.